السبت، 17 يونيو، 2017

UD Master class | تغطيتي لإيفنت / ماستر كلاس اربن ديكاي .. بوتيك اربن ديكاي الوحيد في السعودية + المنتجات الجديدة + مفضلاتي ♥


السلام عليكم ورحمة الله وبركاته ♥
اهلا اههههلا فيكم ♥ راجعة رجعة قوية بعد انقطاع شهرين عن المدونة .. تدوينة اليوم خفيفة ، قليلة الكلام وكثيرة الصور ههههههههههه 
لا جد ما حبيت اكثر كلام من اولها مثل كل تدوينة علشان كذا قررت اخليها تغطية لآخر إيفنت حضرته امس لأربن ديكاي .. لو متابعيني في سناب تشات < g.abdullah09 ، أكيد شفتو مقتطفات منه والا ؟؟!
الدعوة ما كانت فعليا ايفنت قد ماهي ماستر كلاس مع الميكب ارتست البرازيلية ايزابيلا من اربن ديكاي تيم .. انسانة لطيفة جداا شخصيتها وهي نفسها جميلة ماشاءالله 💗💗
موقع الماستر كلاس كان في بوتيك اربن ديكاي بحياة مول وعلى فكرة كثيييير منكم ما يعرفون عن هذا البوتيك !! اظن انو اول بوتيك كامل مخصص لمنتجات لأربن ديكاي في السعودية اذا مو في الشرق الأوسط ! متخيلين 😍 علشان كذا قررت في هذي التدوينة آخذكم جولة قصيرة على المحل + ايش صار في الماستر كلاس والفاينل لوك + عرض بعض من المنتجات الجديدة + مرة وحدة اوريكم منتجات حبيتها من اربن ديكاي لأني تقريبا جربت كل شي !!💕



مقتطفات من البوتيك


البوتيك موجود في ثاني لفة على اليسار لما تدخلين من بوابة 1 ..






المجموعة هذي حبيييييتها  😍 متأكدة مدمنات المكياج راح يحبونها لأنه جامع التوب برودكتس من وجة نظري الي هي : الاكحال و الايشادو !💕 .. شايفين الباليت في اليمين؟ مرررة حابته بس اتذكر آخر مرة استشرتكم في انستقرام اكلتوني هههههههههه ما اعرف للحين حابته مين يعرف ممكن ارجع آخذه ...


حبيت انهم حاطين ستاند للتوب 10 منتجات مفضلة ومن البيست سيلر يعني الكل او الأغلب مجربها وحابها .. رقم واحد قريب الى قلبي مرررة مرة ♥ كان بدايتي في حب الميكب اخذته مع الباليت الثاني من دبي قبل ما يوصلون للسعودية ومن يومها وانا معجبة كبيييرة بالماركة و منتجاتها ..💋


لايف ميكب مع الميكب ارتست ايزابيلا


البرازيلية الجميله ايزابيلا 💕 .. الميكب ارتست الي عملت لوك للعيد لايف بإستخدام منتجات جديدة ودائمة من اربن ديكاي ، ماشاءالله يدها خفيفة وفنانة في الألوان والأحلى من كذا شغلها نظييييف يعني بجد ميكب ارتست ...


من المنتجات الي استخدمتها على المودل ومن مفضلاتها : 

  • البرايمر سبري وراح اوريكم صورته تحت مع شرح لأنواعه ..
  • اول نايجتر فاونديشن لتغطية كاملة وفنش طبيعي على البشره وعلى فكرة الدرجات الي تكون بالأنصاص مثل 2.5 وغيرها تكون اندرتونها اصفر..
  •  كونسيلر نيكد ومصححاتها وراح اقولكم عن خطوة تسويها هي وعجبتني ..
  •  برايمر العين الشفاف < حلو لكن ما اعجبني لسبب واحد انو شفاف فالي في عينها تصبغات او عروق واضحة مثلي ماراح يغطيها وبكذا ماراح تبين درجات الايشادو علشان كل قل استخدامي له .. افضل باقي الالوان منه أكثر ..
  •  البودرة الجديدة المخملية ما صورتها للأسف لكن ابحثو عن اسمها The Velvetizer Translucent Mix جميييييييلة ناعمة بشكل ما تتخيلونه من اسمها فلفت مبين .. جربتها في المحل على يدي خفيفه تندمج بشكل طبيعي نعمت سطح البشره واخفت الخطوط و المسام .. وباليت الايشادو نيكد بيسك وغيرها من المنتجات الي استخدمتها على المودل ..




هنا عرضت باليت هايلايت جديد After Glow Highlighter Palette هذا:



باليت الهايلات للأمانة مو مرة اعجبني عكس البنات حبوه .. انا احب الهايلايت القوووي الي من لمسة يبين وما يكون باودري افضله يكون اقرب للكريمي الي من لمسة يوضح بقوة مثل هايلترز بيكا .. مو سيئ بالعكس تنوع الدرجات اعجبتني لكن تركيبتهم مو بالمستوى الي احبه .. جديد اظن نزل في البوتيك ، ما اعرف كم سعرة للأسف ..


من التكنيكز او الخطوات و الطرق الي عملتها وحبيتها هي انها خلطت اللون الاصفر من المصحح المعروف من لاين نيكد مع الكونسيلر الي بنفس لون بشرة المودل بحيث يكون عندها بنانا باودر بس على كريم .. فهمتو علي ؟ يعني اللون يكون فاتح مناسب لبشرتك بما انو الكونسيلر المستخدم مناسب لك وبكذا يعطيك هايلايت و إنارة حلوة تحت عينك مثل ما البنانا باودر تعطيك < الخطوة هذي ما تنفع للي عندها هالات الا بعد استخدام الكوريكتور حتى ما يقلب رمادي ..

ونفس الشي سوته للروج .. خلطت الروج مع الكونسيلر حتى يكون اللون النود المثالي لبشرة المودل وفعلا اللون صار مناسب لها مرررة لكن المودل ما تتصور من تحت عينها علشان كذا ما قدرت اصورها الا في سناب تشات للي شافوها ايش رايكم ؟؟!



الفاينل لوك 



ماشاءالله الميكب الي سوته ينطق نظافة .. بشرة مثالية ناعمة ولونها حلو وتغطية كافية ، الحواجب ما اتوقع الميكب ارتست رسمتها لأن من بداية اللوك كانت جاهزة ، العيون حبييييييتها سحبتها لفوق بشكل طبيعي صايرة عيونها احلى بألف مرة لأنها كملت خط الرموش من تحت لفوق وهذا الشي الي رفعها لفوق وبين عيونها مسحوبة ..



منتجات سبق جربتها وحبيتها 


الجمااااااال الجمال الصورة لحالها تتكلم  ♥♥ يمكن هذا المنتج التوب عندي لمنتجات العيون منهم .. نوعية الايشادو الي اسمها Moondust Eyeshadow عبارة عن جلتر مضغوط بدرجات مختلفة < ركزو يا بنات على اسم النوع لأن شكل العلبة نفسها لكل باقي انواع الايشادو فتأكدو انا اقصد المون دست لكن برضو الأنواع الثانية حلوة بس انا اقصد المووون دست.


جلتر مضغوط افضل طريقة لإستخدامه بالاصبع ويجنن على العين ما يكتل ولا يضايق وثاااابت ثابت .. قطع الجليتر نفسها ناعمة ما تخدش الجفن + تنفع فوق اي ايشادو وراح تبين مختلفة في كل لوك ، البيس للون نفسه مو قوي فلازم تستخدمين لون اساسي سواء كان باودر او كريمي وبعدها استخدمي الجليتر وشوفي الجمال ♥ للون اقوى استخدميه مبلول واذا بتجربين درجة وحدة ممنهم انصحك بـ SPACE COWBOY ما يحتاج اوصفه اذا رحتي للبوتيك جربيه واحكمي بنفسك.. سعره 96 ريال.



منتجات البشرة من فاونديشنز و كونسيلرز و مصححات كلها حلوة لكن التوب من الي في الصورة هي الكونسيلرز ..


اول ما نزلت والكل يتكلم عنها وحابها وفعلا حلوة .. تركيبتهم كريمية سهلة في الدمج ، الفنش تقريبا مات لكن ما تبهت البشره تبين طبيعية .. تغطيها عالية وتقدرين تتحكمين فيها من خلال الكمية المستخدمة ، مضاف لها مكونات تساعد على التقليل من التجاعيد وطبعا ما تدخل في الخطوط تحت العين .. 142 ريال




الهايلايترز هذي حلوة لكن مو للوجه مع انها تنفع بس مو حلوة ابدا مليانة جلتر ومو طبيعية بينما على الجسم تجنن .. متوفرة بثلاث درجات ، انا ادماني لمعات الجسم الي لبسها للعيد يطلع الساق او اليدين او الرقبه حطي عليها لمعة وشوفي كيف بشرتك تصير هيلثي وجلوي وصحيه وجميلة ولو تتذكرون قبل سنتين كتبت تدوينة عن بعض الكريمات و اللمعات الي جربتها والخطوات الي تسوينها قبل حتى تكون النتايج مثالية تلاقون التدوينه هنا .. سعرها 131 ريال . 


و المعروف لا يعرف .. بخاخات اربن ديكاي للتثبيت المشهورة ما غيرها .. الفرق انهم غيرو تعليبها القديم كان لونها ابيض .. الي في اليمين لونهم الاصفر يستخدمون قبل الميكب الاول B6 مكون من 6 انواع فايتمنز مفيدة للبشرة و الثاني QUICK FIX مخصص للترطيب واثنينهم قبل الميكب كبرايمر للفاونديشن .... اما الي علبتهم سودا فهم مثبتين للميكب يعني يستخدمون كآخر خطوة ومتوفرين بثلاث انواع DE SLICK يتحكم بالدهون و اللمعان CHILL يعطي رفريش واحساس بارد على البشرة وآخرهم ALL NIGHTER لثبات اقوى ،، مثبتاتهم لا يعلى عليها ما استغني عنها اببدا لأنها تشيل وتقلل من منظر البشرة الباودري او الكيكي وتخليها نظيفة وطبيعية ما يبين الفونديشن مثل الماسك !! سعرهم 130 ريال  


شايفين الباليت هذا ؟! نفس نوع الايشادو او الجليتر الي حكيت لكم عنه فوق بالضبط الفرق انو هذا في باليت والا التركيبة و النوع نفسسسها وطبعا ما يحتاج اقول انو عندي من زمان .. جامع درجات جديدة بسعر مناسب وهذا الي حببني فيه 💕  


اما هذي فهي نفسس نوعية الايشدو او الجليتر الي فوق بس كريمية .. جديدة وما جربتها الصراحة ولمن شفتها بالبوتيك وجربتها على يدي ما حسيتها بقوة البرسد منها ! يعني ما انصح فيها الا اذا تحبين اللمعة الخفيف او راح تستخدمينه كبيس قبل الجلتر لأنهم نفس الدرجات وهذا راح يعطيك لون ولمعة اقوى و اوضح .. 101 ريال 



الدرجة هذي Chem Trail تنفع تحت اللون الي نصحتكم فيه فوق .. وعلى فكرته تأكدي من انك تسكرينه زين بعد الاستخدام سواء كان الكريم هذا او الجليتر فوق لأنه يجف واذا جف يصير لونه سيئ ويخرب .. التستر الي في البوتيك ابببدا ما حبيته عكس الي عندي لأنه فرش وانا محافظه عليه مو معرض للهواء مثل التستر ..


الي في المحل ساعدتني وسوت سواتش على يدها للدرجه الحمرا .. شايفين قوة لمعة اللون مو مرة حلو لوحدها لازم الجلتر فوقها ☹️!



اللاين للسكن كير عندهم حمستني من وصفها عنه وحتى بعد ما بحثت وقرأت عنهم .. 



هذا المنتج عبارة عن مقشر باودري قبل الميكب .. تخلطين كمية من الباودر مع شويه موية وحركيه على وجهك واتركيه زي الماسك كم دقيقه وامسحيه تقول بشرتك راح تكون نظيفه وناعمة ومثالية للبدأ بالميكب ،، يشيل الجلد الميت ويعطيها نضارة سريعه لأنه مدعم بفيتامين C  المعروف بخصائصه الفعالة لنضارة البشرة .. ومن مكوناته زيت جوز الهند ، نوع من انواع الورود و الفانيلا وكلهم مفيدين ، اليوم في سناب تشات سمعت وحدة تمدحه على بشرتها لقبل الميكب وكمنتج عناية عموما فتحمست اجربه أكثر وللأسف ما اعرف سعر اي منتج من هذي المجموعة .. ♥♥


المرطب واضح بيكون ادماني الجديد .. الي يعرفني يعرف اني انسانة Picky يعني مو اي مرطب يرضيني ويناسبني للأسف ، احب المرطبات الخفيفة تكون جل بحيث تمتصه البشرة ولا يدهن بعد كم ساعة ، ما تكون فيه ريحة قويه ويفضل ما يكون معطر ولا يدهن بعد كم ساعة .. مافيه الا مرطب واحد الي ناسبني بهذي المميزات والي هو من كلينيك clinique dramatically different moisturizing gel ولحد الحين ما لقيت اي شي يشبه له لأن اساسا نادر تلاقين مرطب تركيبته جل حلوة !! لمن جربته هذا على يدي انبهرت الصراحة كأنه موية من خفته ! خفيف جددا نقطة منه كفت يدي كاملة وامتصته البشرة بسرعه والأحلى من كذا انو مو معطر يعني اقدر اقول انه راح يناسبني بنسبة 99% .. مع انو حق كلينيك مافيه اي مشكلة بس قلت اقولكم للي تحب تجرب نوع جديد بنفس التركيبة مع اختلاف السعر (كلينيك اغلى) تجرب هذا راح يعجبها ان شاءالله.



اغلب المنتجات الجديدة والي استخدمتها الميكب ارتست على المودل كانت على الطاولة هنا .. كثير منها ما حكيت لكم عنها لأني ما جربتها ولا سمعت عنها ولا حتى انتبهت انها موجود الا لمن شفت الصور .. وقتها البوتيك كان زحمة وضيق فما اخذت راحتي بالتجربة لكن راجعة له خلال الايام القادمة اشتري الي حبيته ومرة وحده اجرب الباقي ..


شكرا اربن ديكاي على الدعوة كانت فرصه جميلة قابلت الميكب ارتست ايزابيلا والتيم كامل والبلوقرز ♥ .. لو حبيتو التدوينة وتبغون اعيد اسويها لباقي الايفنتس قولولي في انستقرام حتى اصور ايفنت الاسبوع الجاي؟! 



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

ليست هناك تعليقات:

إرسال تعليق