السبت، 18 فبراير، 2017

Mikyajy UTOPIA collection | مجموعات مكياجي الجديده في الأسواق !!♥ تفاصيل المنتجات + انطباعي الأول مع سواتش للألوان 😍


السلام عليكم ورحمه الله وبركاتة ♥♥
ممكن أغلبكم مل من صور وكلام البنات عن منتجات مكياجي الجديده خلال السنه الي فاتت لحد اليوم لكن والله ما الومهم !! لو كانت صورتكم عن مكياج مكياجي سيئه لأنك جربتيها قبل سنتين ثلاث او أكثر مالك حق تكرهينها للحين ابدا ، كل شي يتغير ونفس الشي لشركات الميكب ، مكياجي لاحظت هذا الشي في السنوات الأخيره علشان كذا بدأت تطور وتغير من تركيب و "تغليف" منتجاتها وصارت تواكب المواسم وتطلع كولكشنز جديده مختلفه في الشكل و المنتجات والأحلى من كذا جودتها حلوة واسعارها روووعة يعني ارخص من كثييير ماركات ودائما دااائما عندهم عروض تحفظ لك فلوسك خصوصا لو حبيتي تشترين قطعتين او أكثر من الكولكشن يعني ♥
ولو تتذكرون سبق وكتبت 3 تدوينات لمنتجات مكياجي وحده كانت تغطيه لللإيفنت بكل التفاصيل هنا و تجربتي لمجموعة سبليندور لخريف وشتاء 2016 هنا و اربعه من عطورهم اليوميه هنا وللمعلوميه المدونه مكاني المفضل الي اكتب فيه المواضيع الي تستاهل وفيها تفاصيل كثيره ما تكفي الانستقرام  فأرجع للمدونه علشان كذا المنتجات الي احبها مثل هذا الكولكشن اكتبها هنا لأني عارفه انو كلامي كثيير عنها خصوصا بعد ما جربتها لفترة وناويه اعطيكم انطباعي الأول و عيوبها .... 
للمعلوميه الكوليكشن لمتد ادشن يعني فتره ويروح ماعاد يرجع فالي حابته تاخذه من الحين مثل كولكشن الخريف/شتاء سبليندور خلص ماعاد فيه الي الباقي في الخصم.



يوتوبيا هي المجموعه الجديدة من مكياجي لربيع 2017 ،، الوان هاديه ومنتجات مناسبه ومواكبه لآخر درجات الميكب لهذا الموسم.
مكونة من 6 منتجات ومثل ما قلت لكم فوق صارلي اسبوع مجربتها فراح اعطيكم نبذه عن المنتج وإنطباعي الأول عنه اذا يستاهل او لا وليش ؟؟! الكولكشن جديد نزل في الأسواق تاريخ 5 فبراير يعني قبل 13 يوم بأسعار جددا ممتازه يعني مافي اي منتج منها وصل سعره فوق 80 ريال هذا غير العرض الي عندهم اي 3 قطع من الكولكشن يحسب لك بـ149 ريال بس يعني فرصه للي حابه تجرب المجموعه او حتى تهدي احد ♥



قبل ما ابدأ بالكولكيشن قلت اوريكم هذي المجموعه حقت العطر ما اعرف اذا جديده او لا لكن ريحتها حلوه وقويه لأنها برفيوم يعني مركزة ومعاها شاور جل ولوشن ،، مو ريحتي المفضله لكن ما يمنع انها حلوة وممكن استخدمها ان شاءالله < مجموعات الجسم وبعض العطور عندهم حلوة للبيت بعد الشاور رخيصه وجميله خصوصا للي ما يحبون يدفعون مبلغ على عطور بيت جربو من مكياجي.


المجموعة اليمين فيها روج ومناكير راح اوريكم صورة اوضح لها ،، اليسار شنطه جميييييييلة لازم تشوفونها بشكل اوضح تفك ازمه ، بداخلها باقي قطع المجموعه :


للمعلوميه بس لو ما تعرفون اللون هذا او لون المجموعه كلها الدرجه هذي هي اجمل الدرجات الي احبها في كل شييي كل شي سواء كان ميكب اكسسوار لبس او غيره دائما تجذبني علشان كذا متعلقه بالمنتجات ♥♥ 
هذي هي المجموعه الي فوق يمين ، عباره عن شنطه صغنونه فيه بداخلها روج ومناكير ، الشنطه حجمها ججدا حلو تقدرين تحطين فيها الأشياء الي تضيع في الشنطه من ربطات ، بنس ، سماعات ، عدسات وغيرها :


فيه منها الوان كثير مو بس هذي متوفرة بأربع درجات الي هم 201 وردي فاتح / بيج ، الي عندي 301 واصفينه على انو بنفسجي دافئ :/ و 801 احمر كلاسيك وآخرهم 901 درجات البني  .... 
من الي شفتهم الدرجه هذي أجملهم مثااااالية بالنسبة لي تجنن تجنن خصوصا المناكير يحلي يدي بشكل ♥♥♥ اللون مره مناسب بشرتي علشان كذا احبه ..


وطبعا من فتحتهم ما وقفت استخدامهم ،، المناكير تركيبته تجنن وسبق وجربت مناكيراتهم وكانت حلوه نفس الشي ، ماهي ثقيله ولاهي خفيفه وسط ، طبقه وحده كفتني حتى وضح اللون وغطا الظفر كامل + فرشته عريضه يعني مسحه تكفيك ما ياخذ وقت ابدا والأحلى من كذا ينشف بسرررررعه .. للأمانه ما جربت اتركه لأيام ورا بعض فما أقدر احكم اذا تقشر او لا بس لمعته طوال اليوم كانت قويه مثل الجل.

اما الروج ادماني الجديد ، نوعيته مطفي لكن ما يجفف صاير زي الڤلڤت ما يضايق لكن اللون علشان يبين قوي مثل مو مبين يحتاج تعيدين عليه مرتين زي ارواج ماك مثلا .. مافيه ريحه ولا طعم يعني روج عادي زيه زي غيره لكن لونه جذبني وحببني فيه.

المجموعه هذي بالذات كيوووووت والمنتجات حلوه تنفع هديه ونفس الشي لباقي المنتجات تحت ،، الباكجنق حقها جذبني وسعرهم حلو أفكر آخذ لصحباتي منها ..♥😍 

سعر المجموعه 79 ريال ومثل ما قلت فوق كل الكوليكشن خذي اي 3 بـ149ريال .



اما الشنطه هذي اتوقع بتكون صديقتي الجديده في السفر والطلعات عموما ،، حجمها كبير وفيها مرايه حجمها مناسب والأهم من كذا فيها زي الكيسه مخيطه عليها تحمي المنتجات من انها تطيح وتبقيها مرتبه كذا:



شايفين !!♥ تنباع لوحدها بـ79 ريال ومثل ما قلت فوق كل الكوليكشن خذي اي 3 بـ149ريال  احب الشنط بهذا الحجم تكفي مكياجي الي استخدمه أكثر شي او في السفر او اذا طلعتي لفتره يعني مساحتها كبيره تاخذ كثير منتجات ،،  بداخلها باقي قطع المجموعه راح اوريكم هي:



مجموعه فرش ميني ، باليت للوجه + باليت للعيون وآخرهم مو من ضمن الكولكشن لكن هذي مسكرة من مسكراتهم سمعت عليها مدح مو طبيعي وحلو انهم ارسلوها .....



حبييييييييييييت 3 فرش ميني للوجه يجون مع بعض في مجموعه ناعمين ناعميييين شعرهم صناعي ما فيهم اي عيب بس تمنيت لو معاهم شنطه او غطاء حتى احفظهم فيها لأنها تنحاس في شنطتي مع باقي الميكب وأخاف يجيها شي علشان كذا الغطاء او الشنطه ضمان بس عموما صايره استخدمها كثير لأنها صغيره وفي شنطتي اقرب لي وحتى لمن اطلع الصباح مستعجله اسوي مكياجي برا هذي تساعدني لأني قبل كنت استخدم فرش سيفورا البرو وماعليها اي كلام تجنن وفيها غطاء لكنها طويييلة ما تكفي تدخل في الطنشه تتعبني وتطيح علشان كذا غيرتها لهذي انصحكم فيها مررره للي تبغى فرش صغيره تفك ازمات في الطلعه فيها ثلاث فرش وحده للبلشر ووحده للبرونز ووحده للهايلايت ،، سعرهم 79 ريال ومثل ما قلت فوق كل الكوليكشن خذي اي 3 بـ149ريال .


باليت الآيشادو ممكن هو اقل منتج حبيته في المجموعه يمكن لأن مجربه ماركات أكبر وجودتها كانت أعلى مثل اربن ديكاي وكات فوندي معروفين صبغتهم والوانهم قويه وعاليه ما نختلف عليها علشان كذا ما شدني هذا الباليت ... فيه 6 درجات طبيعيه 3 منهم مطفيين وللأمانه ما اتوقع استخدمه كثير جودته اقل من الي احبه الألوان ما تطلع بقوه لازم تستخدمين اصبعك ، ماهي سيئه لكن مو الأفضل راح تشوفون سواتش تحت .. حبيت ثلاث الوان بس : اول لون يسار لتحت الحاجب وبيس قبل الآيشادو + ثاني لون يسار عباره عن لمعه حلو لوحده على الجفن المتحرك او هايلايت للوجه ناااعم + اللون البني الغامق لأنه باهت شوي اعبي فيه حواجبي او اسوي ايلاينر مموه فقط.
متوفر الباليت بثلاث درجات  101 ( درجات حيادية ) و 301 ( درجات الموف ) و الي عندي901 ( البني والبرونزي ).

الفرشه الي معاه جهه الفرشه مو الاسفنجه ، احب نوعيتها لأني استخدمها للجلتر تساعد انها تحطه لي بدون ما يحوس لأنها مسطحه عموما سعر الباليت 79 ريال ومثل ما قلت فوق كل الكوليكشن خذي اي 3 بـ149ريال .


باليت الوجه فيه برونز و هايلايت و بلشر ، متوفر بثلاث درجات  301 موف وهو الي عندي وأجملهم من وجهه نظري و 701 القرنفلي و 901  بني فاتح ،، تركيبتهم جافه وممكن البعض يشوفه عيب لكن بالنسبه لي حبيت هذا الشي ليش ؟؟! < جافه اقصد انو ماهي ناعمه من لمسه يطلع اللون قوي مثل بلشرز ذا بالم مثلا فهمتو علي ؟ 
عموما ليش حبيتهم لأن الوانهم من الصوره مبينه قويه فإذا كانت صبغتهم عاليه صعب اتحكم في الكميه و الدمج وهذا الشي اعاني منه انا اذا كانت درجات الألوان غامقه و التركيبه ناعمه يصير آخذ فوق الي ابغاه واقعد ساعه ادمج واللون قوي ويبهذلني لكن هذا لأنه جاف فأنا اتحكم بالكميه يكون خفيف وكل ما زدتي صار اللون اقوى وبكذا انتي تختارين الدرجه الي تبيغينها اذا خفيف للصباح والا قوي لليل مناسبه مثلا ،، البلشر من أجمل الدرجات الي جربتها في حياتي تجنن تجنن ولو تنباع لحالها كان قلت لكم خذوها بس للأسف ماتجي الا في هذي المجموعه :( ،، البرونز لونه شووي مايل للاورنج ومطفي ماشي الحال  حلو لكن عندي برونزات ثانيه افضلها أكثر لأني احب يكون فيهم لمعه خفيفه ما احب البرونز المطفي تماما لكن الي تحبه كذا راح يناسبها  ، اما آخرهم الهايلايت ما اشوفه هايلايتر قد ماهو جلو باودر يعني انا ما يكفيني استخدمه كهايلايت لأنه مافيه لمعه ترضيني لكن فيه جلو او لمعه صحيه طبيعيه خفييييفه ممكن استخدمها لكامل الوجه بخفه بدال الباودر العاديه بس.

لو بنصحكم تاخذونه بيكون علشان البلشر لاااازم تجربونه حلوة الدرجه مررره ولا يمنع انو البرونز و الهايلايت جميلين يمكن يناسبونكم أكثر مني ، سعر الباليت 79 ريال ومثل ما قلت فوق كل الكوليكشن خذي اي 3 بـ149ريال .



سواتش للدرجات :



من لمسه وحده علشان تحكمون اذا اللون قوي ويناسبكم او لا ،، تصوير السواتشات صعب جدا لأن يختلف مع الإناره وانا ما عرفت اضبطها لكن صورتها ولو علشان اوريكم اللون التقريبي.
ارجعو للمحل وجربو اللون بنفسكم أفضل لأن بيختلف على لون بشرتكم أكيد 100% ،، من اليسار الروج والمفروض يكون اغمق شوي بس الاناره :/ ، البلشر و الهايلايت و البرونز برضو غمقو اللون تكه الاناره مبينتهم فاتحه ، وبعدها الوان الايشادو.


لااااازم اوريكم شكل العلبه من برا ♥ نص جمال المنتج فيه ،، صاير مثل الرخام ومع الإناره يتغير ♥♥♥ حبيييييته ابدعو مكياجي في هذا التعليب 😍


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

Beauty__ Secret99 يقول...

يعطيكي العافيه مره حبيتها المجموعة الصراحه مكياجي تطورت كثير😍💖

Futon Alzubaidi يقول...

بصراحة مكياجي مره متغير للأحسن ♥
الشنطة قاتله حتى انا حبيتها ماشاءالله ♥♥♥♥♥

إرسال تعليق