الجمعة، 24 يونيو، 2016

Dior event | تغطية إيفنت ديور + أفضل منتجاتهم ؟؟!♥


السلام عليكم ورحمة الله وبركاتة 
تدوينة اليوم مختلفه عن الي اكتبها بالعاده وتعتبر جديده على مدونتي لو حبيتو الفكره وحابين اعيدها بعدين قولولي .
التدوينة عن تغطيتي لإيفنت ديور أمس ، لو متابعتني في سناب تشات او إنستقرام أكيد شفتي مقتطفات منه والا ؟؟ جتني فكره وانا هناك اصور لكم المكان وشوي من الإيفنت للمدونة حتى يبقى موجود للي ما شافو السناب وحابين يعرفون التفاصيل :)


الإيفنت كان أمس سحور في الرتز كارلتون وتعريف لمنتجات ديور المست هاف والضروري تكون عند اي بنت يعني الميكب البيسك للي ما تعرف ايش تشتري او لمن تروح للسوق وتخاف تشترتي اشياء مالها داعي او ما تناسبها او حتى للي يسألون دائما ما عندي ميكب وحابه اشتري او انا عروس وابغى الميكب المهم ايش آخذ ؟؟
في الإيفنت اكيد ماراح يمدي نتكلم عن منتجات ديور كاملة علشان كذا اكتفو بالضروري يكون عندك .
وطبعا ديور ماركة كبيرة ما تحتاج دعاية مني ولا تعريف ابدا لها اسمها من بين الماركات ومعروفه بجودة منتجاتها ولي سنوات أجربها يعني مو جديدة علي ابدا ابدا في الإيفنت المانجر غاده قالت انو ديور عندهم 8 حدائق زهور حول العالم بحيث يستخدمون الزهور هذي في مكونات منتجاتهم خصوصا منتجات العنايه وعلشان بعض الزهور لها موسم معين ما تطلع في كل السنه هذا سبب اختلاف أماكن الحدائق الـ8 !!♥  .



قبل ما ابدأ حابه اشكر Dior على الإيفنت و خصيصا غادة السوباهي الريتيل و التريننق مانجر لديور على الدعوة وشرفني الحضور ومقابلتك ♥♥
والحمدلله صادف وقابلت كثييير من البلوقرز الي اتابعهم من زمان واحبهم مثل شروق وسلطانه و فوزيه وراما ورغد واميرة و ولاء وشيماء يمكن ما تحضرني الأسماء كلها لكني اقصد الكل انبسطت بشوفتهم الله يسعدهم  وأكيد الشكر كله لكم متابعاتي وصديقاتي لولاكم ما جتني الدعوه ولا حضرت الإيفنت ولا كنت في الي انا فيه الحين ماشاءالله والحمدلله 


وصلت الحمدلله على الوقت وكان المكان فاضي فأخذت راحتي بالتصوير ، بعد ما دخلت في وسط المكان موجودة طاولة فيها بعض من منتجات ديور من عنايه و ميكب وعطور للقطن و البفس و الفرش وغيرها وهي المنتجات الي راح يحكون عنها . 




بعد ما وصلو البنات و البلوقرز بدأو بتعريف مبسط عن ديور وعن المنتجات الموجوده في الصور فوق بحيث تحكي عن كل منتج بالتفصيل ومميزاته لأن المنتجات هذي تستخدم في اللوك الي معتمدينه ديور في الرانوي للمودلز ، صورتها سناب لكن للأسف الشبكة هناك سيئه علشان كذا وقفت عن تصوير الفديوز واكتفيت بالصور .

Ghada Alsobahi | Retail and trainig Manager Parfums Christian Dior Arabia
 بدأت غادة الله يعطيها العافيه بتعريف المنتجات بداية من العنايه بالبشره لمنتجات الوجه من برايمر وفاونديشن وبلشر وباودر ومنتجات العين من ايلاينر ومسكرة وحواجب للمرطب حق الشفايف و الروج .
ماشاءالله شرحها كافي ووافي تكلمت عن كل منتج بالتفصيل ومررته على البنات حتى يجربون ويحكمون بنفسهم ، راح اوريكم المنتجات تحت وراح احكي لكم عنهم شوي .



للأسف لأن الإيفنت بدا متأخر شوي لتأخر البنات اضطريت اطلع قبل ما تنتهي من شرح المنتجات كلها لأني مرتبطه والا كان ودي اقعد للأخير وأجرب درجات الفاونديشن وأختار درجتي وأتسحر مع البلوقرز وأتعرف على الحضور أكثر لكن للأسف خيرها بغيرها المرات الجايه بإذن الله .
وكعاده ديور وغادة كريمين شكروني على الحضور وأعطوني هديه بسيطه مقدمه منهم .



الهدية عبارة عن كل المنتجات الي تكلمو عنها في الإيفنت تفاجأت لمن فتحتها ما تتخيلون قد ايش انبسطت الحمدلله ما توقعت يعطوني كل المنتجات وزياده عليهم عطر ديور الجديد ريحته تجنن شميته من المعروض على الطاوله لااازم تجربونها اذا رحتو لسيفورا قريب ♥♥ ،، كنت اكتب في النوت بجوالي بعض الي حبيتهم وابغى اشتريهم الروحه الجايه لسيفورا بس ماعاد يحتاج اعطوني اياها هههههههههه باقي الفاونديشن برجع اشتريه لأني ما اخذته من الايفنت بسبب طلعتي المبكره ولا اخترت درجتي .


العنايه بالبشره حكت عن منتج اسمه "دريم سكن" عبارة عن معالج يومي للبشرة ويجهزها للمكياج لأنه يعالج مشاكل البشرة من الداخل و الخارج ، ينعم سطح البشره ، يخفي المسام ، يطلعها بمنظر صحي وأكثر إشراقة .
بعدها دخلنا على منتجات الوجه او مكياج البشرة وبدأنا بالبرايمر ، عرفتنا على البرايمر او البيس اسمه "ديور سكن ايفر وير" وهو برايمر يطفي اللمعة ويصقل البشره يعني ينعمها ويوحد ملمسها ويثبت المكياج لوقت أطول والأهم من كذا فيه حمايه من الشمس يعني ممكن تستخدمينه لوحده في الصباح او تحت الميكب .
بعدها الفاونديشن واشهر نوعين عندهم هم :
"ديور فورايفر" فاونديشن مثالي للبشرات الدهنيه او الي تحب التغطيه العاليه المطفيه ثابت لوقت طويل يوصل 16 ساعه ومريح على البشره . 
"ديور ستار" فاونديشن الفنش حقه ديوي فيه لمعه ترطيب جمييييلة يناسب البشرات الجافه او العاديه يعكس الإضاده بحيث تكون البشره مشرقه تغطيه اقل من فورايفر تعتبر متوسطه وثابته عالي .
بعدها عرفتنا عن نوعين باودر الأولى هي البودره الورديه الرووووعه حكيت لكم عنها قبل هنا وعن البودره الحره المطفيه تناسب البشرات الدهنيه تثبت الميكب وتمنع اللمعان خلال اليوم ومعاها فرشه صغنونه كيووووت .
وآخر منتج للبشره الي هو "روزي جلو " بلشر من ديور لونه في العلبه وردي قوي لكن فكرته انو يتغير على بشرتك بحيث يكون لون مناسب لك اعتمادا على حرارة جسمك وفعلا لمن استخدمناه في الايفنت اللون الي علي يختلف عن الي جنبي شروق ورغد لكل وحده لون يناسبها ، طبيعي وخفيييف انا افضله في الصباح يعطي توريد طبيعي للبشره يجنن . 
ندخل بعدها على منتجات العين وهي عبارة عن 3 منتجات اولهم باليت الحواجب جديد نزل قبل شهر ممكن فيه بودرتين وواكس مع فرشتين ومشط حواجب الألوان تناسب الكل وتركيبه الباودر و الواكس تضمن لك شكل وثبات عالي ،، المنتج الثاني هو الايلاينر قلم "الارت بن" سهل جددا في الإستخدام وسبحان الله توني قبل كم يوم في انستقرام اقولكم اني احب انواع الايلاينر الي كذا لأنها تسهل علي في رسم الكات ايز وحق ديور ممتاز حاد و سواده قوي وينشف بسرعه وثابت ما يبهت لكن لا تستخدمينه فوق ايشادو حتى ما يخف لونه بعد من استخدام من تجربتي له  ،، آخر منتج هي المسكره بالنسبه لي أشوفها أفضل مسكره من ديور فرشتها تجنن تقوس الرموس وتكثففففها مع تطويل للرموش ماهي سائلة تبهذلك ولا تجف بسرعه بالعكس تبقى رطبه معك فتره طويله اذا اهتميتي فيها وسكرتيها زين بعد كل استخدام طبعا .
وآخر المنتجات هي حقت الشفايف منتجين الأول مرطب "لب جلو" نفس فكرة البلشر الي فوق تحطينه وعلى حرارة جسمك يتغيرك اللون للأنسب لك ، ميزته انه يرجع التوريد الطبيعي للشفايف لأن احيانا من الشمس وبعض الارواج تلاحظين اطراف شفايف غامقه والا ؟؟ هذا يساعد على توحيد لونها جميل جداا وترطيبه عالي استخدمه كمرطب في كل وقت واحبه مره يمكن خلصت اثنين منه غير مرطبهم كرم دي روز بعد عموما مرطبات ديور للشفايف تهبل ما اعرف ليش لكن تختلف عن مرطبات الشفايف العاديه لاحظت هذا الشي ، وآخر منتج هو الروج وأظن انو النوع هذا لمتد أدشن لأن التغليف يختلف لونه عنابي كلاسيك جميل وقوي ثباته عالي ونهايته مخمليه فخم حبيته مره مرة .


هذ هي كل المنتجات داخل البوكس ، ما امداني اصور لكم المنتجات من الداخل لكنها موجوده فوق في العلبه الشفافة فوق الطاوله هي نفسها بالضبط ماعدا الفاودنيشن طبعا لأني ما أخذته .
احب تغليف الماركات الهاي اند كل منتج زي باليت الحواجب و البلشر يجيك مغلف بشنطه مخمل صغيره ومعها ورقمه معلومات ممكن تهمك ♥♥ 


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :



هناك تعليق واحد:

مدونة الياسمين يقول...

يعطيكي العافية ياقمر �� مرررة حبيت الموضوع ربي يسعدك وتتهني بالهدايا وياريت دايما تنزلي كدا مواضيع ������

إرسال تعليق