الأحد، 12 فبراير، 2017

Skin care | تجربتي في علاج مشاكل البشره من آثار + حبوب تحت الجلد (مع الصور) مع الدكتورة نادية الخطيب في عياده الأطباء الاستشاريون !!♥ -محدث-


السلام عليكم ورحمه لله وبركاته ♥
التدوينه الي من عرفتو اني بديت علاج ما وقفت الاسئله عن النتائج ورأيي فيها وعلى اني لحد الحين ما خلصت الا انو الطلبات زادت عن حدها فقررت اكتبها ولو اني ما خلصت لكن راح ارجع احدث لو لاحظت تغييرات او فروق في المستقبل ان شاءالله لأني تقريبا تميت 90% من الخطه العلاجيه الحمدلله .
السبب الي يخليني اتردد اني انزل التدوينه الحين انو لازلت امر بتغيرات في بشرتي علشان كذا حاولت ااخرها قد ما اقدر حتى تكون عندكم صوره واضحه انو علاج البشره ممكن ما يكون مثالي 100% وسحري راح يدوم لأنو طبيعتها كذا تتغير مع المناخ و العوامل الخارجيه ، والحمدلله مر شهر ونص بالضبط من بديت العلاج فاقدر اعطيكم نبذه عن الي يصير او صار في بشرتي حاليا..



للي ما يعرفون ايش القصه ، نروح من البدايه لكن قبل ما نبدأ ابغى انوه انو التدوينه طويله وفيها معلومات مفصله لا تقرأينها الا وانتي مروقه ما تنفع سريع سريع  وشي ثاني ، العلاجات الي اكتبها لكم بصوره مبسطه مثل "التقشير" لها مصطلحات طبيه لكن انا ما احفظها فهمتو علي ؟ يعني لمن فحصت بشرتي قالت راح نستخدم مقشر ..... بذكر اسمه بالانجليزي او المصطلح الطبي لكن لأن الأسم صعب ما اتذكرها فأختصرها بقول كريم مقشر ههههههههههه اذا حابين تعرفون ايش الاسماء بإمكانكم تراسلون الدكتورة على حسابها انستقرام هنا (وعلى فكره تقدرون تستشيرونها وتستفسرون منها اختصارا للوقت) او اتصلو على العياده واستفسرو اسهل .....
والي خارج الرياض بجده او الشرقيه او اي مكان ثاني حتى الي برا السعوديه أكيد فيه عيادات تقدم نفس الخدمه ممكن تروحون وتحكون لهم المشكله ووروهم صور المنتجات وبشرتي ممكن يعرفون ايش الكريمات و الوصفات والعلاج الي سويتيه بما ان خبرتهم في المجال التجميلي كبيره  بحيث اذا شافوها مناسبه لكم وصفوها يعني لا تنحصرون على عيادتي الي اروح لها اذا ما كنتو في الرياض.

انا كبلوقر تجيني طلبات وعروض من عيادات تجميليه لتجربه خدماتهم والحديث عنها لكني اخاف اخاطر واروح عند اي احد ولو انه مجاني !! ما فيها لعبه الا بشرتي ما العب فيها .. كل فترة وفترة تجيني عروض من عيادات واردها مع انها معروفه وكثير بلوقرز مدحوها والعيادات ممتازة بس انا ما ارتحت ما اعرف ليش ، في يوم وصلتني رساله من دكتورة تطلب مني اجرب خدمتها لتنظيف البشره وقتها بشرتي كانت اقل ما يقال عنها بشعه من التعب والارهاق والتوتر ومن الجامعه عموما كانت ميته سوداء مافيها نضاره ولا حيويه ولا شي يعني صراحه كانت قبيحه حتى كريماتي وروتيني من منها فايده هذيك الفتره. 
ما رديت عليها لأيام لكن اسمها كان عالق في راسي ما احسه غريب كأني سامعه الاسم من قبل ! صدفه سألت صديقاتي عن الدكتوره وطلعت وحده منهم مجربتها شخصيا وهي الي قالت لي عنها من قبل علشان كذا اسمها ماكان غريب البنت تعالج عندها من سنين من قبل ما تفتح الدكتورة عيادتها الخاصه وعلى طاري العياده خلوني اعرفكم على الدكتورة ..

اسمها د.نادية الخطيب خبرتها 21 سنه او أكثر في مجال التجميل كانت تشتغل في مستشفى الحبيب وبعدها استقلت بعيادتها الخاصه في الاطباء الاستشاريون وهذا الي خلاني ما اتردد اجرب "تنظيف" البشرة عندها لطول خبرتها و خصوصا ان صديقتي المقربه جربتها + بلوقر اثق فيها حكت عن تجربتها معاها سناب تشات فقلت ليش لا اجرب مادام انها دعتني وانا محتاجه لهذا التنظيف في الفتره هذي !
اتذكر في أول موعد رحت لها سألتها ليش عرضتي علي هذي الخدمه ؟ قالت انو البنات الي تعالجهم من سنوات في بدايتها هم الي يعرفونها وكبرو صارو امهات فيجيبون بناتهم معاهم يعالجون عندها فعلاقتها مع مرضاها محدود وهي الي تعرفهم من سنين ومكمله معاهم علشان كذا حبت توسع  من معرفتها بحيث تخلي اسمها وعيادتها معروفه للجيل هذا فتفيد وتستفيد وطبعا اقرب مكان وأسهل طريقه هي التعريف من خلال السوشل ميديا..  

في عيادتها تقدم خدمات كثييييرة غير تنظيف البشره مثلها مثل اي خدمة تقدمها عيادات الجلديه لكن الي شدني وكتبتها حتى ارجع لها بعدين لو احتجت لها ، مثل :
  1. علاج الحبوب وآثارها.
  2. تفتيح الأماكن الداكنه مثل الركب و الأكواع.
  3. تنظيف بشره.
  4. جلسات اعاده نضاره وحيويه وتفتيح البشرة (تقول كثير يجونها علشان هذي الخدمه)
  5. علاج مشاكل الشعر و التساقط عن طريق حقن الفيتامينات او بلازما الدم.
  6. فرد او بروتين للشعر.
  7. توحيد لون الجسم.
  8. اقنعه نضاره مثل قناع الذهب و قناع فيتامين C و الكولاجين و الشاي الأخضر.
  9. جلسه نضاره عن طريق التغذيه بالجهاز او عن طريق الحقن.
  10. برنامج العروس يتضمن جلسات علاجيه على حسب الحاله وجلسات عنايه 3 جلسات قبل الزواج تتضمن الأعشاب الطبيعيه و التقشير الكرستالي لكامل الجسم وقناع الذهب.
  11. وغيرها من الخدمات الكثيره بإمكانكم تتصلون عليهم وتستفسرون.



رقم العياده + الموقع :
مثل ما قلت قبل حاليا مستقله في عيادتها الخاصه عند الاطباء الاستشاريون هنا ورقم التواصل للحجز او الاستفسار على : 00966581121337


نبذه عن بشرتي ، مختلطه / دهنيه (وحساسه بمعنى انو على طول تتجمع فيها الأوساخ تحت الجلد ويبغالها عنايه عميقه ومستمرة) .. فيها رؤوس سودا خفيفه اقدر اتحكم فيها وانظفها في روتيني اليومي ، مافيها حبوب لكن كل فتره وفتره تطلع لي كم حبه تكون كبيرة واذا راحت تركت أثر علشان كذا بشرتي فيها آثار والمشكله الكبرى الي اعاني منها هي دهون تحت الجلد ومشكله هذي الدهون انها مستحيل تروح من نفسها لازم أحد يطلعها سواء كانت انتي او احد غيرك طبيبه مثلا ! وعموما حتى لو بشرتك كانت "مثاليه" حلو كل فتره وفتره تسوين تنظيف عند اخصائيه حتى تظل بشرتك جميله ونظيفه طول عمرك العنايه المنزليه وحدها ما تكفي ابدا ومن تجربه شخصيه مهما دفعتي على منتجات وكريمات لازم تسوين تنظيف عند احد مختص في النهايه له خبرته في هذا المجال وراح يفيدك..

الخطه كانت اني فقط اسوي تنظيف بشره وللأمانه ما همني لونها ولا الاثار ولاشي غير اني اتخلص من دهون تحت البشره لأني اعاني منها سنيييين ما تتخيلون قد ايش مزعج ملمس البشره ما يكون موحد ومع الفاونديشن وغيرها تبين مو مستويه تقهههر وتحسبوني ما سويت لها شي ؟؟ لا والله رحت لمليون عياده ومليون طبيبه من الغالين والرخيصين ولا وحده منها فادتني كلهم ياخذون مبالغ كبيره ويكتمون بشرتي بكريماتهم ارجع البيت الاقيها اسوء من قبل علشان كذا استسلمت ابحث زياده لكن ربي جابني لهذي الدكتوره ما ندمت اببدا اني وافقت على عرضها ، شوفو كيف دهون تحت البشره تلعب دور كبير في الملمس (ممكن ماهو واضح لكن ترا كل المسام الي في الصوره عباره عن دهون داخليه اذا تنظفت تروح) :



ملاحظه مهمة :
طبعا هذي تجربتي شخصيا بشرتي انا يعني مو شرط النتيجه تكون نفس نتيجتك ولاهو شرط الوقت الي تبين فيه النتيجه تكون مثلي كل وحده وطبيعه بشرتها وتقبلها للعلاج ،، انا جربت الخدمات الي بقول لكم عنها تحت باقي الخدمات الي تقدمها الدكتور في العياده ما جربتها لكن لو جربتها ممكن الاقي نتيجه مثل ما لقيت نتيجه في بشرتي فرجاء اذا سويتي خدمه ثانيه غير الي ذكرتهم تحت وما لقيتي نتيجه لا تحطين اللوم علي ! طبيعي انا ما جربته ولا كتبت عنه واصلا ممكن لو جربته وضحت النتيجه عكسك لأن جلدي غير جلدك وجسمي غير جسمك ما يتقارنون اساسا ♥

الأسعار ؟
مثلا تنظيف البشره حدود 600 بعد الخصم يصير حدود 400 < لمن رحت لموعدي الأول طلبت منها خصم لمتابعاتي واعطتني ولمن رحت لموعدي قبل كم يوم حكيت لها عن مشكلتكم في الأسعار قالت لي راح تراعيكم ولا تنسون تقولون لها انكم من طرفي حتى تعطيكم خصم 20%  لجميع خدمات العياده واذا تبغون خصم زياده تكلمو اطلبو منها ، وعندي ملاحظه في حياتهم عموما يا بنات انتي رايحه ودافعه ليش تستحين تسألين عن المشكله او تتفاهمين بالسعر ؟ هذا حقك والكلام مجاني تكلمي قولي ليش كيف وين متى اعرفي ايش قاعده تسوين حتى لو ان الشخص ثقه لا تروحين وانتي على عماك اسألييييييي اسألي منتي خسرانه الشخص الواثق والي يسأل يشيلون همه وهذا المطلوب في كل شي سواء كانت عياده او محل او غيرها اسألي لا تستحين !! تجيني تعليقات كثيره الايام الي فاتت انو نستحي نسأل ليييييش ؟😭


عيادتها نسائيه 100% المبنى قديم والعياده مرتبه وصغيره لكن فاضيه مافيها زحمه كل وحده تجي على وقتها حتى ما تنتظر ويروح وقتها على الفاضي ، المواعدي الي فاتت كلها ماكن فيه الا انا اذا جيت على موعدي لكن في رابع موعد كانت شوي زحمه مواعيد ،، الدكتورة و المساعده حقتها بس في العياده يعني المكان ججدا مريح تحسينك في بيتك ويضيفونك مشروب ولو ما قدمو لك اطلبي راح يقدمون نفسيتاهم حلوة ويتعاملون معك براحه ♥ 




موعدي الأول تاريخ 24 ديسمبر 2016 :
في الموعد الأول والي هو "إستشارة" قابلتها وسلمت عليها وبدينا نحكي عن بشرتي بعد ما عرفتني على نفسها وعلى عيادتها والخدمات الي تقدمها ولو متابعيني سناب اكيد شفتو العياده ومرفقاتها .. قلت لها عن مشكلي وهنا نقطه مهمه لازم تنتبهون لها ، الدكتورة ممكن ما تنتبه لكل شي يعني انا عندي حبوب صغيره جددا ما تبين في اماكن صغيره معينه  لمن قلت لها عنها عالجتها لو بنت غيري عندها نفس المشكله وسكتت ممكن ما تنتبه لها الدكتوره وتطلع البنت زعلانه انها ما لقت نتيجه انا لاحظت كل ما قلت لها عن المشاكل وحددت لها الأماكن او وصلت لها مشكلتي بشكل اوضح كانت النتجيه افضل فأنتي لمن تروحين خلي عندك صورة كامله عن الي تبغينه واطلب منها وهي راح تعطيك رأيها واستشارتها والقرار في الأخير راجع لك.
قلت لها عن مشكلتي في بشرتي وسردت لها كل شي ابغاه وقتها فحصت بشرتي في الغرفه الي تحت بجهاز مكبر وقالت لي بشرتي مشكلها اكبر من انو تنظيف فقط وللإمانه هنا لفتتني امانتها وانها قالت التنظيف لوحده ماراح يفيدني في هذي الحاله لو غيرها من العيادات بتقول الجلسه مجانيه نسوي لها تنظيف اي كلام ما يبغون يخسرون < صارت لي قبل من سنين وذميتهم في انستقرام لأن هذا الحق ! ماراح اكذب واقول شغلهم حلو وهم فاشلين :/ صارت مشاكل في الكومنت من المتابعات مالها داعي فحذفت الصورة مع انتي الحين ندمانه ليش حذفتها ! عموما اتصلو بعدها يبغون يعيدون الجلسه بس ما رجعت لهم أكيد!! 



قالت لي مشكله بشرتك ماهي فقط في حبوب تحت البشره ، بشرتك فيها آثار خفيفه و بهتان لون او لون مو موحد مع باقي جسمك ! متخيلين يعني بشرتي اغمق من باقي جسمي :( ، حاولت تبدا بالتنظيف لكن ما نفع الرؤوس حقت الدهون قاسيه قالت بشرتك حاليا سميكه ولو بدأت بالتنظيف ماراح تكون النتيجه مثاليه مثل ما احنا نبغاها علشان كذا راح نبدأ في علاج لون وآثار البشره بالتقشير بحيث تروح الطبقه الأولى الميته والسودا منها فيتوحد اللون وتختفي الآثار والأهم من هذا تصير البشره  لينه فيسهل تنظيف الدهون تحتها ،، مسحت كامل بشرتي والرقبه بمناديل مطهره او الكحول الطبيه او المسحات الطبيه عموما حتى تكون البشره نظيفه خاليه من كل الاوساخ وحطت لي كريم من عندها على كامل الوجه نزولا للرقبه وقالت لي اتركه 4 - 5 ساعات وبعدين اغسله بمويه بارده فقط  بدون مقشر ولا تونر ولا صابون ولاشي بس مويه (طبعا نقطه مهمه : كل المنتجات الي تستخدمينها في البيت تتكنسل يعني خلطاتك ومقشراتك وغيرها في البيت الغيها والا اساليها اذا ينفع تكملين عليها غالبا اذا المنتجات طبيه بتكملين عليها) ولا تستخدمين بعدها اي شي لا كريم ولاغيره في هذا اليوم ، وفي الصباح اغسلها بغسول وارطبها واحط واقي شمس الخطوات هذي مهمممه  ووصفت لي كريمين اقل ما يقال عندهم بعد ما جربتهم انهم سحريين ههههههههههه 50% من الفرق في بشرتي كان منهم (ولعلمكم لحد الحين استخدمها ما وقفتها) ،، رقم 1 ورقم 2 واحد للتفتيح والثاني تقشير او شي زي كذا ما اعرف والله هي اعطتني هم وقالت استخدميهم بالتناوب يعني يوم 1 ويوم 2 بدايه من اليوم الثاني يعني اول يوم ما حطيت شي لأنها هي حطت لي كريم من عندها ومن بكره الليل بديت بالكريمات لحد لموعد الجاي بعد اسبوعين حتى تتقشر البشره ويصير الي قلته فوق من توحد وتفتيح لون وآثار ويسهل التنظيف و نكمل الباقي ، ورسمت لي خطه علاج بدايه من التقشير للتنظيف و التطهير وغيرها (كلاما بس يعني مو ورقه وكتابه لا بس هذا احتمال العلاج الي بيصير او صار) ..





شايفين ،، استخدم اثنينهم بالتناوب ، رقم واحد اخف على البشره ومافيه ريحه وقوامه كريمي ورقم 2 اقوى ونبهتني ما يقرب من العين او حولين الفم وريحته شووي مزعجه وقوامه ماهو كريمي تحسين في كتل مع الدمج تذوب .
اول يوم ماصار شي بشرتي ما تغيرت لكن من ثاني يوم بدأت القشور تطلع في الأماكن الحساسه مثل حولين الأنف و الفم وكل ما تزيد الايام تبدا المناطق الأقوى تتقشر مثل الخدود و الجبهه والباقي ، بشرتي خلال وقت التقشير ..... طبعا كل مالها تزيد القشور هذا كان في اول اسبوع:






اماكن الحبوب والآثار يتقشر وحولين الفم و الانف وأعلى الخد عموما كل بشرتي كان فيها قشور كبيره وقشور خفيفه ،،
اختياري لوقت العلاج كان ممتاز واعتبر نفسي محظوظه لأني بديته قبل الفاينلز مافيه جامعه ولا مناسبات ولاطلعات يعني ماراح اقابل احد وهذا انسب وقت لأن منظر البشره مقرف وطبقات الجلد تطيح بس ما اكذب اني طلعت مع صديقاتي المطعم وبشرتي كذا ههههههههه عموما اختارو وقت مناسب لو كنتو مثل حالتي ووصفت لكم الدكتورة المقشر لعلاجكم لأن بجد ما ينفع تقابلين احد ممكن اسبوعين او اكثر على حسب حاله بشرتك.
لما كنت في الموعد حكيت لها مشكله في منطه الصدر تحت الرقبه على طول يعني مكان السلسال في عضمتين الترقوه في عندي تصبغات خفييفه ما اعرف من ايش ! طلبت منها تعالجها وقالت لي امرر الكريمين الي فوق على رقبتي وتحت الرقبه كله وفعلا العلاج ساعد انو يرجع اللون ويوحده مع باقي لون الجسم تثشر الجلد الغامق مثل ما صار في بشرتي ورجع للونه الطبيعي ، ما صورت النتيجه ولا المشكله قبل لأن مالها علاقه ولا جاء في بالي انكم حابين تشوفون لكن لاحظت تغير وفرق كبير وقلت اقولكم لو وحده تعاني من نفس المشكله او شي قريب منه تطلب منها علاج تابع لبشرتها مثلا ... هذا المكان :



القشور الي طلعت في الاماكن الي حطيت فيها كريم من الوجه ونازل كانت مثل الماسك الي ينشال مره وحده فهمتو علي ؟! واضح في الصور فوق ما ينفع تشلينها انتي انتبهي اتركيها هي تطيح من نفسها ،، بالنسبه لمنتجات العنايه الي استخدمتها هذي الفتره كانت عبارة عن غسول افين الطبي الازرق + مرطب سياتفيل + واقي شمس شسيدو (سيئ فيه لون ابيض علشان كذا وقفته وشريت واحد جديد نصحتني فيه من افين راح اوريكم صورته تحت آخر شي) وقفت الماسكات واي منتج عنايه ثاني واكتفيت بهذي المنتجات بالإضافه لكريم العين من كلارنس و فازلين للشفايف وطبعا هذا بعد ما سألتها اذا تنفع والا اغير لمنتجات تناسب علاجي لكن اغلب الي في الصوره تحت طبي فما خالفت... 



موعدي الثاني تاريخ 4 جانوري 2017 :
بعد 10 ايام رحت لموعدي الثاني وقتها البشره تغيرت بنسبه كبيييييره واهلي بدأو يلاحظون الفرق الأكبر كان في اللون الطبقه السودا الي مخليه وجهي شاحب وباهت راحت تماما طلع اللون والوردي والنضر كأني شاربه هايلايتر هههههههههه كيف الوصف بس !! والله بشرتي صايره منووووره ونضره ما كانت كذا من قبل حتى مع روتين العنايه والمنتجات الي استخدمها يعني النتيجه اقل ما يقال عنها خياليه ! ودي اسألها ايش خلطه الكريم المقشر ؟ ههههههه الي تروح تسأل ، الآثار خفت بنسبه كبيييرة خصوصا الآثار الخفيفه والصغيره اما القويه والغامقه تفتحت كثيير لساتها باقيه لكن النتيجه مبينه من الآن انو راح تروح .. وطبعا ما وقفت استخدام الكريمين ليومكم كل مالها وتتحسن النتيجه أكثر لأن لسى باقي كم أثر في بشرتي ،، المهم وقتها هي قالت بشرتك كـ لون جدا تحسنت لكن كـ ملمس يحتاج ننظف ونعالج البشره حتى ما تطلع الحبوب مره ثانيه ، قالت لي صعب نبدأ بالعلاج اليوم لأن البشره بتتعب مع التقشير الي تستخدمينه فاليوم راح ننظيف الدهون تحت الجلد ونغذي البشره وقتها الموعد الجاي تكون البشره مستعده للعلاج "كورس تقشير ثاني" ... في نفس الغرفه فوق حطت لي جهاز البخار هذا :


وتركته مده لحد ما تفتحت المسام وصار الجلد لين بعدها بدأت تشيل الدهون والحبوب فوق وتحت الجلد بإبره اظن للدهون القويه وحديده دائريه للدهون الخفيفه لأني حسيت انها تستخدم شي حاد على الدهون الي ما تطلع فشكيت انها ابره لكن مو متأكده ، اخذت وقت طويل لحد ما انتهت من بشرتي لأن فيه كثير ممكن حتى انتي ما تعرفين عنها لكن مع المكبر حقها تبين ، بشرتي كلها في اول يوم صار في وجهي نقط حمرا وهي اماكن الحبوب الي طلعتها وتخف من بكرة لكن ملمس البشره في وقتها تحسسسن صار انعم بكثير ، بعدها بدأت بالتطهير استخدمت ماسك مهدئ ومطهر ضمان تبقى البشرة نظيفه وتتسكر تركته عشر دقايق ومسحته بمنشفه مبلوله و بعدها حطت لي ماسك/مرطب تغذيه يغذي البشره واستخدمت هذا الجهاز :


عشر دقايق ممكن تمرره على كامل البشره حديدتين بارده وتقرص شوي ما اعرف ليش يمكن تساعد المنتج يتغلل داخل البشره بعدها صارت بشرتي ناااعمه ومترطبه ومنتعشه قالت لي تركه علي بشرتي قد ما اقدر ولا امسحه حتى تستفيد من الكريم او الماسك هذا فطبعا م استخدمت كريمين التقشير الي فوق في هذا اليوم (الكريم الي حطته يخلي بشرتي صحيه ورططبه وحلوه استخدمته لي مرتين مره في هذا الموعد ومره في الموعد الرابع وكل مره ارجع يقولون لي اخواتي حلوه بشرتك اسأليها عن المرطب وشكلي راح اسألها عنه موعدي القادم ان شاءالله وأقولكم وين ينباع للي حابه تجربه)، انتهينا من جلسه اليوم ووصفت لي كريم ثالث للحبوب او الـ Acne  الي موجوده في بشرتي ، مو الآثار لا الحبوب الي يكون لها راس ، بحيث الليل اكمل على الكريمين الي قبل رقم 1 و 2 وفي الصباح اغسل بشرتي وارطبها واحط الكريم هذا فوق الحبه فققققط مو على كامل الوجه (بعد ما ارطب احب امسح رأس الحبه بكحول حتى اشيل المرطب منها وبعدين احط الكريم الي تحت حتى يكون فيه مفعوله اقوى)


قوام هذا الكريم اخف زي المحلول استخدمه بقطنه صغير على الحبه كل صباح.
ولأني حسيت ان العلاج عندها جاب نتائج قررت اكمل وأعالج ظهري ، آثار حبوب قديمه وتوحيد لون ، استخدمت كريم حطته لي وقالت اتركيه لمده 6 ساعات وبعدين غسليه وداومت على هذا الكريم الي وصفته لي يوميا لحد الموعد الجاي يعني نفس الي سويناه للوجه بإختلاف المنتجات ،، كريمات الظهر اقوى من الوجه لأن الجلد في هذي المنطقه اسمك ويتحمل :



مبسوطه جددا اني عالجت عندها لأن النتائج تبشر بالخير وهي انسانه رااائعه بشوشه وتسمع لك وتشتغل بضمير تحاول قد ما تقدر توصل للنتيجه المثاليه الله يسعدها ♥♥

موعدي الثالث تاريخ 8 جانوري 2016 :

بعد اربعه ايام من الموعد الي فات رجعت للعياده حتى نبدأ بالجلسه العلاجيه ما اخذت وقت ابدا ممكن عشر دقايق ، الي صار انو الفتره هذي فتره ضغط وتوتر من الفاينلز فطلعت لي كم حبه تحت الخد ، استخدمت لي محلول "ايزي بيل | Easy peel" محلول خفيف زي المويه بللت فيه قطنه ومسحت كامل وجهي فيه وركزت أكثر على مناطق الحبوب و الآثار يحرق البشره ويقرص ويضايق اول خمس دقايق وبعدين يبرد ويروح الشعور المزعج قالت لي هذا المقشر راح يشيل بقايا الآثار ويخفف من الحبوب ويطلع لك قشور وبريه على الأماكن الي لا تزال متضرره حتى يشيلها وراح تبدأ تبين من ثالث يوم وفعلا ثالث يوم بدأت القشور لكن هالمره اصغر واكثر وبر يعني :




طبعا فيه نقطه مهمه طوال فتره علاجي من اول موعد ما تعرضت للشمس اببدا واذا تعرضت اكون حاطه واقي شمس انتبهو بنات ترا اكبر عدو للبشره وقت التقشير هي الشمس لانها تغمق اللون والآثار وتنقلب مشكله أكبر وعلاجاها ياخذ وقت طويييييل.
ماكان فيه شي مؤكد بعد موعد اليوم لكن قالت لي تعالي الموعد الجاي ونشوف ايش راح نسوي .. مع الاستمرار بالكريمات طببعا ما قطعتها ولا شي.

سألتها اذا خلال وقت العلاج مسموع الميكب ؟؟! 
قالت اصلا وقت التقشير ماراح يبين حلو الميكب عليك بيصير مقشر وواضح ومنظرة سييئ وفعلا كنسلت كم ايفنت و مناسبه في فتره التقشير بسبب القشور هذي لكن مافيه ضرر لو استخدمتي فاونديشن في فتره العلاج لو احتجتي.


الموعد الرابع تاريخ 31 جانوري 2017 + النتيجه :
مرت فتره طويييله على الموعد الي فات وللأمانه الفتره هذي بعد موعد ايزي بيل كانت النتيجه في بشرتي الأفضل من بين كل العلاج الي سويتها لحد اليوم يعني اكيد تغيرت بشرتي بعدها وللحين مكمله على مواعيدي بس حبيت اقولكم انو موشرط النتيجه تدوم مثاليه لان البشره تتغير بتغير الهرمونات والجو والعوامل الخارجيه عموما فلا تزعلون الفرق الي فرقته الحين انو فيه اثار لللحبوب الجديده الي طلعت لي قبل اسبوع ماراح للحين والا لون وملمس البشره لازالو مثل ماهم مثاليين   ،، الي لاحظته لحد الحين :

  • اللون : تحسن بنسبه 100% راحت الطبقه الأولى صارت البشره أكثر نضاااااره وحيويه وموحده كثيير حوليني فرقو وقالولي محلوة بشرتك خصوصا الخدودد صارت ورديه منوره احس بشرتي صحيه وهيلثي مررره مبسوطه باللون الحمدلله كأنها بشره بيبي شي كنت فاقدته من زمان حتى مع روتين عنايتي وماسكاتي !! يغني لو ماطلعت من العلاج هذا كله الا اللون انا راضيه لحد يومكم والنتجه ولون البشره يحلى أكثر ♥.
  • الملمس : 90% تغير ملمسها صارت انعم بكثيييير من قبل البشره صارت طبقه او ملمس واحده مافيها بروز الحبوب مثل قبل لكن فيه مشكله صغيره راح اذكرها الحين.
  • الآثار : 90% اختفت باقي بس 3 آثار خفيفه باقيه من حبوب كانت آثارها غامقه متفرقه تحت الخد قاعده اعالجها  للحين لكن الحمدلله خفو كثيييير عن قبل يعني في تطور.
  • الدهون تحت البشره : 50% وهنا المشكله الي تأثر في ملمس البشره فوق ، على اني وقفت كل شي استخدمه من كريمات و ماسكات واستخدمت المنتجات الي وريتكمم هي فوق مع موافقه منها انها تناسب بشرتي الا انو لاحظت خلال شهر بدأت ترجع الدهون تحت البشره وبالذات في منطقه الخدود وفعلا رحت للموعد وكشفت وقالت صدق الدهون رجعت يبغالها جلسه تنظيف ثانيه هو شي طبيعي ترجع يعني كذا الحياه ايش نسوي ههههههههه لا بس جد يعني طبيعي ترجع من التغيرات في البشره وغيرها  بس ما توقعتها بهذي السرعه ترجع ! يعني على الأقل توقعت 6 شهور ما تطلع ، سألتها عن السبب الي يخليها ترجع ؟ قالت انتي طبيعه بشرتك كذا لكن فيه عوامل خارجيه تزيد منها مثل الأكل الدهني ، الدوره مو منتظمه ، هرمونات ، كريمات ما تناسبك قاعده تستخدمينها يعني اسباب ما تخلص وكل ما سألتني عن شي قلت لها لا والنتيجه انو طبيعه بشرتي كذا حساسه فرجعت الدهون بالإضافه الى كم حبه في منطقه الخد :/ ما اعرف ايش سببها بس اظن مثل الحبوب الي تطلع لي كل فتره وفتره يعني مو شي جديد ما تفاجأت فإلي صار في موعد اليوم انو الدكتوره رجعت سوت مثل ما سوت لي في الموعد الثاني ، استخدمت البخار وبعدها بالابره اوالحديده طلعت الدهون كلها واستخدمت ماسك مطهر وبعدها مرطب مغذي مثل الي قلت لكم عنه فوق في الموعد الثاني بس بدون الجهاز سوت مساج وخلاص وطلبت اتركته لأطول وقت ممكن حتى تستفيد البشره منه وطبيعي ما استخدمت كريمات التقشير في هذا اليوم والصباح اداوم على كريم الحبوب على الحبوب الجديده والليل ارجع اكمل على كريمات التقشير ، لاحظت الفرق الأكبر يصير بعد التنظيف لأن اللون اساسا صار حلو من البدايه ما تغير ولا رجع غامق ومع التنظيف صارت البشره صحيه ومتفوخه او Plump .
خلال موعدي طلبت منها تنصحني بمرطب وواقي شمس جداد غير الي عندي لأني ما حبيت الواقي الي استخدمه ولا كريم سياتفيل احسه شووي ثقيل على بشرتي الدهنيه واثق في رأيها والله يسعدها وصفت لي نوعين واقي  قالت خذي المتوفر منهم واخترت واحد منهم بنصيحه الصيدلي انه الأفضل ووصفت لي مرطب يومي ، صورتها سناب وكثير كبتشروها قلت ممكن تستفيدون منها لو محتاجين منتجات جديده :



لحد الحين راضيه جددا بالنتيجه ومبسوطه ببشرتي والله فيها نضارة ونعومه وجمال ماشفته قبل مع كثره تجربتي للمنتجات ! والسبب الاساسي راجع للمقشر الي وصفته لي مع التنظيف طبعا صايره بشرتي منووره كأني نايمه عشرين ساعه ♥ صرت اطلع بدون فاونديشن او حتى كونسيلر ما احتاجهم الحمدلله الآثار كلها اذا مو معظمها اختفت من بشرتي ماعاد بقى الا الخفيفين والحين يخفون زياده مع العلاج لكن هذا ما يعني انو بشرتي صايره كأني حاطه فاونديشن !! طبيعي لا واضح انها بشرتي فيها لون طبيعي زي النمش مثلا ماهي لون واحد نفس الدرجه < مافيني بس ابوصل لكم فكره انو طبيعه البشره صارت افضل لكن ماهي فوتوشوب يعني في المناسبات طبيعي راح احط فاونديشن لكني استغنيت عنهم كإستعمال يومي لأن بشرتي الحقيقيه تحسنت بنسبه كبيره ولونها طبيعي خصوصا مع توريد الخدود + ما اعرف اذا ذكرت هذي النقطه فوق او لا لكن لما يتفتح لون بشرتك مايعني انها راح تصير بيضاء لا اقصد انها راح تتفتح وتوصل للون جلدك الاساسي يعني اذا انتي سمراء لا تتوقعين بتصيرين فاتحه ! لكن بترجع بشرتك تتفتح وتتساوى مع لون جسمك وكذا ، والأحلى من هذا الحبوب الي اعاني منها من سنييييييين تحت الجلد كلها كللللها اذا مو 90% راحت صارت البشره مستوى واحد مافيها حبوب مزعجه ولو انو الدهون رجعت مع تنظيف الموعد الرابع راحت ولو رجعت برجع انظفها عندها اكيد ان شاءالله .
فرقت فرق خلاني اوقف ابحث عن عيادات غيرها خلاص بإذن الله راح اكمل علاجي عندها واكمل عنايتي الدوريه عندها مره وحده وصلت او قربت اوصل للنتيجه المثاليه الي ابغاها (نتيجه طبيعيه مو سحريه يعني خلينا نكون واقعيين لا تغركم صور المشاهير وبشراتهم انتي قيسي على نظام اكلك وعنايتك وطبيعه جسمك وغيرها) ♥♥

اما بالنسبه لظهري للحين ماشيه على الكريم وفرقت طبببعا صار فيها قشور مثل الوجه  وانشالت الطبقه الغامقه والآثار وفتح لونها يعني نفس الي سويته لوجهي ،، واضح لي مع الاستمرار راح تبين النتيجه أكثر بإذن الله لو فيه معلومات زياده او تحديثات ثانيه راح اكتبها واقولكم عنها في انستقرام ♥ اتمنى تكونون استفدتو من تجربتي ولا تنسون تشاركونها مع اي احد ممكن يستفيد من التدوينه 

النتيجه في تاريخ 12 فبراير 2017 :
قلت احدث لكم بالنتيجه الي اشوفها لليوم اذا فيه شي تغير او لا ،، بعد موعدي الاخير مع استمراري بكريم 1+2 ،، ما كانت تطلع لي قشور في بشرتي حتى مع استخدامهم لكن فجأة صحيت يوم الاحد لقيت قشور كثييره ارتعت من وين طلعت فجأه !! لكن يومين وخفت و راحت يعني اليوم راحت القشور تماما اتوقع متى ماكان فيه تصبغات ولو خفيفه تتقشر البشره حتى تتفتح مره ثانيه.. ، اللون لا يزال موحد ونضر الحمدلله والملمس ناعم وما رجعت الدهون من آخر تنظيف ، لكن الشي الوحيد الي باقي هي الثلاث آثار قاعده تخف لكن ما راحت :/ شكلها بتاخذ وقت لان نتيجتها بطيئه عكس الآثار الخفيفه الي كانت فيني بالبدايه وراحت ، عموما نهايه هالاسبوع عندي موعد عندها وبإذن الله بس اذا فيه شي تغير او تحديث ثاني راح ارجع اكتبه هنا 

تحديث عن بشرتي + موعدي الخامس 8 مارس :
الحمدلله مرة مبسوطه ببشرتي اقدر اقول انها احلى فترة لبشرتي في حياتي ، اللون متوحد مافيه ولا اثر لأي شي والملمس نااااعم هذا غير النضاره الي بديت الاحظها قبل فترة وجهي منور ولا طلعت لي حبوب من فتره بسس الحق بشرتي ما تطلع حبوب الا نادر الحمدلله ،، مر شهرين ونص وللحين النتيجه اقل ما يقال عنها مثاليه ♥ 
اخر موعد رحت له قبل موعد اليوم كان قبل شهر تقريبا وحسيت كأن فيه دهون خفيفه تحت بشرتي رجعت ولو تتذكرون فوق قلت لكم انو طبيعه بشرتي دهنيه فالدهون تحت البشره ترجع بشكل أخف لكن يحتاج لها تنظيف وهذا الي صار رحت اليوم وكشفت على بشرتي قلت انها متحسنه كثير لكن يحتاج نسوي جلسة تنظيف وعلى فكره للحين مكمله على كريمات التقشير الي فوق ما وقفتها لكن ماعاد تطلع لي قشور بس حتى يدوام على النتيجه بأمر عنها طبعا.
المهم بعد ما كشفت على البشره وقررنا نعمل تنظيف ثاني بدأت بغسول ومقشر اعشاب حتى تتأكد من نظافه البشره وبعدين شغلت جهاز البخار حطيت صورته في انستقرام لمده ربع ساعه تقريبا وجففت البشره بمنشفه وبدأت بالتنظيف استخدمت الحديده الدائريه ما اعرف اسمها لتنظيف الدهون الي تطلع بسهوله و ابره للدهون القويه ما اخذ 10 دقايق وخلصنا لان مافيه كثير وقالت لي انو هذي المره التنظيف وكميه الدهون اقل من الي فاتت بكثير وهذا شي زين أكيد ،، استخدمت مقشر جاف يعني تقشره على البشره بحركه دائريه وهو راح يجف ويروح بعدها غطت عيوني وفمي بقطن وحطت قطعه قماش وفوقها ماسك أعشاب كمنتج عنايه وتنقيه البشره والحفاظ عليها بعد التنظيف يعني زي كذا صار شكلي :



بعد 15-30 دقيقه ممكن شالته ورطبت لي وجهي وتركت المرطب علي في الليل ،، وجهي وقتها كان مترطب ومحمر شوي من التنظيف صاير فيه نقط مكان الدهون الي نظفتها لكن اليوم الصباح لكن قمت وغسلت فرقت فرررق وجهي منور خصوصا النضاره ونعووومه حتى اخواتي ملاحظين صار فيها لمعه هيثلي جلو والحمار راح بس بقي خفيف على الأماكن تخف تدريجيا يومين يمكن وتختفي ،، طبعا ما اطلع الا بمرطب وواقي شمس حتى ما تقلب النتائج عكسيه انتبهو ،، راح اكمل على التنظيف كل شهر لو احتجت موعدي الشهر الجاي في ابريل ان شاءالله .
بالنسبه لظهري اقدر اقول بدأ يتوحد لونه وخفت الآثار بنسبه بيييسطه 30% بس للأمانه احس هالتغير مازاد بسبب اهمالي لأن الكريم خلص مارحت آخذ يعني وقفت العلاج بنفسي ههههههههه زين شفت نتيجه اصلا بس عموما نبهتني في موعدي وقالت اذا خلص تعالي خذي لا توقفينه على كيفيك .. اعطتني كريمين البشره حقات التقشير لأني خلصت الي عندي + كريم ظهر علبه جديده نفس الي قبل راح اكمل عليها لحد الموعد الجاي وممكن شهر ثاني بعد لأن ما تبين النتيجه ونشوف ان شاءالله .. ككل جدا مبسوطه بالتغيرات ونصيحه لا تلفون وتدورون على عيادات ما سمعتو عندها ولا جربتوها قبل اما روحو عند وحده تعرفونها أو عند الدكتوره ناديه من تجربتي هي الأفضل من بين كل رحت لهم قبل وشخصت بشرتي زين وعرفت المشكله وحلتها من الجذور لكن انتم يبغالكم صبر لأن البشره ما تبين نتائجها بسرعه اعطوها على الأقل شهر لو ما كانت سيئه وتطول المده بحاله بشرتك .


تحديث عن بشرتي + موعدي السادس 11 ابريل :
اهلا اهلا ،، صارلي اكثر من 5 شهور تقريبا من بدأت علاج و النتائج بجد خيااااالية الحمدلله بشرتي صارت جميييلة ،، الموعد هذا بعد اكثر من شهر عن الموعد الي قبله ،، رحت اليوم وانا في بالي مافي تغير للأسوء في بشرتي من الي احس وأشوفه بعيني ولمن كشفت على البشره بالمكبر قالت فيه كم حبه دهنية خفيفه على اطراف الجبهه و شوي على الخد فراح نعمل تنظيف بشرة وهذا الشي قلت لكم عنه قبل انو تقريبا راح اعمل تنظيف بشرة بشكل دوري كل شهر اذا احتجت ،، استعملت غسول لتنظيف الأوساخ من سطح البشرة بالأول بعدين مقشر للجلد الميت وبعدها بخار كم دقيقه لحد ما يلين الجلد ويسهل التنظيف وفعلا ما أخذ منها تنظيف البشره أكثر من 10 دقايق لأن مافيها كثير الحمدلله مع الاهتمام و الحضور الدوري تحسنت البشرة بنسبه كببييييرة جدا جدا .. بعدها استخدمت قناع مثل الموعد الي فات بالضبط غطت عيوني وفمي بقطن وحطت قطعه قماش وفوقها ماسك أعشاب كمنتج عنايه وتنقيه والحفاظ عليها بعد التنظيف شوفو الصوره فوق .... ورطبت بشرتي بعدها بالكريم الي قلت لكم قبل انو مرره حلو بس استحيت اسألها هههه والحمدلله مرة مبسوطه احس بالنظافه من الداخل بجد فيها نضاره ونعومه جمييلة وطبعا بعد التنظيف راح تكون البشره حمراء وفيها نقاط مكان الدهون الي نظفتها وهذا شي جددا طبيعي كم ساعة وراح تخف بإذن الله ..... اما بالنسبه لظهري تحسن بنسبه 80% الآثار خفت بشكل كبير والتصبغات القديمه اقدر اقول راحت لكن راح نكمل العلاج حتى نحصل على النتيجه المثاليه مثل البشره ، استخدمت كريم لمده 6-7 ساعات وبعدها يغسل واعطتني كريم الظهر نفس الي فوق القديم من بدايه علاجي لأن خلصت علبتين لحد الحين وراح ابدأ بالثالثه ان شاءالله يوميا لحد الموعد الجاي ... نرجع للبشره "وجهي" راح نعيد التقشير الي عملته قبل خمس شهور لو ترجعون لبدايه التدوينه حكيت عنه هو الي يطلع القشور حتى نطلع جلد جديد ونحافظ على النتائح لأطول وقت فهذا الشي ينعمل بشكل مكرر كل فتره وفتره لكن بما انو عندي جامعه قررنا نأجلها لرمضان وقت الإجازه حتى ما اتعرض للشمس كثير ولا اقابل احد ان شاءالله ومره وحده قبل العيد يعني عصفورين بحجر هههههههههه وبس والله بالنسبه لكريم رقم 2 و 1 مكملة عليهم لكن بما انو حراره الجو زادت قالت لي الدكتوره قللي منه حتى ما تتهيج البشره وتتحسس فيصير يوم رقم 1 ويوم ترم وبعدين يوم رقم 2 ويوم ترك وكذا .

موعدي السابع 24 ماي :
طبعاً الحمدلله العلاج معاها نتايجة ايجابية جدداً تغيرت بشرتي للاحسن صار لونها متوحد مافيها آثار ولا تصبغات ،، مافيه حبوب ولا دهون تحت البشرة مع الالتزام بتنظيفها شهرياً عندها + وصفت لي كريم مخصص للآكني الحبوب الي تطلع بين فترة وفترة ومجرد ما احطه من بكرا تختفي .. المرة هذي رجعت اعيد التقشير حتى تجدد خلايا البشرة وتعطيها نضارة اقوى قبل المناسبات الجايه في رمضان او العيد لان واضح العلاج فيها وكثييير يسألون كيف تغيرت بشرتي للأحسن صايرة كأني حاطك ميكب مع انها طبيعيه .. قالتلي كثيير استفادو من خصمي منكم ومن البلوقرز والحمدلله الاغلب طلع بنتيجة 😍 انا عالجت بشرتي وظهري والحمدلله كلهم تمام . 
حطت لي كريم التقشير لمدة اظن 4 ساعات ومن بكرة اكمل على الكريمين رقم 1 و 2 وبإذن الله اكتب لكم عن النتيجة في الموعد الجاي .




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك 8 تعليقات:

Maria Ali يقول...
أزال المؤلف هذا التعليق.
Maria Ali يقول...

ماشاءالله تبارك الرحمن، حبيت الدكتوره وشغلها من كلامك ☹️ انا بشرتي نفس بشرتك بالزبط وتقريباً عندي نفس المشاكل.. بس حالياً دوام وجامعه يعني مستحيل افكر اتعالج معا هاذي الشموس 😆😭 حمشي نفسي بالكريمات الين تجي الصيفيه 😍 يارب الاقي دكتوره رهيبه كذا ف جده .. وشكرا لك عالشرح الوافي وشكرا ع صورة الواقي والكريم حروح اشتري نفسهم بما انو نفس البشره☹️💕 I love u ♥️ ودمتي بخير

Najla Mohamad يقول...

ماشاءالله تبارك الله مرة حبيتها من كلامك وبروح اسوي تنظيف بشرة

Noura يقول...

اكثر تدوينة منتظرتها من اول موعد لك اخيرا نزلت 😍😍 ماشاء الله تغير جمييل جدا! اعاني من نفس المشاكل اللي تعانينها فمره تحمست اروح للدكتورة واعالج بشرتي عندها 😩👌 شكرا غادة مرررره كلام وافي جدا جدا جدا الله يكتب اجرك يارب ويثيبك ❤️❤️❤️

Mona Al Amry يقول...

عليك بالعافيه وتسلم يديك من جد استفدت 😘

dora sa يقول...

سمعت فيها لكن ماعرفت هي طبيبة او اخصائية بشرة! التقشير يعطي النتايج اللي قلتي لكن العبره ببراعة الطبيبه متى تحطها ومتى توقفها وعندها تجارب تعرف يناسب او لا..بعد اذنك هل تسوي ديرما بن او لا.. واخر طلب كل جلسه كم تدفعين بالضبط وشكرا جزيلا

Futon Alzubaidi يقول...

ماشاءالله ♥♥
سبحان الله كل كلمه قلتيها لبشرتك كأنك تتكلمي عن بشرتي نفس المعانأه :(
ياريت في جده عندنا أحد بنفس المستوي , والله جربت كم عياده و ماشفت نتيجه بالعكس بشرتي تنعدم أكثر !!

Unknown يقول...

ماشاء الله برافوا عليك ، كنت فاقده الامل ببشرتي بس حمستيني!! طيب ممكن اذا ماعليك امر تذكرين التكلفه ككل ؟!😍💗

إرسال تعليق