الثلاثاء، 8 أغسطس، 2017

The other side of me | جانب مختلف من حياتي .. ♥


السلام عليكم ورحمة الله وبركاته ♥
اهلا اهلا ♥♥ كيف حالكم ؟ّ! من بدأت الإجازة وأنا حايسة مع مدونتي ما اعرف ليش بس ما عندي وقت اكتب فيها لكن بإذن الله راجعة رجعة قوية هالمرة جد بمواضيع ومنتجات جديدة .. لو حابين مواضيع او ريفيوز لمنتجات معينه اكتبوها لي في الكومنت او في انستقرامي هنا ..
تدوينة اليوم مختلفة كليا عن الي متعودينه مني ونادر أحكي عن منتجات مثل كذا وعموما شي جديد علي وعليكم والحلو في الموضوع انو مشترك مع أكثر من مدونة ♥ 
قبل ما نبدأ اكيد فيه منكم جداد على مدونتي او على حسابي .. انا غادة عبدالله بلوقر من 4 سنوات وأكثر .. اكتب عن أغلب تجاربي مع المنتجات الي جربتها والمواقع الي طلبت منها وغيرها كثير .. لو تلاحظون فوق مقسمة المواضيع داخل المدونة لـ6 اقسام حتى يسهل لكم الرجوع للمواضيع

احب اكتب عن اي شي وغريب وما يكون مكرر واحب اجرب كل جديد قبل ما ينتشر علشان كذا أغلب المنتجات و المواضيع الي حكيت عنها جديدة وماهي مكررة .. مواضيع كثيرة حبيتوها مثل الطلب من سيفورا اونلاين هنا و هنا وتجربتي في تبييض الأسنان بالقوالب المنزلية هنا علاجي لبشرتي الي غيرتها وخلتها مثالية بعد معاناة سنين هنا حتى تغطياتي للأيفنت تلاقونها مثل تغطيني لإيفنت ديور هنا ولإيفنت مكياجي هنا ولإيفنت اربن ديكاي هنا وغيرها من المواضيع الي متأكدة راح تحبونها .. مجرد ما يصير عندك وقت خذي لفة على المدونة راح تستفيدين منها كثير

طولت عليكم .. ندخل لموضوعنا ، قررنا انا وبعض البلوقرز نتكلم عن موضوع جديد في حساباتنا و مدوناتنا الي هو : 



NON BEAUTY FAVOURITES


منتجات نحبها وتعتبر من مفضلاتنا مالها علاقة اطلاقا بالتجميل و العناية !! كيف يعني؟ في هذي التدوينة ماراح احكي عن اي ميكب ولا عطور ولا منتجات عناية بالبشرة و الشعر راح تكون كلها مفضلاتي الأخرى واخترنا اليوم من باقي الأيام لأنه مميز 8/8 .. متأكدة راح تستمتعون فيها قد ما انا استمتعت اصورها وأكتبها .. بعد ما تخلصون من القراءة اكتبو لي مفضلاتكم هنا او في انستقرام ولا تنسون تزورون قنوات ومدونات باقي البلوقرز حتى تشوفون مفضلاتهم هم ♥
نبذة عن حسابات البلوقرز مع روابط لمواضيعهم ومفضلاتهم :


  • بيان من قناة Bayanola وفديو مفضلاتها هنا .


حبييييييييت اختياراتهم مررة ومتسحمسة اوريكم اختياراتي انا .. يلا نبدأ :

ساعات دانيال ولينجتون | Daniel Wellington Watches


لو متابعيني في انستقرام او سناب تشات أكيد مليتو من كثر ما حكيت عنهم والا ؟ بجد ساعاتهم صدمتني قد ايش جميلة جودة وسعر ، عندي منهم 3 ساعات مثل مو مبين في الصورة فوق.. 
الماركة مناسبة للكل وفيه منها قسم للرجال ، خيارات الألوان منهم كثيرة وبعضها بإمكانك تغيرين السير حقت الساعة متى ما تبغين ..
الساعة الأولى من اليمين (في الموقع هنا ) :

CLASSY | 26MMSHEFFIELD

اول ساعة حبيتها من عندهم .. اخترت الحجم الصغير منها لأنها عملية أكثر خصوصا اني كنت ناويتها للجامعة وفعلا استخدمتها طول السنة الي فاتت بالجامعة ولا خربت ولا مرة ولحد الحين كأنها جديدة مو مكروفة ابدا .. لون الستراب أسود مصنوع من الجلد وعرضة 33mm + ضد الموية وعموما كل ساعاتهم كذا.
حكيت عنها في انستقرام هنا و هنا و هنا  ... حجمها على اليد اصغر من باقي الساعات ( فيه أكبر لو حبيتي )


اما ساعتي الثانية منهم ( في الموقع هنا ) :

CLASSIC PETITE | 32MMMELROSE

أكثر وحدة حبيتها الصراحة تنفع مع اي لبس ولأي مكان يكفي انها روز جولد لوني المفضل ♥ .. هالمرة المقاس اختلف لأن الكوليكشن هذا "كلاسيك بتيت" فيه 4 ساعات فقط بنفس الحجم 32mm أكبر من السوداء ، الستراب مصنوع من الستانلس ستيل خفيفة وناعمة على اليد وتقدرين تتحكمين بطولها .. صورتها في سناب الاسبوع الي فات ومو طبيعي كمية الأسئلة الي وصلتني عليها بس ما الومكم حلوة تستاهل .. عرض الستراب 14mm + ضد الموية حكيت عنها في انستقرام هنا و هنا و هنا ..هذي الصورة الي كانت في سناب ونزلتها انستقرام هنا .. ايش رايكم ؟!


اما ساعتي الثالثة و الأخيرة ( في الموقع هنا ) :

CLASSIC PETITE | 32MMBONDI

الأبيض في الساعات مو مفضل عندي لكن هذا ما يمنع انو الساعة مرتبة وحلوة باللبس بس ركبي معاها قطع واساور مناسبة .. حجمها كبير مثل الساعة الي قبلها ، وعلى فكرة لو ملاحظين كل ساعاتي روز جولد لكن في الموقع متوفر بعضها باللون الفضي او الذهبي يعني اذا عجبتكم ساعة خذو لفة على الموقع وشوفو التفاصيل و باقي المعلومات.
الستراب جلد عرضة 14mm ولونه ابيض حكيت عنها في انستقرام هنا وهنا و هنا..

اكثر من مرة حطيت لكم عروض واكواد خصم حلوة في انستقرام لكن للأسف كلها انتهت .. أخر مرة صورت الساعة جتني كثييييير طلبات و استفسارات عن طريقة الطلب واذا فيه كود او لا وطبعا رحت كلمتهم وطلبت خصم و الحمدلله ما ردوني هههههههههههههه للمعلومية انا مالي أي فائدة ولا لصالحي شي من الكود مجرد اني طلبته لكم حتى تستفيدون وتحفظون فلوسكم .. الكود Ghada دخلية وقت التشيك اوت راح يخصم لك 15% + شحن مجاني متخيلين !! وعلى كل ساعات الموقع الرجالية و النسائية مو بس الي عندي عادة سعرها يتراوح بين 400 -700 او عموما سعرها مناسب مع كود الخصم طبعا .. يعني فرصة للي حابه تجدد ساعتها او تهدي أحد .. رابط الموقع هنا وترا الطلب ما ياخذ منك وقت ابدا ما تحتاجين لا فيزا ولا بريد مجرد الماستر كارد للدفع والشحن يوصل دايركت للبيت حدود 2-7 ايام تقريبا .. بالعافية مقدما ولا تنسون تصورون لي لو طلبتو ♥ الكود ينتهي في بداية اكتوبر يعني عندكم شهر او اقل تقريبا لا تنسون تستخدمونه قبل الدفع علشان يخصم لكم من المبلغ.. 



كعب لوبوتان | Louboutin Heels 

A woman carries her clothes. But the shoe carries the woman" - Christian Louboutin"


احترت في البداية اذا يستاهل اكتب عنه او لا لكن شفت كثيير هالفترة مع تجدد تصاميم بعض البراندز للهيلز وكيف شكلها حلو ومريحة ماعاد رجعو لكعوب لوبوتان لأنها مؤلمة وانا معاكم .. للأسف كل الكعوب الي عندي منهم مؤلمة ما تتحملين تمشين فيها واصلا ماهي مشكلة بالنسبة لصاحب البراند نفسه !! اتذكر صاحبتي غدير من مدونتها هنا قالت انو صرح و عن تصريحه انه يكره مبدأ الراحة في الفاشن يقول الراحة مبدأ مبالغ فيه ما ينفع تكون مرتاح في لبسك طول الوقت ولو عشنا على هذا المبدأ كان كلنا طلعنا في الشارع ببيجامات < يعني اوضح من كذا اثبات انو مو مريح مافيه هههههههههههه لكن والله على كثر ما جربت هيلز من براندات مختلفه هذا غييييييير يعطيك رزة مو طبيعية خصوصا لو كنتي قصيرة بس هذا ما يمنع انو الطوال ما يلبسونه انا تقريبا طويلة والبس اطول هيلز عندهم ... عادي اهم شي انا مرتاحة ههههه 


الي في الصورة هو المفضل من بين الباقين خصوصا انو اللون و الموديل كلاسيك نود فيمشي مع كل شي و الجلد مطفي فإحتمال الضرر اقل وفعلا على قد ما لبسته ما خرب ولا تغير مع محافظتي عليه طبعا في الدست باق وتنظيفة بعد كل استخدام حتى ما يبين علية الاستخدام مع السنين ... الشي الوحيد الي يقهرني هو اللون الأحمر من تحت اذا بدا ينشال ويخرب مع المشي في الشارع وغيرة لكن هذا شي طبيعي وغصبا عني فلو كنتي موسوسة مثلي وتبغين تصلحينه كل مرة او حتى لو عندك الهيلز وخربان من تحت حبيت افيدكم بمحل عندنا بالرياض من نيويورك مشهور ومعروف لتصليح و تنظيف الشنط و الجزم (مو اعلان لكن حبيت افيدكم مستقبلا) .. دائما اودي شنطي و جزمي الجلود ينظفونها ويسوون لها حماية من الخدوش و الأوساخ مستقبلا .. شغلهم خراااااافي شوفو الصور في حسابهم هنا وراح تفهمون علي . 



نوت بوك من ماركس | Mark's notebook


هو انا لحالي الي احب اكتب طلباتي ومعلوماتي او حتى النوت في ورق ؟؟ ما عندي اجندة ولا احب استخدمهم وما ارتاح لإستخدام النوت في الجوال علشان كذا اكتبها في دفاتر صغيره او نوت صغير سهل اشيله معاي ولا ياخذ مساحة ..

الي في الصورة اول نوت بوك اشتريته قبل 7 سنوات ومررة احبة علشان كذا ما استخدمته ومحتفظه فيه لسبب مجهول هههههههههه .. الغلاف الخارجي لفتني اول ما شفته وحبيييت الفكرة والحلو انو هذا كفر ينشال بعد ما يخلص النوت بوك وتقدرين تركبينه على أي نوت ثاني .. والأحلى انو اوراقه كذا :


بيضاء سادة ماهي مسطرة ولا مخططة فأكتب في المكان الي ابغاه .. استخدمت اول الصفحات الي فيه بعدين وقفت وغيرته لأني حبيت احتفظ فيه .


المضحك في الموضوع انو لمن رحت لبوتيك ميزون بوم في نجود مول المكان الي اشترتيت منه النوت بوك كان سعرة حدود 70 ريال يعتبر كثير عليه لكني حبيته واعجبني فأصريت آخذه الصدمة لمن جيت احاسب طلعو غلطانين في السعر وهو اساسا 110 ريال !! طببعا ما رجعته خلاص نفسيا صار حقي .. لكن الي يقهر جد هو اني من شريته صرت اشوف المحلات كلها تبيعيه حتى هزازي وبسعر 10 ريال يعني فالي عاجبها وماراح تدفع 110 ريال عليه تروح لهزازي افضل لها هههههههههههه .

حلو لي تحت كتابة التفاصيل الصغيرة والنقاط المهمة خصوصا في الجامعة لأن حجمه مناسب و اوراقه كثيرة لو حبيتو تطلبون مثلة الماركة لها موقع اونلاين بس ما اعرف اذا للحين متوفر هذا الديزاين او لا .



الكميرا الفورية من فوجي فيلم | Fujifilm mini camera


الكميرا الفورية فيه احد ما سمع عنها او ماشافها قبل ؟؟! طلبتها اونلاين من زمااااااان ما اتذكر عدد السنوات حتى من كثر ماهي قديمة بجد .. شفتها بيوتيوب وانبهرت بفكرتها فقررت اطلبها وقتها لقيت عليها عرض نسيت في امارزن او ايباي  الكميرا مع شنطة للحماية و 120 فيلم مع اقلام وعدسة وغيرها كثييير فقررت اطلبها عن طريق وسيط وكلفتني حدود 1170 ريال اظن .. بس خلاص الحين صارت متوفرة عندنا في المحلات الي تبيع الكميرات انا مجرد اشتري منهم الافلام او اطلب كمية اونلاين ارخص .. المحلات ما يسوون عروض مثل ما تلاقين اونلاين لكن انتي شوفي الفرق في العروض و الاسعار عندنا وقرري الانسب لك ..


تصويرها للعب مو جدي يعني لا تتوقعين التصوير يصير بروفشنال اببدا الدقة تقريبا سيئة هههههههههه بس انا احبها .. حجم الصورة صغير قد الاصبع بس .. ما يمديك تشوفين الصورة قبل ما تنطبع مجرد ما تضغطين زر التصوير راح تطلع لك في الفيلم بيضاء بعد كم دقيقة توضح الصورة مع تفاصيلها .. الفترة هذي يجيبونها كثير في الايفنتس عندنا بالرياض ويصورونك فيها ويعطونك الصور لأنها ما تبقى لهمما تنحفظ الصورة في الجهاز ففكرتها حلوة وتغيير عن المعتاد كذكرى ..
فيها حالات مختلفة للطقس تغيرينها على حسب الجو علشان تخف او تزيد حدة الفلاش فيها .. اذا كان داخل بيت او كان في شمس وغيرها .. تشتغل ببطارايات حجمها صعب تلاقينها عندنا علشان كذا احاول اطفيها بعد ما استخدمها بسرعة حتى ما تنتهي ولحد الحين الحمدلله ما انتهت .. حلوة جربوها ♥ تمنيت لو عندي زيادة افلام اوريكم كيف تكون الصورة لكن للأسف انتهت الي عندي يبغالي اطلب كمية .. شوفو بجوجل كيف .



شاي أخضر من تويننجس | Twinings green tea

للأسف انا ما احب القهوة او بالأصح ما افضلها صح اشربها من وقت لوقت لكن ما اميل لها في العادة بكل انواعها بينما عندي عشق للشاي عموما وخاصة الأخضر ♥ 
كثير يغفلون عن فوائد الشاي الأخضر للجسم راح اقولكم بعضها .. اولها واهمها وكثير منكم يعرفونه انها تساعد في انقاص الوزن طبعا هذا ما يعني بعد وجبة دسمة في مطعم تسكتين معدتك فيه وتقولين ينحف هههههههههههه مستحيل اوكي هو يساعد على هضم الحفلة الي اكلتيها بس ماراح ينحفك كذا !! هذا شي احبه انو يساعد على الهضم وفعلا متى ما حسيت كثرت اكل وبطني مليان اشرب منه ويرجع كل شي طبيعي .. شربه يوميا ماراح ينحفك لو ما تبغين تنحفين لا تخافين بس اقصد انو يساعد عمليات الايض في الجسم تحرق اسرع فإلي تعاني من ثبات الوزن ومهما سوت رياضة ما ينقص او ينقص بطيئ تدخل الشاي الأخضر في روتينها وشوفي الفرق ..

الشاي الأخضر يطهر الجسم من السموم ويمنع الكليسترول ويقلل من الصداع ومعروف انه يستخدم كعلاج في الصين لبعض الآلام .. فوائد كثيييرة ما تعد الصراحة الافضل تكتبين في جوجل فوائد الشاي الأخضر و تقرأين بنفسك .. هذا غير انو مطهر للجسم وراح يبين وينعكس هالشي في بشرتك من برا !! والله لو احكي من اليوم لبكرة عنه ما خلصت فأسكت احسن حتى م تطول عليكم التدوينة زيادة .. وعلى فكرة انا مدخلته في روتيني يوم ايه ويوم لا بحيث في اليوم الي ما اشربه فيه اشرب مغلي البقدونس بداله وهذا موضوع ثاني طويييييل لو حابين احكي عن نظامي الغذائي وكيف بديت اغيرة مع نصائح قولولي في انستقرام محتارة اكتبه او لا ....



على كثرة الشركات الي توفر الشاي الأخضر بالنسبة لي شركة تويننجز هي الأفضل ولو تلاحظون اغلب المقاهي و الكفيهات وحتى المطاعم في الرياض لو طلبتي شاي يوفرون لك انواع الشاي من هذي الماركة فقط لأن جودتها عالية وطعمها حلو مقارنة بغيرها ..
اشتريه من الدانوب وغالبا يكون عليه عرض بوكس مجانا .. فيه انواع كثيييرة من الشاي في هذي الماركة وحتى الشاي الأخضر فيه الي مضاف عليه ليمون و الي مضاف عليه نعناع لكن انا شخصيا احبه سادة بدون أي اضافات ولا حتى سكر انتبهو .. ايش الفايدة تحطين سكر في الشاي غلط اشربيه مرة وحدة ما يحتاج تستلذين بطعمه ..



مكرونة كلير سبرينج | Clearspring pasta


مرة وحدة مادام اننا في موضوع الأكل و الصحة يعني قلت اقولكم عن هذا النوع من المكرونة .. لو متابعيني راح تعرفون اني بدأت اعدل كثييير من نظام أكلي واستبدله بخيارات صحية واقل سعرات حفاظا على الوزن والأهم حتى ينعكس لبرا يعني يبين في بشرتي ..


من ضمن الاشياء الي بدلتها هي المكرونة .. غيرت النوع العادي لنوع صحي او افضل لأن هذا النوع مكون من الرز الاسمر مع الكينوا ونبات القطيفة .. غير معدلة وراثيا وهذا شي مهم .. قليلة الدهون وقليلة الملح وحتى انها جلوتن فري .. الجلوتين هو من البروتينات الموجودة عادة في الحبوب و القمح وهي الي تعطي المكرونة مثلا اللزوجة الي فيها وتخليها لينة .. مافي مشاكل لأكلها لكن بعض الناس يتحسسون خصوصا الي يعانون مشاكل في المعدة علشان كذا ينصح بتجنبها وعموما اذا تبغون تعرفون اكثر عن الجلوتين اقرأو هذا المقال هنا ..

المهم .. الي خلاني عموما اختار الأنواع الصحية واستبدلت الرز و المكرونة  وغيرها بالنوع الاسمر هي مدربتي .. المسؤولة عن جدول أكلي و الكميات الي احتاجها نصحتني بهذي الأنواع عن العادي وبجد مافي فرق اببدا بينهم بإختلاف مكوناتهم طبعا !! سويتها كثيييييير قبل وآخر مرة وريتكم في سناب تشات طريقة المكرونة الصحية بنفس طعم أي مكرونة غيرها لكن اقل سعرات وصحية أكثر < لو تلاحظون بادية أحب نظام الأكل الصحي مرررة ♥ .. فيه كثير خيارات لشكلها تلاقونها في قسم المستورد او العضوي نسيت لكن في الدانوب وعموما لقسم هناك فيه خيارات اغذيه صحية حلوة ..


بطاقات تهنئة | Greeting cards


من كنت صغيرة وانا هوايتي تجميع بطاقات التهنئة بأنواعها وأشكالها عندي ادمان لهم وهذا الشي كان نافع لي ولغيري لأن وقت ما يتورطون ببطاقات للهدايا يرجعون لي ويلاقون خيارات حلوة كثيييرة .. مع السنوات قل حبي لتجميعهم وانتقلت للميكب ههههههههههه لكن عموما باقي عندي كمية وخيارات حلوة بس ماعاد فيني اروح وابحث عن اشكال جديدة في اماكن مختلفة ..


لو تتذكرون السنة الي فاتت في شهر ابريل حضرت دورة لتغليف الهدايا تابعة لصاحبة بوتيك فلامينجو .. وحدة من رعاة الدورة كانت بنت عندها متجر مختص بالبطاقات و الدعوات ولفتني شكل واختيارات وحتى عبارات البطاقات الي توفرها .. ما اعرف اذا جاهزة والا هي الي تسويها لكن عموما فكت ازمة البحث عنهم بالنسبة لي فصرت آخذ منها اسهل وأضمن .. جودة البطاقات و الورق جددا ممتازة قوية ما تتقطع والا تخرب بسهولة ومع كل بطاقة ظرف ابيض ،، يعني ماراح تحتارين بعد اليوم بأي شكل تختارين ادخلي حسابها ونقي منهم < على فكرة التدوينة هذي مافيها أي اعلان مدفوع او غير مدفوع هي مجرد نصائح و متاجر جربتها وحبيت افيدكم فيها لو محتاجينها لكن لو كان فيه اعلان مطلوب انتم عارفين اني اقولكم بالصريح !! .. حساب المتجر في انستقرام هنا .


منظمات دروج اليكس من ايكيا | Alex door form ikea 


زي أي قطعة اثاث او درج ترتيب هذا النوع من ايكيا معروف خصوصا عند الأجانب مدمنات الميكب .. ليش ؟ لأنهم يستخدمونه في ترتيب منتجاتهم واشيائهم خصوصا انو حجمها مناسب و عدد الادراج فيها كثييرة ..
هي مو مخصصة لشي معين بإمكانك ترتبين بداخلها الي انتي حابه :


متوفرة بحجمين الطويل و القصير الفرق انو الطويل فيه 9 ادراج بينما الصغير 5 ادراج العيب الي قهرني انو عمق الدرج يختلف عن بعض يبدأ صغير وبعدين يكبر شوفو الصور اوضح في جوجل .. المشكلة هذي تكون واضحة خصوصا في الـ9 ادراج لأن الدرج الأول يكون صغييير و الدرج الأخير يكون كبييير وهذا يخل بالمساحة عندي علشان كذا قررت اخذ اثنين من الصغير فوق بعض ارتب وافضل بالحجم ومناسب لي أكثر فعندي 10 ادراج فيها كل شي مختص بالتجميل و العنايه من ميكب ومناكير وزيوت ومقشرات واجهزة الشعر حرفيا كل شي حتى الي ماله مكان يروح للدرج لأنها كثيرة وتاخذ منتجات كثييير ومخصصة بعضها للنظارات وبعض المجوهرات يعني ما ندمت ابدا اني اخذتهم .. اذا كنتي تحبين تكونين مميزة فهذي الدروج ماراح تناسبك لأن فعليا اغلب البيوت عندها منهم يعني لا تتوقعين تكونين الوحيدة الي تستخدمها فيه بعض البنات ما يحبون الشي المكرر فابعدو عنها ..

اتمنى اعجبتكم التدوينه وحبيتو فكره التعاون مع مدونات ثانيه انا حبيت الفكره مرره خصوصا انو هذا راح يوسع علاقاتي ويطور من مهاراتي في المدونه ومنها نفيد ونستفيد ♥♥ كل الي تعاونت معاهم وخصوصا امل بما انه ثالث مرة نسوي تعاون سوا ولا يمنع الباقين من البنات الي اثق فيهم برأيهم من قبل ما افتح انستقرامي ومدونتي ومتابتعهم بكل السوشال ميديا واحبهم قلبا وقالبا قابلتهم كثير يدخلون القلب الله يسعدهم .. وشكرا لكم متابعاتي ♥ لا تنسون تمرون على مدوناتهم وتشوفون تدويناتهم وتعرفون المنتجات المفضله عندهم يمكن تلاقون منتج يناسبكم .

 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

نجوو محمد يقول...

حبيت التدونية جد استمتعت وانا بتفرج ، جميل جداً ❤️

Reem AbdulAziz يقول...

يعطيك العافيه وحبيت هالتغيير في تدونيك ممكن تكررينه بين فترة وفترة وفكرة التعاون جميلة عرفتني على مدونات والفكرة لطيفة..
أكثر شيء شدني الشاي الأخضر على أنه ماجربت أنواع كثيره لكن هالنوع أخذته صدفه ومن جد الطعم مميز ويستاهل التجربه
وتحمست اجرب الآنواع الثانية من نفس الشركة خاصه سعره حلو...
وشاكره لك وللمدونات اجتهادكم وبالتوفيق يارب

إرسال تعليق