الاثنين، 23 مايو، 2016

Dior Magic | مكياج ديور لإضاءة ونضارة البشرة !!✨


السلام عليكم ورحمة الله وبركاته 
تدوينة اليوم خفيفه راح تكون عن منتجين من أشهر ميكب ديور الي دائما تكون سولد أوت او منتهية في المحلات عندنا والكل يمدحها ، ما تصدقون قد إيش أجلت كتابة التدوينة لدرجة خلصت المنتج نفسه وكنت راح أرمي علبته لكن تذكرت اني ما كتبت عنه ههههههه والسبب واحد ................. التعليب !! يعكس كل شي ما عرفت كيف أصوره أبدا أبدا لكن الحمدلله ضبطت معي وأخيرا راح أحكي لكم عنه .



دائما تسألوني أيش أفضل بودره للوجه ؟ أيش أفضل بودره جربتها ؟ وللأمانه مع أنو بشرتي مختلطة وممكن أحيانا تدهن إلا إني ما أحب البودرات أبدا أحب منظر البشره الديوي لكن لو كان راح يزيت او يدهن أستخدم أخف الأنواع عندي مثل بودره لورا مرسييه ، سيفورا ، الف وغيرها .
لكن لإضاءه الوجه او تكنيك "البيكنق" تحتاجين بودرة تكون فاتحة على لون بشرتك على تنور لك المنطقه ومع البحث استقريت على بودرة ديور خصوصا بعد ما مدحتها الميكب ارتست حنان النجاده في فديو مفضلاتها لـ2015 .
ما أتذكر اذا مدحت "قلم" الإضاءه في الفديو لكنها سبق وتكلمت عنه علشان كذا أخذت أثنينهم مرة وحدة من سيفورا .

أسعارهم : البودرة بـ270 ريال     الإضاءة بـ190 ريال 





Dior
Skinflash Radiance Booster Pen N.001 Rose Glow
مصحح للبشره بفرشة مو كونسيلر انتبهو المصحح بمعني انه يعدل من عيوب البشره من تعبها ويعطيها انارة جميلة وانا احب استخدمها مع البودره ونتيجتهم مع ببعض تجنن .
فيه منه 6 درجات لكن مو كلها متوفره في السعوديه ممكن اربعه الي موجود بس الي عندي اللون المايل للوردي استخدمه بعد الكونسيلر تحت العين بالطبطبه ، وفوق الشفة و الأنف وشوي وسط الجبهه واثبتهم ببودره ديور يصير وجهي منور خصوووصا في المناسبات لكن اذا يومي اكفي بتحت العين وشوي باودر حتى يثبته .



ابرميه من تحت ويطلع المنتج يذكرني بتعليب كونسيلر ميبلين لومي تتش وممكن يكون بديل أرخص لنفس الفكره ،، سهل في الإستخدام و الدمج وطبيعي جداا والأهم من كذا ثابت لكن عيبه الوحيد كميته قليله تخلص بسرعه حتى لو إستخدمتي قليل والعيب الثاني في كل المنتجين هذا و الباودر تعليبهم يوسخ بسرعة وتطبع اثار الأصابع عليهم فتظطرين تمسحينهم كل مره بعد الإستخدام :(
لكن ككل حبيته مره مره وراح أرجع أخذه لأن الي عندي خلص ، انصحكم فيه لكن خذو الدرجه الأنسب لبشرتكم لو بشرتك فاتحه هذا راح يناسبك مره لكن لو أغمق جربي الدرجات الثانيه انسب لك .




Dior
Diorskin Nude Air Glow Loose Powder N.001 
هذي البودره انشهرت كثيير في الفترة الأخيره ، ما أعرف كم درجة منها لكن الي عندي الورديه رقم 001 والأغلب انها  الدرجه الوحيدة .
من مزاياها إنها تثبت المكياج ، تعطي البشره نضاره ورونق ولتوضيح أكثر تعطيها صحه وإشراق بسبب لونها الودري الشفاف ناااااعمة وطبيعيه جددا على البشره ما تبين وردي طبعا !! مجرد تنور لك مناطق محدده في الوجه .



طريقة إستخدامها بالإسفنجه على التي زون و أماكن الإضاءه في الوجه لكني شخصيا ما احب استخدمها لكامل وجهي او في التي زون عندي أنواع افضلها أكثر للتي زون لكني احبها مررره لتحت العين تكنيك البيكنق وفوق الشفه وعلى الذقن "دقن" وعلى الأنف وممكن احيانا شوي بين الحواجب ووسط الجبهه حتى تعطيك تأثير الاضاءه منتصف الوجه زي ميكب كيم المشهور .
وممكن الي يستخدمون بودره البنانا ويحسون انها صفراء بزياده يخلطونها مع هذي البودره وتتعدل تخفف من حده الصفار  .

وجود البودره من ضمن خطوات الميكب احيانا تكون مهمة سواء كانت بشرتك دهنية او جافة لكن الفرق بينهم هي الكمية المستخدمة بحيث الي بشرتها جافة تستخدمها بكمية بسيطة على اماكن معينة حتى ما تجفف البشره بزيادة والعكس للبشرة الدهنية والسبب انها تكون مهمه مثلا في المناسبات الكبيره ماراح يثبت مكياجك وما يخليه باهت ومحيوس الا البودره ومثبت الميكب والا توقعي بعد فتره يبدا يخرب مكياجك .
هذي اللوس باودر من ديور ناااعمة جدا وطبيعيه على البشرة ممكن تشوفون فيه لمعه لكن ذراتها دقيقه جددا جدا علشان ما تبين لكن تطبقين فيها مجرد اشراقه ولا تخلي الوجه كيكي ومغبر ابدا ،، ممكن الي تشوفها تحس اللون قوي وراح يطلع زي البلشر الوردي لكن ابدا مو قويه بالعكس تاخذ لون اساسك وتتناسب مع لون بشرتك وتعطيك مظهر طبيعي وتخلي الوجه صحي وحلو .
خفيفه جددا ومالها تغطيه علشان كذا ما تبين الا اضاءه وتنور لتحت العين وعلى الوجه وتعتبر من أخف انواع الباودر الي جربتها قبل .

انصح فيها للبشرات الفاتحه والمتوسطه لكن الي تحس انها سمراء او البودره راح تكون فاتحه عليها مع اني ما جربت لكن ما انصح فيها جربي البورده الي تكون على درجات الأصفر أنسب لبشرتك .



يجي مع البودره اسفنجة بف صغنونة لكني ضيعت حقتي علشان كذا استبدلتها بالأسفنجة حقت سيفورا الي عرضتها في مشترياتي وقت خصمهم هنا .

عيوب البودره فقط في تعليبهم واذا مو غلطانه ممكن يكونون غيروها الحين ، تاخذ مساجه كبيره + لأن مافيها غطا من الداخل ممكن تتناثر وتطلع برا الفتحات الا لو استخدمي البف كحماية من هذي النقطة .



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


ليست هناك تعليقات:

إرسال تعليق