الأربعاء، 21 ديسمبر، 2016

The best of essence | أفضل 7 منتجات من اسينس بأقل من 20 ريال !!♥


السلام عليكم روحمه الله وبركاته ♥
الأسبوع الي فات كان ضغط مو طبيعي لدرجه فوت او مالقيت وقت اكتب فيه تدوينه لكن الحمدلله عدا على خير واليوم متحمسه اقولكم عن منتجاتي المفضله من ماركه اسينس بما اني دائما انسأل عنهم في انستقرام :)
هي الماركة المانيه بدأت في 2002 لصاحبتها كريستينا الي هدفها كان منتجات عالية الجودة بسعر مناسب !! وبجد نجحت وصارت الماركة من البست سيلر في المانيا وحاليا متوفره في أكثر من 50 دوله .....✨



الماركه عندنا في السعوديه على حد علمي متوفره بس في :
  • أغلب صيدليات وايتس
  • فروع محدود ما اعرف وينها من رد تاغ !!  
المشكلة اني ما لقيتها في اي فرع رد تاغ قريب مني الي تعرف وين تفيدني الله يعافيها ،، الاقيها بس في صيدليات وايتس و المشكلة انو 90% من الأوقات الستاند حقهم فااااضي وما تلاقين فيه الا المنتجات السيئة او القديمة او المستخدمة او الي درجاتها شينة هههههههههه غيرها ماراح تلاقين الا لو صادفك الحظ وجيتي في يوم ما توصلهم البضاعه وقت الترتيب يعني اذا ما شفتيهم يرتبون قدامك معناته وقتك غلط لأن بجد اتذكر آخر مره رحت وايتس احتاج منه كم شغلة لقيته يصفف الميكب الجديد منهم واستحيت أزاحم علشان آخذ فقلت اطلع وارجع بعد كم دقيقه او بعد ساعه يعني آخذ لفة واجي لكن انبني ضميري ما قدرت اطلع بدون ما آخذ شي واحد على الأقل فأخذت 2 من البرايمر احتياط وطلعت ما كملت نص ساعة رجعت لقيت الستاند ممسووووح !!! هههههههههههههه والكميات الكبيره الي كانو يرتبونها في الستناد و الأدراج وين اختفت يوم سألتها قاالت الناس يشيلون بكميات ياخذون بالدرزن ! علشان كذا القيها في محلات ثانيه بالرياض دبببل السعر :/ ...... الحمد لله لحقت على البرايمر على الأقل .

ما جربت كثييير من منتجاتهم لكن حبيت اتكلم عن 7 من اصل 10 تقريبا من الي جربتهم يعني مو شرط باقي المنتجات ما عجبتني بالعكس ما جربتها حتى احكم لكن بإذن الله لو لقيتهم وجربتهم راح اكتب لكم عن كل منتج يعجبني ويناسبني زياده .
بالنسبه للأسعار ما اعرف كم بالضبط سعر كل منتج لكن الأكيد انها تحت 20 ريال .



الايشادو برايمر + 3D باودر ايشادوز 


هذا كان أول برايمر استخدمه في حياتي ولحد الحين هو من التوب 3 ♥♥ اتتعب وانا اقول قد ايش جميل فيه لون او اندر تون مشمي يصحح الغمقان الي عاده يكون في الجفن ويقلل من منظر العروق وهذا يعني الوان واضحه وقويه غير الثبات العالي ،، يفضل واحسن لو بعد ما تستخدمينه تثبتينه بباودر قبل ما تبدين بالآيشادو لأنه رطب وممكن يمسك اللون بقوه فيصعب عليك الدمج بعدين .
كميته كبيره ونقطه منه تكفي علبته مثل علب الجلوسات وسعره 15 ريال .

اما بالنسبة للآيشادو فأفضل نوع جربته هو الي في الصوره 3D وغيره سيئ ما حبيتهم ابدا لا لون ولا ثبات ،، هذا شوي عليه كلمه حلو ، كل مره استخدمه خصوصا الي في اليمين رقم 09 انسأل عن الدرجه حتى أخواتي يسألوني كل مره واعيد لهم الجواب كل يوم لدرجه لفيت كل الفروع آخذ لهم منه لكن مافيه هي مره وحده لقيته وبعدين اختفى سعر الواحد 16 ريال .






براو جل "مسكره حواجب" + المسكرة الورديه 


مسكراتهم داااائما عليها مدح وعلى كثر ما اقرأ عنها لقيت اغلب الأنواع حلوة لكن التوب من كلامهم هذي والي علبتها اسود مع أخضر ، اسعار المسكرات عندهم من 10-20 ريال هذي بـ13 ريال ، الي حببني فيها انها سوووودا وتكثف الرموش مره لكن عيبها ما تطول واول ما تشترينها لو كانت جديده يعني تكون سايله وثقيله مع الأستخدام تصير أحلى ،، ما تسيح لكن ما تمسك الكرلز حقت الرموش يعني بعد كم ساعه لو كنتي عاكفه رموشك راح تنزل ، بس تضل وحده من أفضل المسكرات الي جربتها مميزاتها وشكلها في الاستخدام يطغى على عيوبها .

ميك مي براو أقول وبكل ثقه انه البديل لجمي براو من بنفيت 100% مسكره حواجب فيه منها لونين انا أخذت الغامق سعرها ارخص بكثيييييير من بنفيت متخيلين 15 ريال بس !! وكانت من الأشياء الي اخذتها مع البرايمر في اليوم الي رحت لوايتس ولقيتهم يعبون الستاند .
فرشه او مشط الحواجب فيه صغير يعني راح يوصل لكل الشعر ، ما يطلع كميه كبيره فيصير إستخدامك له نظيف وقت الميكب يرتب شكل الحاجب ويعطيه لون حلو ما يبين ميبس او مكتل مثل بعض انواع المسكرات من الشركات الثانيه ،، هو المفروض او الفكره انو يكون فيه فايبرز بحيث يكثف من الشعر للي حواجبها خفيفه لكن انا ما لاحظت فرق ممكن لاني ما احتاج ؟؟ ما اعرف بس ككل حلوه ويستاهل تجربونها أتذكر الي حمسني عليها أكثر انو فيه ميكب ارتست استراليه مدحتها مره وبجد صدقت .




جامبو لب بنسل + محدد الشفايف 


الجمبو لب بنسل هو قلم روج تركيبته غريبه ماهي مطفيه لكن ماهي كريميه صايره بينهم لكن لمعته مثل الجلوس ما أعرف كيف ،، تركيبته ثقيله حتى ما يحوسك في العلبه ويثبت مكانه لكن وقت استخدامه يذوب على الشفايف ، ترطيبه عالي مايجفف ابدا أخذته معي في شنطه الجامعه لأني استخدمه كمرطب بلون فوق اي روج ، للأسف كنت اتوقع اللون بيكون مثل الي في العلبه لكن غلط علي صاير مثل المرطب بلون خفيف كل ما عدتي عليه يزيد اللون يعني انتي تتحكمين في الدرجه بس هذا ما يمنع اني حبيته وراح ارجع ابحث عن درجات ثانيه ان شاءالله ، الدرجه رقمها 02 كلير نود بـ 12 ريال .

المحددات روووووعه ما توقعت راح احبها كذا ، كريميه وسلسله تمشي معاك ولونها واضح والأهم من كذا ثباتها عالي ، ماهي جافه وعلبتها حلوه ما تحتاج بري وهذا مرييييح ما تنغثين كل مره تستخدمينه ،، الدرجة نفسها حلوه لوحدها اسمها 06 جيرلز دريم بـ 9 ريال بس وما يحتاج اقول اني راح ارجع آخذ منهم زياده صح ؟؟ 






المناكيرات


المناكيرات وحده من التوب برودكتز منهم لازم لاااااازم تجربونها لو لون واحد على الأقل سعرها بس 9 ريال !! الألوان الحلوه تخلص لكن غالبا يجيبون منها كميه .
صورت لكم ثلاث انواع ابغى انبهكم انو التركيتبه تختلف لكن العلبه والفرشه العريضه الحلوه نفسها  ، اول ثلاث من اليسار هم الأفضل والي احبهم الي هم الألوان العاديه مافيهم جلتر ولا شي ،، سهله في الإستخدام وتعطيك اللون القوي الكامل من طبقتين بس وتنشف بسرررررعه ولمعتها تجنن كأنها جل ♥♥ للأمانه هذي تجربتي لهم يوم/يومين بالكثير لأني ما أخلي المناكير في يديني فتره طويله وأكتفي فيهم بس اذا طلعت لكن لو انتي حركتك كثيره وتمسكين الاشياء وتتحركين ممكن يتمخش معاك بسرعه ...
رابع نوع من اليسار هو الدوو كروم الي يكون عاكس للون ويختلف مع الإضاءه او الإنارة تركيبته ناعمه وسلسله لكن عيبها خفيييييفه يعني لازم 3 طبقات وطالع حتى يوضح اللون وهذا يعني انو ماراح ينشف بسرعه لكن وقت ما ينشف يصير حلو مثل الي قبلهم ،، آخر نوع الي هو الأول يمين هو الأسوء وهو الي فيها جلتر :( لونه مررره حلو لكن ابدا مو سهل في الإستخدام وخشن ما ينشف مليت وانا استنى واذا نشف صعب تمسحينه ومو حلو شكله ركمته في الدرج .


ككل الماركه جددا ممتازه خصوصا للمبتدئات او الي ميزانيتهم محدوده والحين تذكرت فيه منتجات ثانيه حلوه ما تكلمت عنها في التدوينه اليوم نسيييتها لكن راح أحكي عنها في انستقرام ان شاءالله مثل البلشرز ، الهايلايتر ، والأرواج الكريميه الي علبتها من برا اسود او وردي كلهم حلوين وانا احبهم للإسخدام اليومي .
لو مجربين شي من منتجاتهم شاركوني رأيكم هنا او في إنستقرام ♥♥


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

Meaad's Blog يقول...

حبيت التدوينة مرره، انا جربت المسكرة الزرقا مره حلوووه تكثف بشكل جميل بس تتعب شويه في الازاله وكمان جربت البرايمر حلو❤

Noura يقول...

يعطيك العافية على التدوينة مره كنت انتظر احد يفرد هالماركة بتدوينة عن منتجاتها فشكرا لك جدا 😍😍 الماسكرا حق الحواجب مره تحمست لها 😍😍 بس ودي اعرف هي ضد الموية او لا؟ وشكرا مره 😍😍😍

إرسال تعليق