الجمعة، 5 أغسطس، 2016

Disappointing products | منتجات ما ناسبتني ...💔


السلام عليكم ورحمة الله وبركاتة ♥
تدوينة اليوم مختلفة عن الي أكتبهم عادة وتعتبر المرة الأولى الي اكتب زيها في المدونهة لأني في البداية كنت ضد منطق "منتجات فاشلة" لأن الي ما يناسبك ممكن يناسب غيرك والعكس ،، لكن لمن فكرت انا راح اكتب رأيي وليش كرهتها وليش ما ناسبتي هذا ما يعني انو المنتج سيئ لكن ما كان الأفضل لي بناء على لون بشرتي ، نوعها ، تركيبة المنتجات الي احبها وغيرها .

وحابه أوضح نقطه مهمة البشره مع العمر تتغير وتفضيلك للمنتجات برضو يتغير مع الايام يعني ممكن منتج مدحته قبل سنتين الحين راح اذمه ليش ؟؟ لأن تفضيلي للمنتجات تغير ، لأني جربت غيره ولقيته افضل واكتشفت عيوب هذا النوع المهم في الموضوع مو رأيي السابق لا المهم هو الحين ايش رأيي فيها لأن فيه منتجات حكيت لكم عنها قبل 3-4 سنوات في انستقرام وكنت وقتها احبها لكن الحين اذمها وبشده لأنها ماعاد تناسبني.

ومعلومه ثانيه ،، الميكب الي ما احبه وما يناسبني اطلعه ما احب اخزن واركمهم في الدرج وهي ممكن تناسب غيري لكن هذا الي باقي عندي .




عجله الكونسيلر من كريولاين :
من ايام منتدى الإقلاع والبنات مطيرييييينه للسماء ومخلينه سحر للبشره فتوقعته راح يناسبني مثل ما ناسب الكل لأني مالقيت ولا وحده تذمه ،، رحت لفرعهم في حياة مول وكل مره تقول مخلص وصادف في يوم لقيته وأخذته ولمن فتحته في البيت استخدمه انصدمت بتركيبته !! ثقيلة مره مره مره 
يعني لتحت العين مستحيييل ينفع ولو انو مو للعين اصلا ، للآثار ممكن يفيد لكن ماهو طبيعي على البشره ومعروف منتجات كريولاين مو مخصصه للإستخدام اليومي او علشان يبين طبيعي اصلا لكن توقعت يطلع حلو ويناسبني بس للأسف لا .
درجاته غريبه  على اندرتون بشرتي احس فيها اخضر او احمر قوي ما يبين حلو علي ، صعب في الإستخدام لأنه ثقيل يحتاج تمررين اصبعك كثييير حتى يذوب شوي ويطلع على يدك وبعدها ابدي مرحلة الدمج الي تاخذ ساعه علشان يبين طبيعي عموما ما حبيته ولا ناسبني لأنه اثقل من الي احب استخدمه عاده وبعد ما جربت عجله فورايفر52 رميت هذا في الدرج ،، تكلمت عن عجله فورايفر52 "عجلتي المفضلة دائما"!! هنا .




سويت هارت بلش من توفيسد :
قبل سنتين ممكن او سنه وفيها رحت لسيفورا وقتها كان كولكشن توفيسد الجديد نازل ومن ضمن الكولكشن هذا البلشر اول ما شفته انبهرت بشكله اعجبني مره مره قررت آخذه بدون ما أجربه حتى لأن اصلا ماكان فيه تستر على كلامها "لأنه لمتد ادشن" المهم اني اشترتيه ورجعت للبيت وجربته ، ماراح اقول انو سيئ لأن السبب الي خلاني اشتريه الصراحه هو شكلة هههههههههه بخليه ديكور لغرفتي ،، من الداخل فيه ثلاث درجات تستخدم مع بعض او لوحدها ، اللون مره مره خفييييف وفيه لمعه واضحه مو جلتر بالعكس لمعه طبيعيه ( هليثتي جلو )،، قوه ووضوح اللون خفيفه ويحتاج اعيد عليها كثير علشان يوضح والسبب انو لونه افتح من بشرتي علشان كذا ما يبين علي خصوصا لأني احب اخلي الميكب تان هذا يزيد الطين بلة يخليه مو واضح ، ما اقدر احكم على ثباته لأنه ما يوضح علي اصلا هههههههههه ككل هو حلو لكن للبشرات الفاتحه جددا وتقريبا بيضاء ! علشان تكون النتيجه افضل تعتمد على لون بشرتك وانا اشوف البلشر حلو الصراحه لو كنتي بيضاء جربيه لو لايزال موجود اصلا لاني اشوفه في سيفورا الفتره الي فاتت ونزلو منه درجات أكثر  .  




باليت ايشادو شانيل :
هذا النوع وقفوه اصلا من زمان ماعاد يسوونه الحين حسنوه وغيرو تركيبته وصارت أفضل بمراااحل  لكن عيب هذا النوع بعد ما جربت ايشادوات ميكب جيك وماك واربن ديكاي وغيرها من الماركات المعروفه بجوده وقوه الايشادو فيها انو شانيل الوانها باهته ، لونها خفيييف مع اني كنت افضلها قبل واحسب انو الوانها قويه يا حسرتي ما جربت غيرها لأني ههههههههههههه .
ثباتها صفر لو ما استخدمتي برايمرقبلها ،، فيه عندي الوان ثانيه منها والي احبه فيهم انو الوانهم مميزه و استخدمها لليوم لكن مو لوحدها لاااازم استخدم باليت ثاني معاها حتى يوضح الالوان ويزيد الثبات ويجمله عموما .
مادامها عندي استخدمها لكن لو ماكنت عندي ما راح اشتريها ، أفكر اجرب الايشادوات الجديده منهم مين جربتهم ؟؟




هايلايتر سوفت اند جنتل من ماك :
لليوم ما أعرف ليش ما ناسبني ! ليش يطلع حلو على غيري وعلي لا ؟ هو حقي خربان والا الهايلايتر هو كذا ؟
اول ما شريته كنت متحمسه له لكن يوم جربته خاب ظني لونه اشهب ، فيه قطع جلتر تجيب الهم مو طبيعي على البشره ابدا ولا يندمج اصلا مجرد ما امرر الفرشه على بشرتي يتفتت بكل وجهي يصير مقرف .
حاولت امسح واقشر الطبقه الأولى منه يمكن تكون خربانه بس ماش المنتج ما ناسبي ، لونه مو حلو علي صاير رمادي ابيض تركيبته جافه ما تمسك بالبشره وتتفتت بسرعه والأسوء من كذا تبين عيوب البشره من مسام وخطوط وغيرها ولو انها خفيفه هي تبرزها ولو قربت وحده منك مصيييبه لكن لازلت مصرة انو حقي خربان لأن التستر الي في المحل حلو ليش الي عندي شين :(




فاونديشن دريم مات موس من ميبلين :
ما اصدق اني كنت استخدمه ، اول فاونديشن جربته في حياتي وابسط ما يقال عنه بشع ، هو بشاعه في الدرجات والا بشاعه في الفنش حقه والا الثبات والا التغطية يعني صراحه مصدومه يبزر كل عيوب البشرة من مسام وخطوط وآثار ويطلع لك عيوب جديده اصلا ، درجات الألوان عندهم مو حلوه كلها ورديه ، يبرز الجفاف  القشور الي في بشرتك مره يعني البشرات الجافه مصيبه لو استخدموه ، يدهن بعد كم ساعه مع ان تركيبته المفروض تكون جافه ! ، ولأن تركيبته زي الموس يصعب دمجه الا بفرشه بفنق لأن الإسفنجه ممكن تبينه مبقع !
ما حبييته ولا ناسبني ووضح الفرق كيف انه سيئ علي بعد ما استخدمت فاونديشن من ماركات كبيره مثل ميكب فورايفر وماك وشانيل وغيرها .




فوتوريدي سكن لايت لكود هايلايتر من ريفلون :
ما اعرف ايش فكره المنتج بالظبط لأنه ما يعطي اي نتيجه سواء استخدمتيه او لا يعني ضياع فلوس على الفاضي ، هو المفروض يكون زي اللكود هايلايتر او اللمعه الطبيعيه الكريميه تبين مع الاضاءه لكن للأسف مو واضحه ابدا ابدا جربت كل الطرق ولا فاد !
حاولت استخدمه تحت الفاونديشن وحاولت اخلطه مع الفاونديشن وحاولت استخدمه فوق الفاونديشن وقبل الهايلايتر الباودر لكن للأسف النتيجه وحده : ولا شي .
مافيه لون اصلا اذا طلعتي من العلبه تتوقعين بيطلع حلو ويلمع لكن مجرد ما تدمجينه يختفي تماما يطلع زي المرطب لا أكثر ولا أقل .

هابي لايت مات برايمر من بورجوا :
برايمر من بورجوا مطفي يناسب البشرات الدهنيه .
طيب ، لو راح اتكلم عن فعاليته بأنه يخلي الوجه مطفي طول اليوم انا معه جد يخلي البشره مطفيه لكن متى !!؟ بس اذا خليتيه آخر خطوه يعني ما تحطين ولاشي فوقه ولاااااشي فوقه طيب كيف هذا وهو برايمر يعني ما ينفع استخدم فاونديشن فوقه ! لا ما ينفع ابدا ابدا وهذا الي كرهني فيه مجرد ما تدمجين اي سائل فوقه يبدا يتقشر البرايمر ويطلع قشور يحوس لك الميكب كللله يطلع مقرف ، بلشت فيه الحين ما ينفع استخدم فوقه برايمر ولا ينفع اخليه آخر خطوه في الميكب بعد وش الفايده يعني :/
صرت استخدمه في الايام الي ما استخدم فيها ميكب مثل الجامعه مثلا استخدم مرطب البشره وكريم حمايه شمس وبعدين البرايمر وبس بكذا يساعد البشره تكون مطفيه ومات لأطول فترة ممكنة .



ارواج ايف سان لوران الكريمية :
حكيت لكم عنها قبل ، سيئه لأنها كريميه بزياده لدرجه تطلع برا حدود الشفايف وتدخل جوا الاسنان اذا ضحكتي أسانك كلها روج يعني مقرفه !
اللون الي اخترته ما ناسبني لأنه فاتح بزياده لكن رحت اجرب لون ثاني على اساس العيب كان من اللون لقيت الكل فيهم نفس التركيبه علشان كذا ما اخذت ثاني ، لكن حرام ارميه فصرت اخلطه مع ارواج جافه مثل اللكود لبسك علشان تكون التركيبه اقل جفاف واقل كريميه يعني بينهم وبكذا استفدت منه لكن لحاله مستحييييل ارجع استخدمه .

جلوس من لوريال & جلوسات ابوكالبس من ريميل :
الوانهم حلوه ومريحين على الشفايف ما يضايقون ولا يلزقون في الشعر وثباتهم برضو حلو لكن ريحتهم زباله الله يعزكم مالقيت كلمه توصف كميه القبح و البشاعه في الريحه من قوتها اذوقها في فمي مقرفه جددا ما قدرت استحملها لثانيه حتى مع انهم جداد ما استخدمتهم غير مره بس اعطيته لأحد غيري على طول ما أقدر وأعرف نفسي ماراح استخدمها بس حسافه الدرجات الحلوه :(

تنت الشفايف من سيفورا :
عاده لمن اسمع تنت يجي في بالي لون حلو وتركيبه خفيفه بقوام مويه مثل تنت بنفيت مثلا لكن هذا يختلف تماما ثقيييل على الشفايف يطبع في كل مكان واللون مو موحد يعني في أماكن اقوى من مكان يعني لون شفايف مو واحد صاير مبقع ولو تكلمنا عن الريحه بعد نفس الشي شينه وقويه اذوقها من قوتها ، ما راح اقدر استخدمه فطلعته على طول .

جلوسات ريفلون :
الجلوسات هذي حلوه لكن أظن العيب في الدرجه نفسها لأنها ما تتوزع بسهوله تطلع زي الكتل وفي جهه اللون أغمق من جهه ويخف من الوسط ويتجمع في اطراف الشفايف ما حبيت الدرجه لكن الجلوس نفسه ممتاز مريح على الشفايف وسهل في الاستخدام وثباتها عالي مافيها طعم ولا ريحه وهذا أهم شي .




ستيلا مغنفسينت ميتل فويل فنش ايشادو :
للي تتابع يوتيوب وتعرف أخبار الميكب اول بأول أكيد سمعت عن هذا المنتج من ستيلا والا ؟ فكرته انو ايشادو الفنش حقه على العين يبين كأنه معدن من قوة لمعته وجماله لكن للأسف صعب جددا في الاستخدام هو المفروض يجي مع قطره علشان تسهل عليك استخدامه لكن انا وصلتني عينه مجانيه مع طلبي مافي معاها قطره ويمكن العينه نفسها خربانه صايره متكتله وصعب تطلعين منه واذا حطيته على الجفن يتجمع ويكون طبقه على الجفن مو جميل شكله ابدا ابدا هذا غير انه يتجمع في خطوط الجفن لمن تسكرين عينك وتفتحينها يعني ابدا مو مرتبه على العين بالعكس تشوه الميكب ما حبيته لكن حبيت فكره المنتج وأفكر ارجع اطلب المنتج كامل بحيث يجي مع قطرته احسه راح يكون حلو خصوصا انو درجاته جميله وعلى لوكات الأجانب في يوتيوب مبين حلو مره .

ايلاينر توفيسد :
ايلاينر من توفيسد صورته لكم مفتوح علشان تشوفون فكرته انو اسفنجه لها ثلاث نقاط علشان تسهل لك الرسم بس للأسف صعبته زياده على ماهو اصلا صعب :/
صايرين عريضين وصعب تمشين في خط مستقيم متعب في الاستخدام بالنسبه لي الايلاينر العادي اسهل بكثييير من هذا ممكن الشي الوحيد الي استفدت منه اني انقط تحت خط الرموش السفلي علشان يعطي ايحاء بأن عندي رموش سفليه كثيره وبس غير كذا ما منه فايده اشتري ايلاينرعادي وبلاك من هذي الخرابيط ههههههههههههه .

وبس هذي المنتجات الي متوفره عندي ولا حبيتها او ما ناسبتني قد ما كنت متوقعتها ،، لو عندكم منتجات خيبت ظنكم ولا حبيوتها او ما ناسبتكم شاركوني فيها هنا او في انستقرام :)

 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

Taiba Glam Blog يقول...

مرحبا غاده مررره حبيت البوست
صراحة في كم منتج جربتهم من اللي انت جربيتهم
عجلة كريولاين مررره ماحبيتها تخيلي حقتي كانت تطلع زيت و تحوس الدنيا جوا الدرج و غير كدا مررره الدممج it's take forever و فيها كمية دهن كبيره
فانديشن دريم مات مو نفس رإيك برضو لما احطي بالفرشة ماشي حالوا بس بعد ساعة يبرز كل عيوب البشرة واحسو يخلي البشرة بشعة جدا و ازا استخدمت الاسفتجة يصير لطع على الوةه ابدا مهو متجانس زي بقية الفانديشينز اللي جربتها
و اللسكن ليكود لايت من ريفلون خسااااره فلوس كاني خلطت هوا مع الفانديشن مع اني شفا كتييييير يوتيوبر اجانب يمدحوه و بلوقرز
و الايلاينر حق توفيسيد كنت حشتريه بس بطلت 😊 بعد ماشفت الريفيو حقك وكدا

مره شكرا موضوعك جميل و يحمس
في امان الله

مدونة الياسمين يقول...

اوقات الاقي المنتجات اللي ما ناسبتني اكثر من اللي ناسبتني 😭😭😭😭 بس اوقات الواحد يشتري شي على مدح او عرض او اي اسباب ثانية ويكتشف انه المنتج غير مناسب ابدا بس خلاص وقتها مايستفيد 😢 شكرا لشرحك للمنتجات اللي ماناسبتك 😙

إرسال تعليق