الخميس، 23 فبراير، 2017

Sephora Haul | مشترياتي من سيفورا اونلاين !! كيف طلبت ؟؟!✨


السلام عليكم ورحمه الله وبركاته ♥
بعد شهووور من المحاولات للطلب اونلاين من موقع سيفورا وللأسف كلها بائت بالفشل ههههههههههه لو تتذكرون قبل سنتين او ثلاث طلبت من موقع سيفورا الامريكي وعرضت المشتريات في انستقرام لو ترجعون للصور القديييمه راح تلاقونها .
المهم اني رجعت أطلب مرة ثانيه وثالثه وكل مره تكون مرفوضه تنسحب الفلوس وبعد يومين يرجعونها السبب مجهول لكن الأغلب انه العنوان ما يقبلون العناوين الوهميه لشركات الشحن لازم يكون لك بيت في امريكا حتى يقبلون ، واذا طلبتي عن طريق بريد وضبط فهو حظ لا أكثر ولا اقل انا قلته قبل الطلب من سيفورا اونلاين ماهو ثابت مرات يقبل ومرات لا .. وطبعا مع البحث لقيت الطريقه الي اقدر أطلب فيها والحمدلله ضبطت وطلبت ووصلني الطلب وكتبت التدوينه وايش الطريقه ومشترياتي هنا لكن الي صار ان كل طلباتي الي طلبتها بعدها مع استخدام نفس الطريقه كانت تنرفض ولحد يومكم ما عرفت كيف اطلب من موقعهم ...... 

للمعلوميه انا اتكلم عن موقعهم الأمريكي الرسمي مو حق الإمارات لأن حق الأمارات بعد فتره راح يفتحون للسعوديه فيصير بإمكانك تطلبين منه يعني تطلبين من موقع سيفورا الشرق الأوسط ويوصلونه لبيتك في السعوريه اما الأمريكي ما يوصل للسعوديه لازم بريد وحوسه لكن انا ابغى الموقع الأمريكي الي فيه الماركات الغير متوفره في محلاتهم هنا فهمتو علي ؟؟

عموما نرجع لموضوعنا ،، السبب الي يخليني ابغى اطلب منهم هو العروض و المجموعات الي عندهم تكون احجامها صغيره واسعارها حلوه لكن المشكله انها حصريه في سيفورا فإذا ما قدرت اطلب من موقعهم مستحيل تلاقينها في مكان ثاني الا محلهم في امريكا يعني ما استفدنا والا من تاجرات انستقرام فيه كثير يوفرونهم ! 
قبل فتره ما اتذكر كيف عرفت عن الموقع الصراحه لكن لقيت قسم كامل لسيفورا في موقع jcpenney هنا شايفين المربع الأسود في الاقسام ؟



دخلت ولقيت معظم المنتجات و المجوعات متوفره !! يعني انتي لمن تطلبين فاتورتك راح تكون طالعه من موقع جي سي بيني مو سيفورا فماله علاقه ، سيفورا بس ماخذه قسم في الموقع لكن ما حبيت اتحمس بزياده وفي الأخير ما يقبل هذا الموقع زي سيفورا فاكتفيت بمجموعتين مبدئيا واذا ضبط اعتمدته لبعدين ان شاءالله . 


مجموعتين الاولى من جوزي مارن و الثانيه من تارت ولو متابعين مدونتي تارت من الماركات الي احبها وجربتها كثير قبل هنا تدوينه عن مشترياتي من موقعهم وقت الخصم لو حابين تشوفون ايش أخذت وكيف طلبت ؟؟! ،، نرجع لموضوعنا موقع JCPENNEY امريكي واظن يشحن للسعوديه لكن انا ما جربت اطلب اي شي للسعوديه دايركت خوفا من شركات الشحن الي ممكن تضيعيها + لأني طالبه من كم موقع ثاني وحابه اجمعهم سوا في بوكس واحد.

بريدي الأمريكي في ورلد شيب احبهم لأن عندهم خاصيه تجميع الشحنات فلما طلبت من كذا موقع شحنتهم كلهم في بوكس واحد للسعوديه وبكذا يوفر علي قيمه الشحن لكن لو كنت طالبه فقط من موقع واحد استخدم شوب اند شيب اسرع في التوصيل.

الطلب من الموقع عادي سهل زيه زي اي موقع ثاني ، عبيت بيانات البطاقه و عنواني الامريكي بس ، كاتبين في حلول اسبوعين راح توصل (على البريد الامريكي مو للسعوديه لأن مالهم علاقه) وفعلا وصلت في حدود هذا الوقت (كل طلب بعد ما تكملينه ويوصلك ايميل يجيك بجنب البرودكت احتمال تاريخ وصوله فمثلا انا طلبت شحنتي هذي في تاريخ 25/11/2016 ولمن وصلني ايميل كان مكتوب بجنب مجموعه تارت انو احتمال توصل بين 5-7 ديسمبر بينما مجموعه جوزي مارن 30 نوفمبر الى 2 ديسمبر ما اعرف اذا قصدهم توصل منفصلين او لا لكن انا وصلني اثنينهم سوا للبريد الامريكي). 


حبيييت المجموعات التوفيريه الي موجوده في الموقع مرره علشان كذا قررت اجرب منها ،، اسعارها جداا مناسبه والأحلى من كذا انو الشحن مجاني والتاكس بحدود 5$.


من أحب الماركات الى قلبي هي جوزي مارن ،، تعتمد اغلب منتجاتها على زيت الارجان حتى في الميكب ،، اسعارها متوسطه لمرتفعه لكن تستاااااهل خصوصا زيوت البشرة والشعر منهم .
ولأني ناويه على كم منتج منهم من فتره انبسطت لمن لقيت مجموعه تجمعهم وبأحجام صغيره حتى ما ابلش فيها لو ما اعجبتني ، للأسف كنت راح احط لكم الرابط لكن خلص المنتج :( بس كل فتره وفتره ينزلون مجموعات مشابهه وقريبه يعني لا تزعلون لو كنتو حابينه تابعو الموقع وراح تلاقون مجموعات افضل ، كل منتج في المجموعه ينباع منفصل يعني لو تبغون منتج معين تقدرون تشترونه موجود على طول .

السعر : 36$ يعني حدود 135 ريال بس !! ياليت لو الأسعار عندنا كذا ...



المجموعه مكونه من 4 منتجات ، اليسار هو بخاخ مرطب للوجه ما اعرف ايش جاني لكني ادمنت البخاخات الي زي كذا صرت اجرب من كل الماركات ،، احبهم للصباح او وسط اليوم او حتى قبل وبعد الميكب يخلي البشره فرش وصحيه ما اعرف ايش السر لكن لو جربتوهم راح تفهمون علي .. قبل فتره اشتريت بخاخ من كلارنس نفس فكرته نزلت صورته في انستقرام هنا ♥
هذا النوع من جوزي مارن مرطب للبشره ويعطيها نور او نضاره ، خالي من الكحول ومكوناته الاساسيه زيت الأرجان و مويه جوز الهند بالإضافه الى معادن وجذور الكونجا حتى يعطيك بشره ناعمه ومليانه "plump" و خلاصه البرتقال و الليمون كمقشر لطيف للبشره يعني منتج من وصفهم مثالي 100% مرره متحمسه اجربه. 

والمنتج الثاني هو زيت الأرغان طبيعي بدون اضافات 100% اورجانيك جربته قبل الحجم الكبير وخلص كتبت عنه من سنوات في انستقرام مرره احبه ينفع لكل شي سواء كانت بشره ، شعر ، جسم ، اظافر وحتى للأطفال يعني الا ما تلاقين طريقه تستخدمينه ولأن حجمه صغير راح اخذه معاي في الشنطه ان شاءالله ، ترطيبه عااالي ومدعم بفيتامين E ينعم البشره ومع الاستمرار يفتح الجلد ابحثو أكثر عن فوائد الارجان راح يعجبكم ، مناسب لكل انواع البشرة حتى الحساسه و الجافه راح تبدأين تلاحظين فرق من الاسبوع الرابع ان شاءالله . 

باقي المنتجين عبارة عن هايلايتر سائل ما تصدقون قد ايش كنت ابغاه اول ما نزل والحمدلله كان من ضمن المجموعه ، احب استخدم الهايلاترز السائله في الصباح اعلى الخد حتى تعطي منظر طبيعي وصحي للوجه لمن يعكس عليها النور ،، تقييمه عالي في موقع سيفورا وتجارب الناس ايجابيه وهذا الي حمسني عليه ، النوع هذا سائل لونه بيج ذهبي لؤلؤي جميييل على الوجه فيه كرستال او بلورات ملونه تعكس لمن ينزل عليها نور طبيعي جددا على البشره مافيه جلتر ولا شمر واضح يعني مره ناعم ، واكيد زيت الارجان داخل في المكونات ،، تقدرين تستخدمينه لحاله او تخلطينه مع مرطب الوجه او الفاونديشن او اي كريم حابته.

وآخر منتج في المجموعه هو الكريم او "Balm" مناسب لجميع انواع البشره يعالج الجفاف ، البهتان ، المسام ، ملمس البشره .. 
اول منتج عنايه وميكب في نفس الوقت ، 100% زيت الأرجان ومدعم بمنتجات ضد الشيخوخه ، يرطب البشره فورا وفي نفس الوقت يقلص حجم المسام ، يعطي البشره منظر صحي ورطب ، استخدامه يكون بالطبطبه بعد المرطب وقبل الميكب كبرايمر ،، من بحثي حسيت انو منتج جديد علي مافيني صبر حتى اجربه واحكي لكم عنه !  



المجموعه الثانيه من تارت فيها 5 منتجات وكل واحد يقول الزين عندي هههههههههه الكوليشكن هذا "tarte rainforest of the sea" مرره حلو جربت باليت البلشر الي حكيت عنه هنا و الكونسيلر حكيت عنه هنا .
ولمن لقيت هذي المجموعه حبيت استغل سعرها واجرب باقي منتجات المجموعه هذي ،، نفس الشي للأسف مخلصه من الموقع لكن فيه مجموعات حلوه غيرها.

سعرها : 32$ حدود 120 ريال.


اول منتج يسارغسول يومي جل للبشره ومزيل للميكب ضد المويه ، يشيل بقايا الميكب ، الرواسب و الدهون الزايدة في البشره بدون ما يتركها جافه ،من مكوناته خليط من اللافندرو أعشاب ومكونات بحريه بالإضافه الى فيتامين C المسؤول عن نضاره وتفتيح البشره ،الغسول نباتي "vegan" خالي من المواد الكيميائيه  يساعد على تطهير البشره ويعطيها ليونه في الملمس.

4 في 1 ، منتج عبارة عن برايمر ، مثبت ميكب ، مرطب للبشره (نفس فكره الي حكيت لكم عنه فوق من جوزي مارن وكلارنس) و يخلي بشرتك فرش يعيد لها حيويتها. 
المنتج نباتي ، كاتبين انو هذا المنتج يعيد للبشره ترطيبها ونضارتها وفي نفس الوقت يثبت الميكب لأكثر من 12 ساعه ، يعمل كبرايمر ومرطب حتى يساعد بتقليص المسام ، تقليل الاحمرار والانتفاخ في الوجه ومدعم بالهايبوالرجانيك فورميلا < بحثت عن نوع الفورميلا هذا ولقيت انو اي منتج مكتوب عليه معناته انو تركيبته مثبته على انها تسبب اقل حساسيه للأطفال من التركيبه القياسيه او الاساسيه لأن مصطلح الحساسيه يعني حساسيه من البروتين فلما تقرين هايبوالرجانيك هذا يعني انو البروتين قسم او هضم الى بروتينات اصغر وادق لتقليل فرصه تعرضك لحساسيه .. بإختصار انو ما راح يأذي البشره واحتمال بسيط يجيك حساسيه منه فتجربينه وانتي مرتاحه. 

المنتج الي بعده والأقرب الى قلبي هو زيت الماركوجا من خلصت العينه الي عندي وانا ابغى اطلب واحد في اسرع وقت ♥♥ حتى ما يكثر الكلام تكلمت عنه بالتفصيل وعن مكوناته ومميزاته وعن كريم العين من نفس النوع هنا

وآخر منتجين في المجموعه عباره عن :


هايلايتر لؤلؤي جميييييل على البشره جربته امس وانصدمت من جماله في العلبه مبين عادي ما توقعته بهذي النعومه ،، مافيه قطع جلتر ولا شمر واضحه كأنها لمعه بشرتك الصحيه ، حاولت اصور لكم ما يبين في الكميرا لكن بحثت عن اقرب شكل لها في الحقيقه من جوجل لو حابين تشوفون كيف راح تكون مع انها ظالمته بس مالقيت غيرها: 



مدعم بطين الأمازن لتوهج صحي ثابت لمده 12 ساعه ، فيه ذرات لؤلؤ تنعكس لمن يسطع عليها نور ، يوعدونك بأنها تركيبه فريده ما راح تكتل ، تجفف او تخف مع الوقت.




آخرهم روج صبغته عالي بنهايه مطفيه < استغربت لمن قريت مطفيه ! ابدا ماهي مطفيه صايره زي ارواج مات الساتن ،، ترطيبه جميل يذكرني بالأرواج الكريميه لكن ماهو غثيث ويتحرك ويطبع مثل الأرواج الكريميه بالعاده.
مدعم بمضادات اكسده و زيوت وزبده شفايف ، درجه اللون نفسها جميييله ما عندي اي لون مثلها ، كأنها بنفسجي ، وردي ، نود جديده علي وهذي هي الدرجات الي احبها لبشرتي وتليق عليها اسمها Cabana Boy وهي البست سيلر من هذا النوع.

وبس ،، لو حبيتو التدوينه شاركوني تعليقاتكم حتى أكثر منها المرات الجايه ♥ ولا تنسون تشاركوني مشترياتكم لو طلبتو من الموقع ارسلولي صوره منها في انستقرام♥




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك 4 تعليقات:

2 MavenSisters يقول...

جي سي بيني موقع جميل ويوصلون للسعوديه . توني اعرف منك أنهم حاطين قسم ليسفورا أتوقع أفضل مشوينه للي مايقدر يطلب من موقع سيفورا شكرًا على التدوينه ����

Marana Mae يقول...

الله يسعدك غاده على هالتدوينه 😍 جت بوقتها ✨👌🏼 بس بسألك وش الفيزا اللي استخدمتيها ؟
لان فيزتي الانماء و مو اي موقع يقبلها مادري ليه 😓

Futon Alzubaidi يقول...

كل مجموعة احلى من الثانية ♥♥♥♥
و الاحلى السعر مرره مناسب :(♥
تتهني فيهم يارب ♥

غير معرف يقول...

حبيبتي فتحوا الدفع عند الاستلام سيفورا السعوديه بس صراحه اسعارهم نار ، ومنتظره يسون تخفيضات عشان اشتري
ي خوفي م يسون تخفيضات

إرسال تعليق