السبت، 10 ديسمبر، 2016

K7L Cosmetics | ماركة مكياج جديده !! كحل كوزماتك كويتيه 100% ♥


السلام عليكم روحمة الله وبركاته ♥ 
قبل ما أبدا قلت قبل وراح اعيده مرات كثيرة ،، المدونه مكاني المفضل احب اكتب فيها المواضيع المميزه والي ابغى احتفظ فيها ، وغالبا أدقق في تفاصيل المنتجات الي احكي عنها واحب اصورها وأذكر كل نقطه اعرفها عنهم علشان كذا لمن أحد يطلب مني اعلان لمنتج او شي مستحيل اسويه في المدونه الا لو انا بغيت وشفت انو يستاهل موضوع مفصل وطويل ،، الاعلانات كلها اسويها في انستقرامي وعلشان ما يكون فيه لبس ابغى اوضح مقصدي بالإعلان هنا :

اعلن وادعم  بطريقه وحدة فقط الي هي اني اجرب المنتج ولا اقبل اي منتج بعد لازم اشوف واحكم اذا راح يناسبني ويناسب محتويات حساباتي او لا حتى انقل التجربه كامله للمتابعات وهم يقررون اذا يناسبهم المحتوى او لا هذا غير اني راح اكتب رأيي الصادق والصريح  وهذا الشي واضح في سياستي للإعلان او الدعم مع اني اشوف كلهم واحد فرق في المسميات فقط وياما رفضت حسابات يبغون مدح في منتجاتهم قبل ما اجربها حتى !! سلامات استغربت فيه شركات او ماركات كذا اصلا .

عموما نرجع لموضوعنا ، قبل فتره وصلني ايميل من ماركة مكياج اسمها K7L "كحل" ماركة كويتيه 100% ماشاءالله يبهروني البنات الخليجيات الي يفتحون بزنس لاين ميكب كامل فيه كل شي ويكون خاص فيهم لأن بجد نادر تلاقين ماركات سعوديه او خليجيه مكياج عندنا :( 
ما أعرف غير افنان الباتل وماشاءالله حتى هي عندها منتجات حلوه ،، راسلوني بأنهم حابين يرسلون من منتجاتهم اجربها واحكم عليها وطبعا ما ترددت ولا للحظه بالعكس عديت كل يوم استنى من توصل من الحماس وما خاب ظني والله ♥♥ وصلني الباكج وشفت انو ظلم اتكلم عنها كلها في انستقرام ولاراح يكفي اصلا علشان كذا قررت اخليها تدوينه كامله مفصله عنها وعن منتجاتها .


راح اعرفكم على الماركة أكثر للي مهتمين يعرفون عنها :
بعد 10 سنوات من الأبحاث ومراقبه السوق ومعرفه تفضيل المستهلكين انتجت لنا هذي الماركة الي ركزت على المضمون والفاعليه في المنتجات أكثر من الشكل الخارجي و التعليب.


"سعينا إلى الوصول إلى درجات لونية جريئة وألوان ذات صبغة غنية ومنتجات سهلة الاستعمال وذات مفعول قوي عميق ويدوم مدة طويلة حتى حصلنا في نهاية المطاف على مجموعة شاملة من المنتجات التي تناسب أي امرأة مهما كانت المناسَبة"




ليش اختارو K7L كأسم للماركة ؟؟

"أردنا ربط الجذور العربية التي تحملها K7L بالعالم الغربي الذي نتمنّى أن يتبنّى الماركة في المستقبل القريب. بالنسبة للمستهلك الغربي، هذا الاسم عبارة عن رقم الحظ ٧ محصور ما بين حرفين اثنين. أما في المنطقة العربية فقد بدأ يُستخدم هذا الرقم بالعامية على نطاق واسع للفظ حرف الحاء الحلقيّ الذي لا يُنطَق في اللغة الإنجليزية. بالتالي، بالنسبة للناطقين بالعربية ليست K7L سوى لفظة "كحل" أي أنّها الكلمة العربية للكحل التقليديّ. بهذه الطريقة، نشفّر جذورنا في الماركة حتى تظل متصلة بأصلها أينما انتشرت حول العالم"


تنبيه بسيط بس ،، التدوينه راح تكون طويلة يعني يبغالك تروقين عليها لو مشغولة خليها لبعدين هههههههههههههه فيها معلومات كثيره وكلام كثير عن كل منتج مع الأسعار فإختاري الوقت المناسب لقرائتها .


طرق التواصل :

موقع الماركة : K7L Cosmetics
انستقرامهم : هنا
رقم التواصل واتس : 96555688565+  
يشحنون لكل دول العالم للي حابين يطلبون .


وصلت المنتجات في بوكس ومغلفه ببل راب + قطع فلين تحميها ♥ على حد ما اعرف انو المنتجات الي راح اعرضها اليوم كلها من الكولكشن الجديد نزلت في شهر 10 . 



اول منتج طاحت عيني عليه هذي الشنطه ........





شايفين قد ايش جمييييلة الفرش !! اتكلم عن اللون والا العدد والا الشكل والا نعومه الفرش ولا ايش بالضبط ؟ 
شعرها يستقدمونه من اليابان !! نوعها تاكلون جودتها عاااااليه وناااعمه جددا ومعروف جوده الفرش اليابانيه ما عليها كلام ابحثو في جوجل عن فرشهم واقرأو بنفسكم دائما تلقون عليها مدح واسعارها عاده تكون غاليه لجوده صناعتها .
اختارو هذ النوع الأفضل من الشعر الصناعي حتى يعطيك النتيجه المثاليه والمرغوبه في الميكب بأعلى جوده لأن غالبا الشعر الطبيعي يكون فيه خشونه بسيطه فهذا النوع من الشعر الصناعي اخذ جوده الشعر الطبيعي ومميزات الشعر الصناعي بإختصار يستاهلون ذكروني بفرش زويفا وسيقما وماك !! وميزات ثانيه لهذا النوع من الشعر انو مضاد للبكتيريا و سهل التنظيف والأهم من كذا انو ما اختبر على الحيوانات .




فيها 22 فرشه متنوعه مابين فرش وجه ، عيون وشفايف .. مالقيت المجموعه كاملة في الموقع لكن استفسرو منهم واتس اب ،، كل فرشه متوفره لوحدها في موقعهم هنا وتحتها وصف عنها ولأيش تستخدم + سعرها ،، اسعارهم ججدا مناسبه والصراحه انصدمت مره ما توقعتها بهالرخص يعني اغلى فرشه فيهم بـ86 ريال !! 


هذي الفرشه عارفه راح تكون ادماني الجديد ومن مفضلاتي لأنها تذكرني بفرشه سيقما الكابوكي نفففس الشكل لكن انعم وتتحرك معك اكثر فرشها مو كثيفه لدرجه تكون صلبه وتصعب في الدمج ابدا ! مرة متمسحه لها ♥ ♥ 



اما الجزء الممتع والمفضل في الموضوع كله هو الميكب 😋 الله يعطيهم العافيه حطو لي كميه كبيرة ومتنوعه من كل منتج وخفت اظلمهم بوصفي ورأيي علشان كذا صورت لكم الكاتلوج او البروشور الي معاهم حتى تقرأون وتحكمون بنفسكم لأن مو كل المنتجات عندي فيه عندهم خيارات كثييره  ،، اضغطو الصوره حتى يوضح لكم الكلام :







الجزء الأحلى والي احبه هي منتجات الشفايف ولأن فيها انوع كثيره مختلفه يوفرونها راح ابدأ فيهم أول (وصف المنتج مأخوذ من الورقه انا للحين ما جربتهم) :




اول نوع هو Luxe Lipstick :
ارواج تتميز بإطلالة وفنش مطفي معزز بخصائص مرطبه حتى ينساب بسهولة على الشفايف ويعطيها اللون الكامل والنعومه المطلوبه من الترطيب ،، تركيبته السميكه والغنيه بالإصباغ تحفظ لك اللون والثبات طوال اليوم فيما تحافظ الخصائص المرطبه فيها على الترطيب فتحميها من الجفاف و التقشر خلال اليوم .

الدرجات من اليسار : Bound - Plum Go - Friction - Mulan. 
السعر : 86 ريال .




ثاني نوع Lipstick creme :
هذا النوع مميز لأنه يجمع خصائص الروج الطفي من ناحيه الثبات و قوام الروج الكريمي من ناحيه الترطب ونعومه على الشفايف ،، تركيبته تساعد على تغذيه الشفايف فيما تضفي عليها لمسه مخمليه .

الدرجتين من اليسار : On neutral - Peony pincher .
السعر : 73 ريال .






ثالث نوع Lip Creme :
تركيبته الكريميه تغطي الشفايف مثل الجلوس بسهوله بينما ثباته وقوه وضوحه مثل الروج المطفي ،، تمريره وحده تكفيك طوال اليوم ثبات ووضوع .
الدرجه الي مصورتها لحالها هي المفضله عندي طلعتها اجربتها وضيعتها فصورت الباقي بدونها لكن يوم لقيته قلت لازم اوريكم هو علشان كذا صورته لحاله ههههههه.

الدرجتين من فوق : Intense - Glamazon - Dusky spring
السعر : 73 ريال .



رابع نوع Liquid Lipstick :
يتميز هذا المنتج بتركيبته السائله الناعمه تغطي الشفايف بنعومه وقوه فيما تحافظ على الرطوبه والثبات خلال اليوم .
الدرجه الأولى فوق تجنن تجنن فيها لمعه ذهبيه تججذب ما بينت في الصوره لكن لا تفوتكم لو راح تطلبون ♥♥♥♥ راح اوريكم سواتش له بعدين في انستقرام .

الدرجات من فوق : No filter - Frappe - Petticoat.
السعر : 61 ريال .




خامس نوع Lip silk :
قلم ذو اطلاله وفنش مطفي/مخملي يجمع مابين دقه القلم وسلاسه الإستعمال غني بالأصباغ ومدعم بالمطريات الناعمه لملمس حريري ، يمكن استعماله كقلم محدد .

الدرجات من فوق : Rose quartz - Lola - Retrogrape .
السعر : 73 ريال .



هذا النوع انا جربته ومرره مره حبيته انصحكم فيييه لأنه ذكرني بنفس النوع والفكرة من نارس "nars velvet matte lip pencil" الي هو من مفضلاتي لكن سعره مقارنه بهذا اغلى ،، نفس المنتج بالضبط ،، احلى درجه حبيتها هي الأخيره ريتروجريب .






سادس نوع الجلوس Lip gloss :
جلوس الي يميزه عن غيره صبغته العااااليه بمجرد تمريره وحده يطلع اللون مثل الي في العلبه ،، لمعته عاليه ولأن تركيبته ثقيله شوي هذا يساعد بأن يكون ثباته أعلى .

الدرجتين من فوق : Unscripted - Peek a beaut.
السعر : 55 ريال .



النوع السابع والأخيرهي المحددات Lip liner
محدد شفايف مقاوم للماء ، تركيبته كريميه ، مثاليه قبل اي روج يزيد من ثباته ويحدد رسمه الشفايف .

الدرجات من اليسار : Buff - Damask - Toast 
السعر : 55 ريال .



اما بالنسبه لباقي الميكب عباره عن منتجات للحواجب ،، اكحال وايلاينرز و الهايلايتر .....


الكحل Waterproof eye liner : 
ايلاينر ضد المويه بدرجات قويه وثابته ،، كريمي فهذا يعني انو سهل للإستخدام ماراح ياذي العين ولا راح يسيح ويحوس لك اللوك بما انو واتر بروف .

السعر : 55 ريال .


الكريم لاينر Creme Eyeliner واللكود ايلاينر Liquid Eyeliner :
الكريم لاينر من اسمه واضح انو كريمي يذكرني بتركيبه ولون الكريم لاينر من انجلوت لو مجربينه قبل ،، اما اللكود ايلاينر ضد المويه سواده قوي وثابت ،، طرفه دقيق جداا وهذا يساعد انك تتحكمين بحجم الايلاينر سواء كان نحيف او عريض .

السعر : الكريم لاينر بـ73 ريال و اللكود لاينر بـ79 ريال .



البراو جل Brow Gel و الدفاين جل Define Gel :
مسكره الحواجب او جل الحواجب ابهرني الصراحه لأن عاده الأنواع الي تكون بلون قاسيه على الحواجب وما يبين شكلها حلو :/ هذي تركيبته خفيفه ولونه مثاااالي للي شعرها اشقر او فاتح وتبغى تفتح حواجبها مره طبيعي فيه لمعه خفيفه هي الي تبينه بهالجمال مايصير مكتل او ميبس مثل بعض الأنواع الثانيه ، لو شعرك فاتح لا تترددين تجربينه انا ما ناسبتني درجته لأن شعري اسود .

اما الديفاين جل نفففس فكره البراو بوميد من انستازيا لكن أكثر كريمي وخفه على الحواجب و لونه جدا قوي نقطه منه تكفي الحاجبين كلهم وأكثر اول ما جربته على بالي راح يكون قاسي فدخلت الفرشه بقوه وحست الدنيا ما دريت انو كريمي لهذي الدرجه .
اثنينهم المسكره و الدفاين جل ضد المويه وهذا يضمن لك ثبات أعلى .

الدرجه : المسكرة Olive و الدفاين جل Russet اللون مايل للرمادي .
السعر : 55 ريال ، 61 ريال .



المنتج الأخير هو الهايلايتر Glow Dust وللأسف وصلني مكسور ما اعرف كيف مع انو مغلف من برا ومن جوا بس عموما راح اصلحه بفكس بلس لأني حبيت الدرجه مره مره وراح اوريكم سواتش لها تحت :





شايفين قد ايش الدرجه حلوه ♥♥♥  للي تحب الهايلات الخفيف اقرب ما يكون لمعه او جلو من البشره نفسها راح تحبه ،، انا افضل الهايلايت القوي الي يبين من بعيد ما اعرف ليش احب كل ملمع هههههههههههههه وهذا خفيف بالنسبه لي علشان كذا افكر اخليه استخدام صباحي لمن ابغى اسوي ميكب خفيف او للجسم في المناسبات على اليدين والساق والصدر للرقبه مررره يحلي اللوك ويبين البشره صحيه وجلوي أكثر مستحيل استغني عن هذي الخطوه لو كنت لابسه فستان يبين هذي المناطق .



باقي المنتجات كانت مغلفه لفتتني لكن لمن فتحتها كانت نفس المنتجات الي فوق بإختلاف الدرجات يعني معطيني خيارات أكثر  :


اكحال العين و محددات الشفايف ، كلهم ضد المويه وكريميين سهلين في الإستخدام وحبيت الألوان الفاتحه أكثر لأنها وااضحه وفيها لمعه جميله ♥ 


والفرشه هذي من نفس مجموعه الفرش الي فوق الإختلاف في شكلها من فوق والتطريز او الكرستال الي عليها علشان كذا هي لمتد ادشن وتعتبر الأغلى فيهم سعرها 104 ريال تذكرني بفرشه ريل تكنيك البفنق من مجموعه الوجه لو تعرفونها الفرق انو هذي أكثر كثافه بالشعر .

ككل الماركة جددا جميله وتستاهل التجربه صراحه مره متحمسه استخدمها فتره اطول حتى اختار مفضلاتي والتوب منها .
جوده المنتجات مقارنه بالسعر رائع خصوصا انو فيها ماركات ثانيه في السوق بنفس الأسعار لكن اقل جوده والي حمستني عليها زياده مثل ما قلت فوق انها ماركة خليجيه ولي الشرف ادعم واجرب اي منتج خليجي اذا حصلت لي الفرصه ♥ شكرا K7L على اتاحه الفرصه لي لتجربه منتجاتهم وشكرا لكم متابعاتي على دعمكم المستمر سواء كان هنا او في انستقرام وغيرة ♥♥ مهما سويت ماراح اكفي حقكم ♥♥♥


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

ليست هناك تعليقات:

إرسال تعليق