الجمعة، 12 أغسطس، 2016

Mikyajy event | تغطيتي لإيفنت مكياجي + تعريف للكولكشن الجديد !!♥


السلام عليكم ورحمة الله وبركاته 
الإثنين الي فات كان إيفنت ماركة المكياج " مكياجي Mikyajy " ولو متابعيني سناب او حتى ستوري انسقرام أكيد شفتو التغطيه للإيفنت والا ؟؟ لا يكون سويتو سكيب :(  عموما سألتكم في انستقرام لو حابين أكتب تدوينه كاملة تغطيه للإيفنت مثل ما سويت لإيفنت ديور في رمضان هنا والأغلب حب الفكره فأخذت الكميرا معاي حتى أصور لكم وأشرح كل المعلومات بالتفصيل في المدونة حتى تبقى للي فاتها  ...
ملاحظه مهمه ،، كل التفاصيل حتى السخيفه راح اكتبها لأني احب اتعمق بكل شي في المدونه ولو مو حابه تقرأين كل شي انزلي لصور المنتجات في الأخير .

مكياجي ماركة سعوديه للي ما تعرف ، الفتره الأخيره ماكان لها حس في السوق لكن هذا ما يمنع انو منتجاتهم حلوه وأسعارهم أحلى وعندي منهم ميكب كثير مثل الايشادو والأرواج و المحددات والبلشرز وغيرها أحبها مره وكانت من الماركات الأولى الي أجربها لكني وقفت أجرب جديد منهم واكتفيت بأني ارجع للمفضلات القديمه من منتجاتهم لأن الماركات الكبيره جذبتني أكثر بس بعد ما شفت في الإيفنت صور للمكيب ومنتجاتهم ورجعتهم للسوق بشكل أكبر تحمست ارجع للمحل وأشوف ايش الجديد وراح أصور لكم سناب بإذن الله .



وصلت للإيفينت متأخره ربع ساعة كالعاده :( مهما حاولت نهايتي اوصل متأخر ... عموما وصلت ولمن دخلت وسألت عن المكان قالولي انو اصحاب الإيفينت نفسهم ما وصلو ، من الله جت الحمدلله ههههههههههههه لكن كان فيه قبلي اربعه بلوقرز وصلو مع الوقت ماشاءالله .
الإيفينت كان في كفالي كافيه والمعروف لا يعرف يعني صراحة واحد من أفضل الكافيهات الي جربتها في الرياض ولو ما جربتوها لااازم تروحون خصوصا فرع رافال لأنه الأفضل من وجهه نظري من كل النواحي بدايه من الخدمة للنهاية . 



ضيفونا عصيرات الي في الصوره الأحمر شايفينه ؟ ما أعرف ايش هو ولا حبيت اجربه واذا ما أعجبني اتركه وينرمي بعدين حرام نعمه فما ورطت نفسي من البدايه :) 
وأعطونا المنيو نختار من المشروبات لحد ما يوصلون الباقين .



الأنواع كثيييرة واحترت بينهم لأاني ما أشرب قهوة كثير فما أعرف الأنواع لكنه مدح نوع معين اسمه Irish Latte وبجد طعمها لذيذ جربوها راح تحبونها .



اليوم الي قبلة كان الأيفنت بجده علشان كذا تأخرو في الوصول يوم الإيفنت اذا مو غلطانه انهم طلعو من المطار للأيفينت او من الفندق يعني عموما التأخير كان إجباري ،، طلعو العطور والميكب وباقي الكولكشنز الجديده والي راح تنزل قريب ومنها اللمتد ادشن وراح اشرح لكم عنها تحت أكثر .


قبل ما ابدا حابه أشكر شخصين ، المانجر بتول مديره فرع مكياجي بجده شكرا الله يعطيك العافيه ♥ و المانجر مريم صاحبه الدعوه :


 Thank you for inviting me it was my pleasure to attend and meet with such lovely ladies ✨. GA

+ كان لي الشرف أقابل بلوقرز الرياض مره ثانيه مثل رغد بيوتي ونورة بيوتي بوكس وريفا بيوتي وساره وميرامود و العنود ولين ♥ الله يسعدهم حبيت جمعتنا يدخلون القلب وإن شاءالله أقابل بنات أكثر في الإيفنتات الجايه يآرب ♥♥♥


راح ابدأ معاكم بالعطور ،، عرفونا على 5 مجموعات 3 منهم متوفرة بالمحلات لها فتره وتنباع و 2 منهم جداد وما توفرو للحين راح ينزلون في المحلات في نهايه السنه تقريبا ،، شرحو لنا عن كل عطر في المجموعه وعن مكوناته لكن مع الإندماج نسييييت اصورها حتى أكتب لكم  والحين نسيتها :/ 
الشكوى لله حتى في موقعهم ما لقيت وصف او صور للعطور لو لقيت بعدين راح أحدث التدوينه وأعطيكم خبر ان شاءالله . 
يعني شميت 16 عطر فأكيد ماراح أتذكر الا المميزين منهم بالنسبه لي والي حبيتهم ،، الناس في العطور أذواق وصعب تلاقين وحده نفس ذوقك علشان كذا ممكن الي راح امدحها تحت تكون ذوقي لكن ما تعجبك فالحل تروحين بنفسك وتشمين وتحكمين بالأنسب لك لأن انتي الي راح تستخدمينه بالنهايه ، العطور الي ما أذكر مكوناتها معناته ما اتذكر راح اتركها فاضيه واركز على الي اعرفهم .



المجموعه الأولى هي مجموعه صبايا نفسها القديمه والمعروفه لكن بتعليب جديد وفيها 4 عطور (مون لايت / صبايا الاورجنال / بردايس / سباركل) مون لايت و صبايا الاورجنال هم اكثر اثنين حبيتهم من المجموعه وللأسف ما أتذكر ايش الي ميزهم وايش المكون الي اعجبني فيهم ،، بردايس ريحته بااارد والفانيلا فيه طاغيه مو ذوقي لكن أعجب البنات ،، سباركل عباره عن فلورل ورود ومسك مو ذوقي لكن ريحته أهدى واحلى من بردايس بالنسبه لي .
ريفا بيوتي البلوقر معي بالايفنت تقول صبايا الأورجنال يذكرها بعطر دكني !!



المجموعة الثانيه فيها 3 عطورات وروائحهم تميل للعطور الشرقيه أكثر ، الأول من اليسار وايلد سول أكثر واحد حبيته من المجموعة ،، فيه عنبر ومسك ريحته فخمه مع انو فيه خوخ لكنه قوي و يميل للروائح الشرقيه ، روعة وقلت لكم في السناب انو اعجبني وراح اشتريه مع نوع ثاني ان شاءالله .



المجموعة الثالثه فيها 3 عطورات ، اول واحد من اليمين تيزمي هو الي أعجبني من مكوناته الكيوي وباشن فروت والخوخ والقاعده فيها مسك وأخشاب الصندل والفانيلا ريحته غريبه لكني حبييييته مره مره وهذا النوع الثاني الي قلت راح آخذه مع وايد سول.



اما بالنسبه للمجموعه هذ ما نزلت لكن فيها 3 عطور النواع الي حبيته منهم هذا :



ليش ؟ ايش مكوناته ؟ ما أعرف هههههههههه كل الي اتذكره اني بعد ما سمعتها تشرح عنه وشميت ريحته وأعجبتني صورتها علشان اتذكر النوع لو نزل اجربه في محلهم ،، باقي مجموعه ما صورتها لكن اروجعو لأول صوره فيها العطور المجموعه هي ثاني وحده من اليسار ،، برضو ما نزلت لكن روائحهم هاااديه وجمييلة جدا تذكرني بالبحر المجوعه فيها 3 عطور حبيت نوعين : الأول اسمه آكوا جلو حلو بعد الشور و النوع الثاني اسمه هيفنلي ايلاند ريحته فواكه وأزهار شخصيا ما احب الروائح هذي على نفسي لكن احب ابخ منهم في دولاب البجامات علشان تعطرهم ووقت استخدامه ريحتها تجنن .



الأسعار :
بالنسبه لأسعار العطور لوحدها ب129 ريال لـ50ml ومع كل عطر فيه منه مجموعه تحتوي على العطر و لوشن و شاور جل بنفس الريحه وسعر المجموعه ب179 ريال وفيه بعد بودي مست نفس ريحه العطور ينباع لوحده بـ59 ريال وعندهم عرض على البودي مست لو اشتريتي 3 راح يكون بـ139 ريال ولو اشتريتي 5 راح يكون بـ179ريال يعني لو بغيتي تهدين استغلي العروض هذي :)




خلصنا من العطور وانتقلنا للمكيب لكن قبل ضيفونها موالح وعصيرات انا اخترت عصير اسمه (ذا هاربور) فيه فراوله و اناناس و برتقال ما توقعت راح يعجبني لكنه لذيييذ ولين بيوتي جنبي جربت (موهيتو التفاح) فيه نعناع وتفاح أخضر وزنجبيل . قلت لكم قبل انا احب كفالي كافية علشان كذا ما خاب ظني لمن اخترته بجد لذيذ !! 




عرضو لنا كولكشن الأرواج الجديدة ،، فيه كولكشن ارواج موجود في محلاتهم لون تعليبهم ذهبي عرفتوه ؟؟ اتوقع اسمه 22K المهم انهم مطفيين وثباتهم طويل لكن ممكن تكون جافه على البعض علشان كذا هذي المجموعه الجديدة كريميه وترطيبها عالي لان داخل في تركيبتها الزيوت بحيث تضمن لك نعومة طول وقت استخدامها وخيارات الدرجات فيها كل لون تبغينه طبعها أكيد الي في الصورة مو كلها ههههههههه هذي بعض من الدرجات الي جربتها ، فيه 36 لون 12 منها من درجات الوردي و7 من درجات البنفسجي و5 من درجات المشمشي و البرتقالي و5 من درجات الأحمر الجريئ و7 من درجات البني الراقي ،  والأهم من هذا كله انو فيها حمايه من الشمس بنسبه spf15 بحيث لو استخدمتيها الصباح وطلعتي للشمس شفايفك محميه وماراح يغمق لونها بإذن الله (نقطه مهمه انتبهو لها لو كنتو من النوع الي تطلعون للشمس لازم يكون عندك مرطب او روج فيه حمايه لأن الشفايف تحترق زي البشره).



الي أعرفه انو الأرواج الي تبدأ بـ 200 هي الدرجات الزهريه والأرواج الي تبدا بـ 300 هي الدرجات البنفسجيه او الموف ،، من الي جربتهم وحبيتهم هي الدرجات هذي وسواتش لهم على يدي هنا بنفس الترتيب :


الأسعار :
سعر الواحد ب49 ريال لكن عندهم عرض لو اخذتي 3 راح يطلع المجموع 99 ريال يعني تقريبا الثالث مجانا ،، عموما عروضهم على الأرواج دائما حلوه وانا استغلها اذا اعجبتني درجات معينه لأنه يطلع لي بسعر أرخص .



اما بالنسبه للكولكشن الثالث و الأخير هي مجموعة الخريف/شتاء إسمها سبليندور "لمتد ادشن" يعني مجرد ما تنتهي من الأسواق ماراح يرجعونها :(
الكولكشن عبارة عن :



6 منتجات ، بلشر مطفي بـ3 درجات جميييلة وناعمه من درجات الوردي و الخوخي. والآيلاينر بطرفين الطرف الأول كحل كريمي راسه حاد وصغير يساعد بأنك ترسمين بدقه والطرف الثاني ايشادو كريمي بلون مختلف على الكحل لكن قوه اللون وحدته مثل ماهي قويه وثابته وفيه منه 6 درجات مختلفه مابين البنفسجي والأزرق والبيج والذهبي والبني . 
قلم الحواجب بطرفين الطرف الأول عباره قلم ملون ومركز قوي وكريمي والطرف الثاني هايلايتر كريمي واضح ومطفي جميل جددا لأنه يحدد الحاجب بسهوله سهل دمجه لأن تركيبته كريميه وفيه منه أظن 3 درجات .
كونتور الشفايف بطرفين عبارة عن روج الطرف الأول محدد صغير ودقيقه يسهل عليك رسم الشفايف وتحديدها والطرف الثاني روج من نفس الدرجه حتى تعبين الشفايف كلها بشكل أسرع وبكذا تكون رسمه الروج نظيفه وثباتها أعلى ، فيه منه 6 درجات متنوعة مابين الأحمر و البنفسجي .
مجموعه مناكير أظافر مثل هذي : 


وآخر منتجين في الكولكشن هي شنطه الميكب صغنونه كأنها  جلد لونها بيج ومن الداخل مبطنه بلون عنابي حلوه للميكب في الشنطه حتى ما تاخذ مساحه والمنتج الثاني هي الفرشه المشطوفه تذكرني بفرش ماك 168 او سيقما F40 بشكلها ،، شعرها نااااعم ومبين انه صناعي لكن شعرها كثير ومتجمع يعني قويه تنفع للكونتور والبرونز مره حبيتها جودتها ما توقعت تكون بطله كذا لاااازم تجربون بنفسكم في المحل على سعرها ما تفوت ابدا والديتيلز على المسكه حقتها تجننن فيها دانتيل حبيتها مره مره .

الأسعار:
بالنسبه لسعر البلشرز وقلم الحواجب و آيلاينر العيون و كونتور الشفايف و الفرشه سعر الواحد منهم بـ59 ريال وعليهم عرض اذا اخذتي من نفس القطعه 3 حبات يطلع لك المجموع 139 ريال .
اما بالنسبه لمجموعة المناكير سعرها 99 ريال ولو أخذتي 3 مجموعات راح يطلع لك المجموع 199 ريال.
والأخير الي هي الشنطه سعرها 39 ريال وماعليها عروض .



ماشاءالله ، حبيييت تقديمات الحلى حقتهم لذيذه ولما سألتهم عنها أظن انها مخصصه للإيفنت ما يسوون مثلها في الأيام العاديه :/ لا يارب بروح المره الجابة واتأكد لأن الي بالتوت اعجبتي مره وحتى الي بالتشوكلت خفيفه ولذيذه . 




مكياجي كانو كريمي وقدمو لنا هدايا في الأخير فيها درجه من كل منتج ميكب تكلمو عنه مثل الروج وقلم الحواجب و البلشر و الايلاينر وعطر واحد وصادف العطر كان من النوع الي حبيته وابغى اشتريه فوق الحمدلله مع شنطه الميكب و الفرشه و بودي مست .



بإذن الله بس أجربها راح أكتب لكم رأيي عنهم وإذا ناسبوني او لا ♥♥


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك 3 تعليقات:

Noura non يقول...

عندي روج منهم احبه مره اتوقع اني قد استخدمت خمس او ست علب !
واخر مره رحت قالت لي انهم بيجددون اشكال الارواج واحتمال تتغير بعض الدرجات فاخذت لي باك اب :( اسمه كريم كراميل من الارواج اللي من برا ذهبيه جربيها اذا رحتي لهم وباقي موجود جميل مره

شكراً على التغطية الجميلة اكثر شيء تحمست اجربه الارواج والبلاشر شكله جميل مره

يعطيك العافية♥

Futon AlZubaidi يقول...

أنا شفت الايفيت على السناب و على ستور انستقرام :D ♥♥
مره حبيت تغطيتك للايفيت و المعلومات مره جميله ♥
حسيت في تغير و تطور كثير على مكياجي من العطور و الميك اب
مره حمستيني اروح المحل و اجرب الكولكشن الجديد و اكثير شي الارواج و العطور ♥♥
يعطيك العافية حبيبتي ♥

مدونة الياسمين يقول...

احس هذة الماركة مظلومة كثير بالرغم من انه عندهم اشياء حلوة 🖒 حبيت التقرير يسعدك ربي😘

إرسال تعليق