الجمعة، 24 مارس، 2017

Mikyajy Cushion Compact | كوشن فاونديشن من مكياجي ♥ ايش هو ؟ رأيي فيه + التفاصيل


السلام عليكم ورحمة الله وبركاته ♥
تدوينه اليوم عن منتج اكتسح اسواقنا بقوة في الفتره الأخيرة ... ممكن ما يكون جديد على الكل لكن الأغلب ما يعرفه ،، الي يتابعون مشاهير شرق آسيا وخصوصا الكوريين اكيد مر عليك قبل والا ؟؟ من أشهر منتجات المكيب عندهم ومتوفر بأشكال وأنواع وتركيبات مختلفه ولا يفارق شنطتهم في كل مكان وموجود بأسعار غاليه وجودات عاليه و اسعار متوسطه وجوده عاديه يعني الكل هناك يستخدمه لدرجه سمعت مره انهم يشترون الغالي والأفخم منه حتى اذا استخدموه خلال اليوم برا البيت يكون ماركه يفتخرون فيها..... 
عموما كثيييير ماركات بدأت تطلع اصدارها الخاص فيها من الماركات الفرنسيه الكبيره مثل  ديور و ايف سان لوران والماركات المتوسطه مثل لوريال وغيرها لكن اليوم راح احكي لكم عن اصدار مكياجي الخاص لهذا المنتج .


تعريف عن المنتج



اشتهر المنتج أكثر شي بفكرة تعليبه الي هي عباره عن Cushion Compact الي بداخله تكون فيه قطعه من الاسفنج "كوشن" مليانه او مغطسه بالمحلول .
الي يميز هذا النوع من الكوشن او "الاسفنج" عن غيره لأن حتى الي بداخل علب البادر احيانا يكون كوشن لكن هذا النوع الي في منتج اليوم مميز بكثره المسام الدقيقه فيه فيمتص كميه فاونديشن أكبر ،، يستخدم بإسفنجه مخصصه برضو افضل من باقي الأنواع حتى تعطيك تغطيه خفيفه ولون حلو ، عاده هذي الطريقه تنفع للإستخدام اليومي لأنه خفيف لكن بإمكانك تستخدمين منتج ثاني غير الاسفنجه الي معاه ...

وللمعلوميه الكوشن كومباكت مو بس متوفر كفاونديشن موجود منها كونسيلر وبلشر وايشادو وايلاينر وغيره كثير ممكن عندنا ما توفر الا الفاونديشن لكن لو رجعتي للماركات الكوريه راح تلاقينها وبخيارات أكثر وقبل فتره شفت في سيفورا انو ايف سان لوران اصدرو الكوشن بلشر يعني الي حابه تجرب الفكره بمنتج غير الفاونديشن لا يفوتها حبييييت الوانهم مره شوفوهم في سيفورا المره الجايه.


معلومات عن المنتج:


الكوشن فاونديشن هذا من مكياجي اضافه جديدة لكوليكشن 22K لو تعرفونه ( جميل الكوليكشن هذا الأرواج و المحددات و الايشادو يجننون ) متوفر بـ6 درجات < على حد علمي .. الدرجه الي عندي 302 وتلاقونه بجميع فروع محل مكياجي .
سعره 89 ريال ،، فيه 10ml ،، حمايه من الشمس 25spf ،، مصنوع في ايطاليا + خالي من العطور و البرابين.




حجم العلبة مناسب للشنطه ما ياخذ مساحه لكن ماهو صغير مثل الكومباكت باودر !! لان الاسفنجه والبلاستيك الفاصل بينهم ماخذ مساحه ،، من برا مثل مو واضح لكم عاكس ..




تجربتي ورأيي فيه 


المنتج كفكرة حبيته وحبيت سهولة نقلة ولأنه بلاستك ومحمي ما اخاف يطيح او يحوس لأنه ما ينفتح الا بقطعة تضغطينها ، اما التركيبة نفسها تعتبر كريميه اكثر من انها سائله يعني شوفو كيف شكلها لمن ضغطت باصبعي :


في الدمج احسها تنشف بسرعه فأسرعي بالدمج ختى ما يصعب عليك اذا بدأ يجف ،، ولاحظت الدمج والفنش يكونون سيئين اذا استخدمت الاسفنجه الي معاه كأستخدام أول يعني اذا راح تبدأين تحطين مكياج يفضل تستخدمين فرشه او بيوتي بلندر لكن وسط اليوم للتش اب استخدمي الاسفنجه الي معاه وكذا ..
الفنش ساتن/مطفي يعني اللوك الي يعطيك هوطبيعي فيه لمعه هيلثي جلو خفيييفه جدا ما تخلي وجهك مطفي لدرجه يبين غبار ! يناسب البشرات الدهنيه بما انو غالبيه الكوشن فاونديشن تكون للبشرت الجافه وصعب يلاقون واحد مناسب للدهون في بشرتهم هذا راح يناسبك ،  ما يكتل ولا يتجمع في الخطوط و المسام وهذا شي مهم لكن تأكدو من الدمه الزين بالأول ♥ تغطيته اقدر اقول من خفيف / متوسط أكثر فيناسبني للإستخدام اليومي لأني احب الشي الخفيف الي يعطي لون حلو وللمعلوميه الحين بدأت اقلل من استخدماي لمكياج البشرة عموما خصوصا بعد ما عالجتها وصارت مثاليه ما تحتاج شي لكن المود احيانا يبغى مكياج هههههههههههههه تلاقون تدوينه علاجي لبشرتي كاملة بالصور هنا.


العيوب 


  • للأسف ما يمنع الدهون خلال اليوم يعني بعد كم ساعه تبدأ تدهن بشرتك يفضل تثبتينه بباودر حتى تتفادين هذي المشكلة.
  • مثل ما قلت قبل مو حلو تستخدمين الاسفنجه الي معاه كإستخدام اول + صعب تنظيف الفرش و الاسفنجه الي معاه بالذات بعد الإستخدام ما اعرف ليش لكن احسها تعلق فيهم وتاخذ جهد أكبر في الغسيل.
  • يفضل تستخدمين قبله برايمر حتى يزيد الثبات وينعم او يوحد ملمس سطح البشره لنتيجه احلى.
  • منتج مثالي للطلعات البسيطه وفي الصباح لكن ما ينفع للمناسبات اببدا راح يتعبك خلال اليوم من عدم ثبات او دهون البشره يعني مو أكثر من 3 ساعات كذا.



بالنسبة لي احب استخدم اما هذي الفرشه من ماركة كحل الكويتيه الي سبق وحكيت لكم عن أغلب منتجاتهم ومكياجهم هنا والا استخدم البيوتي بلندر وكلهم نفس النتيجه حلوين أكثر من استخدام الأسفنجه الي تجي مع المنتج نفسه.


درجتي


عارفه عارفه ما اعرف وين كان عقلي يوم اخترت درجتي هذي ههههههههههه مع الإنارة ما قدرت أحكم زين للأسف المفروض اخذت درجه افتح !! لكن على الأقل نفس درجي وقت ما اسوي تان (استخدم الموس تان من سانموريز) فأستخدم هذا معاه لأن ماعندي اي فاونديشن غيره يناسبني وقت التان ♥



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليق واحد:

Alwaad Blog يقول...

حبيته احسه يناسب البشرة الجافة يعطيكي العافية على الريفيو💖

إرسال تعليق