الجمعة، 10 يونيو، 2016

Makeup Forever | ريفيو (فاونديشن + كونسيلر) ميكب فورايفر الترا HD ♥


السلام عليكم ورحمة الله وبركاته ♥
على كثر ما جربت ميكب ومن ماركات مختلفة الرخيص و الغالي الا اني دائما لمن أكون مستعجلة أستخدم الي ضامنة نتيجته وعارفه شكله النهائي كيف حتى ما أتورط وأستخدم نوع ثاني ولا يصير فيه وقت أعدل :(
ميكب فورإيفر من الماركات الكبيرة ومعروفه بجودة منتجاتها يعني مو غريب لو الكل إستخدمها أو مدحها وشخصيا هي الماركة المفضلة عندي دائما ، جربت كثييير من منتجاتهم اذا مو كلها لكن اليوم راح احكي عن الفاونديشن و الكونسيلر وباقي المنتجات في وقت ثاني إنشاءالله .



Makeup Forever Ultra HD foundation 

لو تتذكرون قبل سنين كانو يتكلمون عن الفاوديشن ويمدحونه والأغلب يحبه لكن ميكب فورايفر قررت تجدد التركيبه وتحسن منه علشان كذا وقفت اصدار القديم ، التركيبة الجديدة مصنوعة أو محسنه علشان تبين البشره بشكل مثالي في التصوير خصوصا مع تقنيه 4K الي هي تقنية تصوير قويه ودقيقة لدرجه توضح كل عيوب البشره من مسام وغيرها علشان كذا ميكب فورايفر يقولون انو هذا راح يخفي العيوب حتى مع التقنيه القويه هذي !! يعني بإختصار في الصور و المقاطع استخدميه لأنه مثااالي ♥♥ لكن انتبهي تصورين بفلاش لأنه يعكس وبإمكانك تشوفين في جوجل وتفهمين ايش اقصد .   


مميزات الفاونديشن ؟

  • فيه 40 درجه يعني الا ما تلاقين لونك ولو احترتي ممكن تستشيرين الي عند الكاونتر لو في الرياض سيفورا العليا فيه غرفه برايفت تقدرين تروحين وتخلينهم يجربون لك ويلاقون لونك المناسب .
  • تغطية خفيفة/متوسطة وقابلة للبناء يعني اذا حبيتي تغطيه أعلى زيدي طبقه لكن مو تكثرين من المنتج نفسه يعني مثلا : حابه تغطيه خفيفه ضغطتين تكفي الوجه كامل ولو حابه تقوين التغطيه بعد ما تخلصين دمج اول ضغطتين زيدي ضغطتين وادمجي فوقهم مره ثانيه وكذا لكن مو تضغطين اربع مرات وتدمجينهم سوا ، فهمتو قصدي ؟
  • قوامة سائل وخفيف على البشرة ما يكتمها او يخلي منظرها مغبر او مبين طبقات مهما زدتي التغطيه مادام استخدامك و دمجك و الدرجه صح ماراح تواجهك اي مشكلة بالعكس راح يحسن من شكل البشره .
  • مناسب لجميع أنواع البشره لكن فيه خطوات بسيطه تفرق لكل بشره وهي العناية ما قبل الإستخدام و إختيار البرايمر المناسب ، لو بشرتك جافه تأكدي من انك قشرتيها ورطبتيها قبل بنصف ساعه على الأقل حتى تمتصه البشره ويسهل عليك الدمج ، ولو بشرتك دهنية تأكدي من انك غسلتي بشرتك بغسول يوازن الدهون بحيث ما يدهن معك الفاونديشن خلال اليوم ومافيه مشكله لو استخدمتي شوي باودر على التي زون بشكل خفيف بالطبطبه (يفضل تستخدمين بودره ميكب فورايفر لاحظت انو النتيجه افضل من باقي البودرات ما اعرف يمكن تركبيتهم تناسب بعض ) وبكذا راح يناسب الكل .
  • ثباته عالي من 5-7 ساعات من تجربتي لأني ما جربته لمدة أطول ، الفنش حق الفاونديشن لاهو مات ولاهو ديوي بينهم وطبيعي جدددا ما يبين انك مستخدمه ابدا.



رأيي فيه :
أول مره جربته كنت حابه تغطيه خفيفه علشان كذا استخدمت فرشه فاونديشن مسطحه وزعته بإتجاة واحد على بشرتي وبعدين بالبيوتي بلندر طبطبت لحد ما اندمج زين اللون و الفنش رووووعه لكن الخطوط في بشرتي مثل حولين الفم "خطوط الإبتسامة" بانت بشكل فضيع !! ومهما دمجت بعد ثواني يتجمع فيها كرهته في البدايه لكن جربت كذا طريقه ولقيت الأنسب لي للتخلص من هذي المشكله وهذا الي خلاني اكتب فوق مع مراعاة إختيار البرايمر الأنسب فكرت استخدم برايمر السيلكون او البروفشنال من بنفيت لكن ما ارتحت حسيت البرايمر ثقيل علشان كذا استبدلته بحق ميكب فورايفر هنا كميه بسيطه جدا جدا كبر حبه الرز على الخطين بإصبعي وبعدها الفاونديشن وبكذا اختفت المشكله تمااما ماعاد طلعت الخطوط مره ثانيه .
لازلت احس البيوتي بلندر ما تناسبني للفاونديشن عكس الكونسيلر علشان كذا استبدلتها بفرشه ريل تكنيك للوجه من مجموعتهم البرتقالية "بفنق برش" وبالنسبه لي كانت النتيجة أفضل وطبيعي أكثر لذالك اعتمدتها ، في البدايه واجهت صعوبه في اختيار اللون لأنها 40 درجه والفروق بينهم بسيطه وأكذب عليكم لو قلت لقيت درجتي المثاليه لأني لحد الحين أجرب وناويه اروحلهم يختارون لأني تعبت :/ 
حاليا أستخدم الدرجة رقم (R370 = 155) ،، لكن ككل حبيت المنتج أستخدمه بشكل يومي كميه بسيطه حتى يوحد لون البشرة بشكل خفيف ولا سبب اي ضرر للبشره الحمدلله لكن الي بشرتها فيها آثار ماراح يكفيها الفاونديشن راح تضطر تستخدم كونسيلر حتى تخفيهم والي ابغى انبه عليه هو انك لو ماحبيتيه او ما ناسبك تأكدي من ان خطواتك كانت كامله ؟ عنايتك كاملة ؟ اللون مناسب ؟ نوعيه البرايمر ؟ اذا كلهم صح عليك ولا حبيتيه مو مشكله لكن لا تكرهينه وتركنيه في الدرج والغلط منك جربيه بأكثر من طريقة .


سعرة وأماكن توفره :
 بـ210 ريال وموجود في محلات الميكب زي سيفورا وجوه دبن هامز أو حتى بوتيكهم نفسه وكلهم نفس السعر .




MAKE UP FOR EVER Ultra HD Concealer

مميزات الكونسيلر :

  • الكونسيلر الي قلت لكم رووووووعة في انستقرام ولازم أتكلم لكم عنه ،، قبل فتره ميكب فورايفر اصدرو مجموعة او كولكشن جديد للكونسيلر وأصدروه في نفس وقت تجديد الفاونديشن الي فوق بحيث يكونون اثنينهم من نفس اللآين .
الكولكشن فيه 10 درجات خمسه منهم يبدأون بحرف Y وخمسه منهم R بحيث :


R = مصححات                               Y = كونسيلر 

مصححات الون تساعد في إخفاء وتصحيح تصبغات الهالات السوداء و الكونسيلر لتغطية العيوب وإعطاء البشره أو الوجه اضاءة وإشراقة او تغطيه عموما زي اي كونسيلر .

  • تعليبهم عملي جددا عصار بلاستيك ومن قدام فيه قطعة بلاستيك او وبريه دائريه بحيث تقدرين تستخدمينه على البشرة على طول او تاخذين منه بإصبعك وبكذا تضمنين ما تدخل البكتيريا للمنتج نفسه لو راح يستخدم المنتج أكثر من وحدة ، وحتى تنظيف الرأس سهل مجرد ما تخلصين لو حسيتي فيه بقايا امسحيه بمنديل وخلاص .
  • فيه مزايا كثيرة من ضمنها Anti-Dark Circle Complex with Radiance Booster يعني تقلل من منظر العين التعبانه وتعطيها إشراقه بالإضافه الى مكونات تساعد فيه تعبئه الخطوط تعت العين وتعكس النور حتى ما يسبب ظل يبين البشره مرهقه < مو قلتر ههههههههههه يعني اصباغ خفيفه تبين الجلد تحت العين صحي.
  • تغطيته متوسطه / عاليه وبإمكانك تتحكمين فيها ومع كذا ما تسبب جفاف بالعكس تحفظ الترطيب فيها . 
  • ثابت لوقت طويل بدون ما يخطط ولا يتكتل لو إستخدمتيه بالطريقة الصحيحة .

الدرجات المناسبه لك :

من الكوركتر                                           من الكونسيلر

R20 : البشرات الفاتحة                                 Y21: للبشرات الفاتحة
R22 : البشرات الفاتحه للمتوسطة            Y23: للبشرات الفاتحة للمتوسطة
R30 : للبشرات المتوسطة                             Y31: للبشرات المتوسطة
R32 : للبشرات المتوسطة للتان                      Y33: للبشرات المتوسطة للتان
R40 : للبشرات التان                                    Y41: للبشرات التان 



رأيي فيه :
بالنسبة لي أعاني من تخطط الكونسيلر تحت العين بسبب سوء النوعيه علشان كذا دائما أبحث عن بدائل أفضل ما تسبب لي هذي المشكله + عندي هالات خفيفه أحب استخدم لها كوركتر مشمشي قبل الكونسيلر لكن ما ابغى الكونسيلر يندمج معاه ويبين اورنج  وغير كذا ابغى كونسيلر تغطيته عاليه ولا يكون ثقيل ومزعج والأهم من كذا ثابت مو يختفي بعد كم ساعة !!
كل متطلباتي هذي وأكثر لقيتها في هذا الكونسيلر ،، لونه قوي وتغطيته عاليه ، كريمي وسهل جددا في الدمج لكني لاحظت انه يجف ويثبت بسرعه فما ينفع تحطين تحت كل العينين وبعدين تدمجينهم الأفضل تبدين بعين بعدين تروحين للثانيه حتى ما يصعب دمجه لو جف وثبت لكنه ما يجفف تحت العين بالعكس يبقي المنطقه رطبه ما تحسينها مشدودة او جافه خصوصا لو مستخدمه كريم عين قبل بنص ساعه "ضروووري" .
أفضل طريقه لإستخدامه وأنسبهم لي بأني آخذ كميه بسيطه بأصبعي واوزعه بالطبطبة تحت العين وبعدين بالبيوتي بلندر اطبطب حتى يندمج كليا والنتيجه رووووعه الهالات مختفيه وتحت العين منور ولو حسيت اللون قريب من بشرتي اخلطه مع لون أفتح من نفس نوع الكونسيلر 
ولازم وتأكدي 100% لو ماسويتي هذي الخطوه راح يبهذلك بعد كم ساعه ، لازم تثبتينه ببودره اي نوع حابته لكن الأفضل بودره ميكب فورايفر الشفافه المضغوطه من نفس اللآين أو اللوس باودر من لورا مرسييه سيكرت برايتننق أو مكس بين البنانا باودر و الفانيلا باودر من باليت انستازيا حق الكونتور اول لونين فوق على اليسار والنتيجه راح تكون مثالية . 

سعرة وأماكن توفره :

 بـ130 ريال وموجود في محلات الميكب زي سيفورا وجوه دبن هامز أو حتى بوتيكهم نفسه وكلهم نفس السعر .


سواتش للدرجات الي استخدمها :




من اليمين "الكونسيلر" درجة :   Y33   اليسار "الفاونديشن" الدرجة :  R370 = 155


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك تعليقان (2):

مدونة الياسمين يقول...

يعطيكي العافية على الشرح الوافي ياعسل ��

Unknown يقول...

استخدمتو وجيدد عجبني جربت كونسيلر واي ٣٣
ودحين بيخلص ومحتاره اخدو ولا اجرب نارس
صراحة مقهوره انو سعرو اغلى من امريكا بشويه

إرسال تعليق