الأحد، 10 يوليو، 2016

Beauty Haul | مشترياتي الأخيره : وجوه ، سيفورا ، كلارنس ، طباره ....... ♥


السلام عليكم ورحمة الله وبركاته ♥
قبل فتره اخذكم جوله معي في سناب تشات لمحل سيفورا ووجوه وكلارنس وغيره وجتني كثيرر اسئلة عن المشتريات و اسعارها علشان كذا قررت اكتبها في المدونه اسهل وتبقى مو زي سناب تروح بعد يوم :)
ماراح يمديني احصر كل مشترياتي الفتره الأخيره علشان كذا اخترت منتجات معينه والباقي راح اوريكم بعدين في انستقرام .
كنت محتاجه كم غرض علشان كذا رحت لأكثر من محل حتى الاقيهم بدايتهم :


سيفورا 


دخلت لأنو ناقصني كم منتج لروتين العنايه حقي وقررت اجرب منتجات جديده ومنتجات احبها وجربتها قبل وكلارنس كانت اختياري هذي المره ، احبها مره لانها ماركة طبيه/تجميليه وسبق جربت كثير من منتجاتهم وناسبتني الحمدلله .

اخذت Gentle Foaming Cleanser غسول للبشره المختلطة/الدهنيه قوامه في البدايه غريب تحسينه جاف ومجرد ما تحطينه على بشرتك وتحركينه يطلع فوم او زي الفقاعات ينظف البشره من الأوساخ تماما تحسين بشرتك نظيييفه ومشدوده بعدها وممكن تكون جافه شوي (تعرفون كيف يدكم تصير جافه بعد ما تغسلونها بصابون قالب ؟ نفس الشي ) وطبيعي لازم ترطبين البشره حتى ما تتقشر من الجفاف ،، سعره 133 ريال .

وأخذت Gentle Exfoliating Cleanser مقشر البشره بخلاصة البرتقال ومناسب لكل انواع البشره ،، الي خلاني آخذه انو مقشر البشره حقي المفضل من سانت ايفز بخلاصه الشاي الأخضر خلص ومقطوع من الأسواق ما اعرف ليش !! ما لقيته في اي مكان الي تلاقيه ياليت تقولي :(
عموما هذا النوع ممتاز لكنه اغلى ونفس المفعول ، حبيباته مو كبيره ولاهي صغيره يعني ما ينفع استخدام يومي من 2-3 مرات في الاسبوع كافي ويفضل بعد الشاور حتى تكون البشرة لينه والمسام مفتوحه فيسهل التنظيف ،، سعره 174 ريال وكميته كبيره .

تدوينات العنايه ببشرتي ونقاط مهمه علشان تسوين روتيك الخاص هنا و هنا .

قبل فتره رجعت اشتري فرشه للكلاريسونيك والله يصلحها البائعه نصحتني بنوع ما يناسبني واشتريتها على كلامها ولمن رجعت وجربتها طلعت فاااشله لأنها ما تناسب نوع بشتري ما تسوي اي شي !! حاولت استخدمها لكن مليت منها وتركت الكلاريسونيك فتره ما استخدمتها بسبب الفرشه فرجعت اجيب النوع الأول الي احبه ب128 ريال .


كلارنس


ولأني قبل فتره لقيت في انستقرام عرض لمجموعه حلوه من كلارنس سألت عنها في سيفورا لكن قالولي خلصت :( اضطريت اروح لبوتيك كلارنس في المملكة ولقيتها الحمدلله ،، المجموعه عباره عن مرطب البشره جربته قبل وحبيته مره مره ، كريمي ويرطب البشرة من قلب يتركها ناعمه وصحيه النوع الي اخذته للبشره العاديه/جافة ،، مع المجموعة منتجين ميني اولهم ماسك للترطيب و الثاني لوشن للجسم وكلهم ب276 ريال واذا مو غلطانه هذا اصلا سعر المرطب لحاله يعني الباقي زي الهديه .
لو لقيتو المجموعه خذوها نصيحه راح تحبونها ♥♥♥ 



طباره


ولأني اعاني من قصر نظر ولا احب البس نظارات برا البيت معتمدة اعتماد كلي على العدسات ،، افضل الأنواع الي جرتها هي الي في الصوره وغيرها ما حبيتها ابدا .
الفرق بين الي فوق انو الأولى Define ملونه او "محددة" بتحديد اسود/رمادي احب استخدمها لو رايحه لمناسبه وحاطه فل ميكب خصوصا العين لأن احيانا السموكي او غيره يبين بؤبؤ العين صغير وهذا النوع يحددها ويبينها أكبر بشوووي مو اوفر زي العدسات الكورية مثلا لا بالعكس هذي طبيعيه أكثر ، سعرها حدود 190ريال .

والنوع الثاني Moist اخف على العين وشفافه مافيها اي لون مرييحه في اللبس وتقعد 16 ساعه بدون ما تجف صارلي سنين استخدمها واحبها مره سعرها حدود 170 ريال.

كل البوكسين الأحجام الصغيره يعني بداخل كل بوكس 30 عدسه / 15 استخدام / عدسه لكل عين يعني ،، لاحظت اسعارها متفاوته بين المحلات واغلاهم المغربي اظن علشان كذا الأفضل تقارنون قبل ما تشترونها .  



وجوه


تتذكرون ايفنت ماركه ايسادورا و الميكب ارتست امل الي كان في فوشون قبل فتره وصورت لكم سناب وانستقرام ..؟ يومها اعطونها هدايا من نفس الماركة وحبيت أوريكم هي مع انطباع مبدأي (استخدام مرة وحده) عنهم :

من اليمين عكافه الرموش ممتااازه تعكف الرمش بشكل طبيعي بنعومه ما تكسر لك الرمشه وطبعا طريقتك لها دور ولا تحسين رموشك مسحوبه لمن تستخدمينها وتوصل لكل خط العين ،، من الأنوع الممتازه جربوها لو حابين نوع ممتاز بسعر مناسب .

ستك بلشر حلوه الفكره وتركيبته ممتازه ما تضايق او يحوسك مجرد م تحطيته يصير جاف زي البودره ادمجيه بأصبعك وانتهينا ، ما حبيت لونه ابدا ما ناسبني وانا ما اميل لهذي الألوان غالبا علشان كذا ما كملت استخدامه راح اجرب الوان ثانيه ان شاءالله .

قلم الحواجب حلو زيه زي اي قلم كريمي ولونه قوي وثباتها عالي لكن لونه ما ناسبني صاير احمر وانا شعري بني فيبين فرق اللون في الرسم تمنيت لو لونه ناسبني :(

ايلاينر سواده عااالي وثابت طول اليوم لكن شكله غريب صاير زي الخطاط فهمتو علي ؟؟ شوفو صور في جوجل توضح لكم قصدي ، صعب في الرسم خصوصا لو كنتي حابه تسوين كات ايز .

مسكره ما جربتها للحين لكن نوعيه الفرشه بلاستيك وعاده انا ما اميل لهذا النوع بس نجرب ونحكم .

فاونديشن تغطيته ميديوم/فل كفرج ، ما يخطط وثباته عالي ولافيه ريحه ، الدرجه الي عندي 23 غامقه مو مثل لون الورقه الي فيها الرقم مثلا صاير لونها افتح من البرونر واغمق من الفاونديشن علشان كذا اخلطه مع لون فاونديشن فاتح ويعدله لي لأن الأندرتون حقه مناسبني ،، حبيته مره وان شاءالله راح اشوف الدرجه الأنسب لي اذا رحت المره الجايه . 





 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك 3 تعليقات:

مدونة الياسمين يقول...

تتهني فيهم يارب 🖒 اكثر شي عجبني منتجات كلارنس احسها تستاهل كل ريال يندفع فيها وفعلا كويسة للبشرة 😍

مدونة الياسمين يقول...

تتهني فيهم يارب 🖒 اكثر شي عجبني منتجات كلارنس احسها تستاهل كل ريال يندفع فيها وفعلا كويسة للبشرة 😍

غير معرف يقول...

انا جربت المجموعه تجنن بالعافيه عليك ❤️

إرسال تعليق