السبت، 27 أغسطس، 2016

SHISEIDO | تجربتي لشسيدو "بايو برفورمنس جلو رفايفل كريم" ♥


السلام عليكم ورحمة الله وبركاته ♥ 
حكيت لكم في انستقرام زمان بشكل مبسط عن ماركة شسيدو ومنتجاتها ،، بعد فتره من تجربه كريم الوجه قررت أكتب تدوينه عنها وأضيف عليها المعلومات المختصه بالماركة ومنتجاتها حتى يكون عندك صوره واضحه قبل ما تشترين منها بما انها تعتبر من الهاي اند وأسعارها مو رخيصه !! 

نبذه عن شسيدو :
شسيدو ماركة يابانيه صاحب الماركة رجل ياباني في عام 1872م إفتتح اول صيدليه على النمط الغربي في اليابان نمت الصيدليه وكبرت وتطورت لحد ما صارت وحده من أكبر الشركات تأثيرا وفي عام 1897م أنتج أول منتج لماركة شسيدو وبعدها بدأت تطلع المنتجات وتكبر الماركه داخل اليابان وخارجها لأمريكا وباقي دول العالم لحد ما صار عندهم 88 فرع مابين البلدان و المناطق في العالم واليوم صارلها 144 سنه موجوده ولها بصمه في عالم التجميل و العنايه .
في الرياض موجوده فقط في هارفي نيكلز الفيصليه و باريس جالري غرناطه وفي الخبر في باريس جالري الراشد مول وفي جدة في باريس جالري التحلية وجواهر سنتر وباقي المدن ما اعرف ابحثو في جوجل أفضل . 


Shiseido BIO-PERFORMANCE Glow Revival Cream :


اليوم راح احكي لكم عن رأيي وتجربتي لمرطب البشره بايو برفورمنس جلو رفايفل كريم الي هو مرطب ليلي ونهاري .
المنتج فيه 50ml وللأسف ما أتذكر سعره أبببدا اتذكر اني سألت لكن مع الأيام واسعار المنتجات الثانيه نسيت تماما ولا يمديني اروح اسأل مثل ما سويت لسيروم ديور هنا لأني جدا مضغوطه هذي الفتره :( 
المنتج يجيك في علبه رماديه انيقه عاكسه وهذي مشكلتي في التصوير ما عرفت اصورها تعععكس مثل علبه الكريم نفسها يعني انجاز الصراحه انو ما بين شي في الإنعكاس لمن صورت + العلبه تطبع عليها آثار اصابعك مع الإستخدام وهذا الشي ينرفز ما احب تبين بصمات الاصابع على اي منتج تحسسني بإنهم مو نظيفين ، هذي عيوبهم في التعليب غير انو العلبه ثقيله وكبيره يعني فيها اضافه تعليب أكبر من كميه الكريم نفسه تمنيت لو كانت اصغر وأخف لكن الثقل احيانا يدل على جوده الصنع وفخامه المنتج وأغلب الماركات الكبيره تفضل تكون منتجاتها ثقيله وعلبها ملفته حتى تكون مثل الديكور فوق التسريحه ولفت نظر الزبون او الشخص ،، المرطب أخذ البيوتي اوورد وينر لعام 2015 .



المرطب مناسب لكل البشرات والمفروض استخدامه يكون مرتين في اليوم لكن انا  بشرتي حاليا ومع حراره الصيف والرياض تحديدا صايره دهنيييه علشان كذا مستحيل أستخدمه في النهار لأن تركيبته كريميه مرطططبه ولو استخدمته في الصباح عند الشمس عشر دقايق وتقلب بشرتي دهن مع انو البشره تمتصه بسرعه لكن الحراره ما ترحم علشان كذا إكتفيت بإستخدامه في الليل قبل النوم وفي الصباح تبين النتيجه لكن ككل النتيجه الي راح اقولكم عنها ما تعتبر قويه لأني أخليت بطريقه استخدامه يعني النتائج الي حصلت لي تعتبر النص ولو استخدته مرتين راح تكون النتيجه أفضل علشان كذا في الشتاء راح أرجع اجربه بحيث استخدمه مرتين مره في الصباح ومره في الليل إن شاءالله. 


المنتج يوعدك بترطيب قوي وليونه وسلاسه في البشره وأكثر إشراق وحيويه من الإستخدام الأول وبعد أسبوع يوعدك بتحسن لون البشره وتقليل البهتان وتضائل الجفاف والخطوط الدقيقه بالبشره اما بعد شهر من الإستخدام راح تلاحظين حاله بشرك مستقره ، مقاومة للجفاف ، قل الإحمرار ، المسام و التجاعيد تخف لأن البشره استعادت ليونتها والبهان اختفى .

بالنسبه لي بشرتي مافيها مشاكل لأني اعتني فيها من سنوات فممكن الفروق ما تبين معي قد ماراح تبين على الي بشرتها اما معدومه او ماوصلت لدرجه المثاليه في العنايه وكثره إستخدام المنتجات في الروتين الخاص للعنايه بالبشره .
من أول إستخدام كنت توني ماخذه شور ومع حراره البخار البشره صارت لينه ،، استخدمت مقشري و غسول نيتروجينا وقتها لأن بشرتي كانت دهنيه جددا وبعدها استخدمت ماسك ذابودي شوب بطين البحر حتى يسحب الدهون وطبعا بعد كل هذي المنتجات القويه الي استخدمها للبشره حتى تسحب الدهون والأوساخ الترطيب الي فيها صار 0 فأحتاج مرطب قووي او مرطب يرجع لي الترطب الي تحتاجه بشرتي فهذا كان الحل المثالي وبجد من أول استخدام حسيت بشرتي كأنها بشره طفل أو بيبي !!!! نعومه نعوووومة ومرونه وليونه في البشره في لحظه دمجه يعني بجد راح تلاحظين كل الي ذكره لك فوق في اليوم الأول .
سلس وينمد على البشره بسهوله ولا يترك البشره مدهنه او مقرفه هذا غير ريحته الحلوه ماهي معطره لكن ريحه كريم عنايه يعني ، صارلي تقريبا شهر ونص الى شهرين استخدمه على بشرتي ورقبتي يوميا الليل فقط والحمدلله لاحظت الصباح بشرتي فيها تورد او مورده من الرطوبه والنعومه ،، الخطوط قلت بنسبه كبيييره حولين العين و الشفايف لأني استخدمت منتج ثقيل يرطبها ويعبيها خلال وقت نومي علشان كذا الصباح تبين النتايج .  

للأمانه ما لاحظت تفتيح في لون البشره يعني بشرتي لونها مثل ماهي بس آثار وتصبغات الخفيفه بعد الحبوب راحت واستوى لون البشره + ما لاحظت إشراقه أو نضاره منه لكن إستخدام مويه الورد قبله والتوريد الي يعطيك اياه يخلون بشرك مشرقه اما لوحده ماراح تفرقين من هذي الناحيه .



المنتج يجي معاه ملعقه بلاستيك صغير بحيث تستخدمينه علشان تطلعين المنتج ما تاخذينه بيدك انتبهي حتى ما تنتقل الجراثيم ،، الكميه الي احتاجها لكامل وجهي ورقبتي هي الي تطلعها الملعقه من المره الأولى وهذا يعني بأنك تحتاجيم كميه بسيييطه وراح يدون عنك المنتج لشهور قدام  .

ككل حبييييته لكن تمنيت ما فتحته الا في الشتاء لأني ضامنه النتيجه بتكون أفضل 100% مره بما انو بشرتي دهنيه لكن لو بشرتك جافه او عاديه انصحك فيها بأي وقت خصوصا قبل النوم راح تلاحظين فرق كبير ،، المرطب جميل جدا وأشوفه هديه رائعه لأمك او أختك أو حتى صديقتك ملينا من المكياج والعطور كهدايا وكل وحده لها ذوقها فيه لكن في المرطبات وهذا النوع بالذات مناسب لكل أنواع البشره + جوده المنتج والماركة نفسها معروفه للعنايه فماهي خساره اببدا ،، وقت العيد قرب ولو تفكرون تهدون او تهدين نفسك فررصه لا تفوتينه ولا تفوتين منتجات الماركه نفسها  .


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك تعليقان (2):

مدونة الياسمين يقول...

يسعدك ربي على التدوينة من زمان انتظرك تتكلمي بالتفصيل عن الكريم وشجعتيني اشتريه 🖒😚😍

Futon AlZubaidi يقول...

مره اتحمست للكريم ♥♥
يعطيك العافية حبيبتي ♥

إرسال تعليق