الاثنين، 27 فبراير، 2017

Clarins Booster | تجربتي لقطرات "بوستر" التطهير و التجديد والطاقه من كلارنس للبشرة !♥ تستاهل او لا ؟؟!


السلام عليكم ورحمه الله وبركاته ♥
مر تقريبا 6 شهور من اول استخدام لقطرات كلارنس هذي ،، ولأنها منتج عنايه حبيت اعطيها وقت كبير حتى أحكم على الفعاليه اذا تستاهل او لا ؟؟! 

من أجدد منتجات كلارنس للعنايه ،، فكرتها انها بوستر أو "مدعِّم" علاجي ومقوي للبشرة ، مركز و مستخلص من النبات بثلاث انواع  تختارين على حسب حالتك و الأنسب لك (طاقة ، تطهير ، اصلاح) اشتغلو عليها سنين طويلة حتى ينتجون المنتج المثالي المناسب للمرأءه وروتينها المشغول.
في التدوينه هذي راح اشرح وأفصل لكم كل نوع منهم وايش مكوناته ووعوده ومميزاته عن غيره ومين يناسب + تجربتي لهم وايهم حبيته أكثر وناسبني وليش وباقي التفاصيل يعني اقرأي بتمعن لا تستعجلين حتى تعرفين الأنسب لك في النهايه ......



قبل ما أبدا راح اعرض لكم أكثر الاسئلة تكرارا عن البوسترز هذي حتى توضح لكم الفكرة أكثر ولا يتكرر السؤال عنهم كثير :

ايش الفرق بين السيروم الي استخدمه في روتيني اليومي المتعوده عليه عن البوسترز هذي؟؟! 

مين تقدر تستخدم البوستر ؟؟!
البوسترز هذي تناسب كل البنات او " النساء" عموما من 25 سنه وفوق < ماله علاقه انا اصغر واستخدمه يعني العمر ماراح يغير بشي لكن بما انو غالبا البشرات فوق 25 تواجه مشاكل أكبر ممكن يلاحظون فرق أقوى وبكل الحالات تقدرين تستخدمينه حتى تتفادين المشاكل مستقبل مثل باقي منتجات البشره عموما.

متى وكم مرة استخدم البوستر ؟؟! 
تستخدمين هذي المدعمات اذا حسيتي بتغييرات او اجهاد في بشرتك فقط لفترة مؤقته اسبوع او شهر او اكثر على حسب حاجتك. 

كيف استخدم البوستر ؟؟!
على يد نظيفه اخلطي الكريم او الماسك مع 3-5 قطرات من اي نوع بوستر واخلطيهم لحد ما يمتزجون ويصير الخليط ناعم واستخدميه.

ايش الكريم الي استخدمة مع البوستر ؟؟! 
تقدرين تستخدمن منتجات البشره حقتك الي متعوده عليهم عادي ،، اضيفيها لمرطب البشره اليلي او النهاري ، للماسكات أو الزيوت وممكن مع الميكب مثل الفاونديشن.

اقدر استخدم البوستر لحاله ؟؟!
لأن تركيزمكونات المنتج هذا عالي جددا فما ينفع تستخدمينه لحاله انتبهي ! اضيفيه لوحده من المنتجات الي ذكرتها في السؤال الي قبل.

اقدر استخدم كل يوم بوستر مختلف ؟؟ او واحد في النهار وواحد في الليل ؟ أنوع بينهم يعني ؟!
ايه ، بما انو هذي المدعمات او البوسترز مخصصه لمشاكل معينه طبيعي ممكن تحتاجين أكثر من نوع فعادي تستخدمين نوع اليوم وبكره تغيرينه ليوم ثاني وكذا بالتناوب لكن انتبهي تخلطين نوعين سوا في نفس الوقت يعني الليل لا تحطين قطرات مختلفه في كريمك مع بعض ما ينفع . 

كيف حجمه ؟ كم سعرة ؟ ووين الاقيه ؟ 
المنتج صغير فيه 15ml لكن ماراح تحتاجين كميه كبيره اصلا بالقطرات شوفو الرأس في الصوره الي فوق كيف صغير ماراح يطلع لك منتج كثير وراح يدوم عندك فتره طويله وتقدرين تتشاركين فيه مع أحد ثاني ،، سعر الواحد 185 ريال ومتوفر في اي محل يوفر منتجات كلارنس مثل سيفورا ، وجوه ، دبنهامز وغيره.


أنواع البوسترز :


لتعزيز الطاقة ENERGY BOOSTER :
بخلاصه الجينسنج وهي نبتة طبية صينية معروفة لخواصها المفيدة منها : تشد البشرة وتنعشها ، تخفي علامات التعب ، تعيد للبشرة إشراقها ،،  يعني مناسب أكثر للبشرات المرهقه و التعبانه ، ما نمتي ، مضغوطة ، تعبانه ، مسويه دايت وواضح على بشرتك انها مافيها حيويه وطاقه هذا راح يعالجها.

نصائح ممكن تفيد بتجديد طاقتك مثل انك تاخذين حمام بارد يخلي فيك طاقه جربوها ، نامي نوم كافي لأنه ينعكس على بشرتك خصوصا في الصباح راح تكون مورده من النوم وجميله عكس الي سهرانه او مواصله لأنه عدو البشره الأول مع قلة المويه طبعا.
عصير البرتقال والفواكة راح يجدد من طاقتك ويحسن من بشرتك كثيييير نصيحه من مجرب دخلي العصاير لروتينك اليوم وشوفي الفرق.

إزالة السموم وتطهير البشرة DETOX BOOSTER :
أكثر واحد حبيته ♥ معزز بمستحضر القهوة الخضراء وهي نبتة استوائية إفريقية غنية بالكافيين ومعروفة لخواصها المزيلة للسموم لأنها تعيد للبشرة إشراقها، تخلص البشرة من السموم وتعطيها امتلاء يعتبر مطهر للبشره في الأيام الي تحسين بشرتك مخنوقه من الهواء او الدخان او مكتومة او حتى في الأماكن المغلقه مافيها هواء فرش ، وفي الايام الي تاكلين اكل دسم وتحسين بشرتك تعبانه منها راح يناسبك لأنه يطهرها من الداخل.
المويه المويه راح تطهر جسمك بنسبه كبيره انا احاول يوميا اشرب على الأقل لتر ونص ومرررره فرق خلو المنتجات برا الموضوع ماراح تفيدك ابدا اذا صحتك الداخليه سيئه.
ما يحتاج اقول مكياجك امسحيه قبل ما تنامين حتى تتركين البشره نظيفه ، حاولي تدخلين اكل صحي لنظامك حتو لو كان سييئ ممكن تفيد هذي الأكلات ليش لا !!

إصلاح البشرة REPAIR BOOSTER :
البشرات الضعيفه والحساسه الي مثلاً حرقتها الشمس او تعبت بسبب البروده والجفاف والمويه الي ما تكون صافيه وفيها كلور مثل المسابح والمالح مثل البحر او حتى بسبب علاج بشره ما ناسبك هذا حل مثالي لها لأنه مجدد للبشره ،، معزز بخلاصه الميموسا تنويفلورا وهي نبتة طبية من المايا برضو معروفة لخواصها المفيدة منها : تخفف من الإحساس بالإنزعاج ، تعزز عملية ترميم الجلد ، تخفف من الإحمرار.
احمي بشرتك من الشمس ما اتوقع للحين فيه بنت ما عندها واقي شمس صح ؟ مو مقعلوله يعني مستعده تدفين مبالغ على ميكب ولا تقدرين تشترين واقي شمس ؟ مهم جدددا وكثير غافلين عن اهميته لكن صدقوني بتندمون وقتها اذا خربت البشره وسمرت خصوصا الي يطلعون تحت الشمس كثير هم اول ناس بيخسرون البشره الحلوة للأسف التصبغات والحبوب والجفاف والتجاعيد وكل شي راح تجيكم علشان كذا الواااااقي مهم وفيه انواع غاليه ورخيصه انتي اختاري الأنسب لك.
اشربي مويه كافيه ،، ووقت الجو البارد استخدمي مرطب اثقل للبشره حتى تحمينها الجفاف والبهتان الي يجي كل شتاء مع بشره جافه :/ 


مكونات المنتجات الثلاثه فوق بالترتيب من اليسار :






تجربتي ورأيي فيهم :



طبعاً ماركة كلارنس معروفة بجودة منتجاتها و الحمدالله ما خيبو ظني بالنسبه لي .. الي حمسني عليهم أكثر من باقي منتجات العنايه الجديده في الأسواق انو فكرتها مبتكره  ، ماعندي استعداد اضيف منتج جديد على روتين عنايتي صراحه الي عندي مكفيني لكن فكره اني اعزز وأقوي كفاءه المنتجات الي استخدمها بأضافه كم قطره عليهم حمستني لأنها ماراح تاخذ وقت ولا مساحة ولا طاقه في عنايتي ولا ؟! 

طبعا هذا الكلام الي راح اقوله كان في فتره قبل علاجي لبشرتي  الي حكيت لكم عنها بالتفصيل مع صور لبشرتي وقت العلاج هنا لكني وقفتهم قبل العلاج بشهر لأني قلت ابغى اشوف اذا راح افرق او لا وفعلا فرقت لكن هالمره قلت بعالجها بدال ما استخدم هذي بما انو عندي الفرصه وبعد ما خلصت علاجي رجعت لهم حتى اداوم على نتيجة العلاج لأطول فتره ممكنه بإختصار ادمنتهم !!

ولأني كنت ابغى اجرب الثلاثه كلهم قسمت الأوقات والفترات بينهم ،، بالنسبه للانرجي والي كنت بحاجته أكثر شي وفعلا احبهم لي هو بعد الأخضر ،، اذا قمت الصباح خلطت كم قطره مع مرطبي و واقي الشمس قبل ما اطلع للجامعه ، وحتى في البيت بعد ما ارجع واغسل بشرتي اضيف كم قطره للمرطب يعني مخليته استعمال خلال اليوم ولأني ما ينفع اداوم عليه فترات طويله بدون حاجه له ، صرت استخدمه يوميا لحد ما وصلت لنتيجه وبعدها قللت استخدامي له حتى يكون في روتين العنايه افضل من اني اقطعه. 
اول شي لاحظته في البشره بعد استخدامه اسبوعين ونص تقريبا هو اللون .. تفتح صار فيه اشراق تحسين الوجه منور يبيني مصحصحه مثل ما اكون نايمه وقت طويل وحتى ملمس البشرة اختلف مع اني ما اظن له علاقه بهذا المنتج ؟؟! ممكن لأن اضافته  مع كريمي زاد من فعاليته ؟ ما اعرف لكن صارت البشره بلبم مليانه وملمسها ناااعم حبيت هذا التغير مره مرررره مره خصوا مع الميكب او الفاونديشن صارت البشره جمييييلة علشان كذا كملت عليه بعد علاجي.

الأخضر وهو الأحب الى قلبي اتوقع متسحيل اقطعه بعد ما جربته الصراحه بالذات هو ليش ؟؟! انا معتمدته وقت الماسك فقط ... وقت ما استخدم الماسك الطيني او غيره اقطر 5-7 قطرات < من عندي العدد لأني احس مع الماسك يضيع فيه فأكثر شوي بما انه مؤقت عكس الكريم المرطب مثلا ،، عموما القطرات هذي ساعدت انو المسام تصغر عندي بشكل ملحوووووووظ والمنطقه حولين الأنف صارت نظيفه ومشدود وهذي مشكله يعانون منها أغلب البنات الي بشراتهم دهنيه او مختلطه لأن مع الماسك هذا نظفت الدهون والمنطقه كلها صارت منتعشه ..... وحتى الحبوب اذا طلعت مع القطرات هذي في الماسك تقلل منها بنسبه كبيييره واذا كانت صغيره فتختفي من ثاني يوم والآثار نفس الشي تخف تدريجيا يعني احسه بجد يطهر البشره من الأوساخ.

اما الأزرق وهو الأقل استخدام فما اقدر احكم عليه صراحه لأني ما لاحظت فرق يذكر فيه على بشرتي لأني ما احتاج تجديد لخلايا بشرتي عموما .... ممكن الي تتعرض لأماكن مكتومه في الدوام او ما تشرب مويه كثير او حتى تحس بشرتها معدومه او تتسبح في مويه مو نقيه في الحمام او المسبح في الكلور اوالبحر راح يفيدها انا ممتنعه عنهم علشان كذا هذي الاشياء ما عندي مشاكل فيهم الحمدلله هذا غير التقشير الي سويته قبل فتره ما اشوف لي حاجه فيه.

الحلو فيهم كلكهم انهم ما يتركون ملمس زيتي على البشره اببدا ابدا ولا لهم ريحه مزعجه ولا يغيرون من تركيبه المنتج الي مستخدمته معاه فقط يزيد ما فعاليته مثل ما قلت فوق وهذا الي حببني فيه ،، الفروق بسيطه وممكن ما تكون واضحه للكل للأمانه لكن انا عن نفسي تكفيني وبما ان اضافته لروتيني ما ازعجتني ولا ضرتني اظن راح اكمل عليه خصوصا الانرجي و الديتوكس اما الريبير ما اشوف لي حاجه فيه ..... انتي اختاري الأنسب لك من وصفهم فوق وخذي تجربتي نوت على جنب يعني مو شرط الي يناسبني يناسبك والعكس انتي اخبر ببشرتك وحاجتك ♥♥ اذا جربتيه شاركيني رأيك فيه ؟


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

Futon Alzubaidi يقول...

حبيت فكره المنتجات ♥♥
استخدام العافية حبيبتي ♥

Reem AbdulAziz يقول...

التقرير رائع، وحبيت كثير مقدمتك في تعريف البوستر.
شاكرة لك ويعطيك العافية... وموفقه يارب.

إرسال تعليق