الاثنين، 18 أبريل، 2016

Teeth Whitening | تبييض الأسنان بالقوالب + الأسعار و التفاصيل مع الصور ♥


السلام عليكم روحمة الله وبركاته 
هوس تبييض الأسنان عند كل شخص وهذا شي طبيعي لأن غالبا أول شي يلفتك لمن تكلمين أحد هو اسنانه !!< والا هذي انا بس ؟؟ههههههههه
دائما أبحث عن أفضل وأامن طريقه لتبييض الأسنان قريت عن كثييير منها اللصقات والليزر و الأقلام و النور الأزرق والقوالب إحترت :/ قررت أروح عند دكتورتي وأستشيرها ولمن رحت لها قالت لي أفضل طريقه تشوفها مناسبة وآمنة ونتيجتها تدوم معاك وتبين طبيعية هي التبييض بالقوالب نفس الي تستخدمها الدكتوره .
هذا الكلام ممكن من سنتين علشان كذا ما أتذكر التفاصيل لكن الأغلب انها صح ، مادام دكتورتي مدحتها وهي أعرف بحاله أسناني قررت أجرب ،، أول خطوه سويتها هي القالب ، القالب لازم يكون على مقاس اسنانك علشان كذا سويتها عندهم أستخدمو جل اخضر قوي يحطونه على اسنانك وتسكرين عليه 5-10 دقايق علشان ياخذ شكل أسنانك وبعدين هم يسون لك القالب وتجين تستلمينه بعد كم يوم وللأسف ما أتذكر كم أخذ وقت ابدا ابدا ما أتذكر اذا يوم يومين اسبوع أو غيره ناسيه تماما :( 

وين سويتيها ؟؟ وأيش هي المنتجات ؟!
طبعا مجموعة التبييض نفسها جاهزه العياده بس سوت لي القالب وأظن كل العيادات تسويها روحو لأي عياده أسنان وتلاقونها .
راح اوريكم المجموعه عباره عن أيش تحت إن شاءالله .
زي اي روتين للتبيض فيه أشياء لازم تتجنبينها فتره التبييض يسمونها الدايت الأبيض حتى ما تأثر في النتيجه لأن الأسنان في هذي الفتره تكون أكثر قابليه للتلون فالقهوه و الشاهي والمشروبات الملونه أو حتى الأكل الملون كلها انسييييها .
للجل أكثر من قوة ويحددونه لك على حسب حساسيه أسنانك من المشروبات و الثلج وغيره  وكل ماكانت القوه أعلى تقل فتره إستخدامه في اليوم يعني مثلا :

  • قوة 10% يستخدم من 8-10 ساعات في اليوم للأسنان الحساسة .
  • قوة 15% يستخدم من 4-7 ساعات في اليوم للأسنان متوسطة الحساسية (أنا).
  • قوة 20% يستخدم من 2-4 ساعات في اليوم للأسنان متوسطه الحساسية للقوية .
  • قوة 35% يستخدم لمده 30 دقيقه يعني نص ساعه للأسنان القوية.  
طبعا كل القوات لها نفس النتيجه و نفس المده لأن القوه الضعيفه تعوض بعدد ساعات أكثر علشان كذا أختاري الأنسب بالنسبه لقوه تحمل اسنانك .


كثير بيسألون ليش الجل أفضل من غيره ؟؟!
آليه عمل الجل انه يذيب الأوساخ و التصبغات المترسبة على الأسنان ويرجعها للونها الأساسي ولا يتعرض لبنيه السن نفسه !! يعني ماراح يصبغ لك السن ابيض ولا راح يأثر على العصب وغيره ، لا راح يذوب الصفار الي عليها ويرجعه ابيض طبيعي مثل ماهو اساسا عليه علشان كذا ما راح يفيد الحشوات و التلبيسات يعني الي عندها حشوه ماراح يتغير لونها راح تبقى مثل ماهي .


كيف أعرف اذا يناسبني او لا ؟؟!
اني تكلمت عنه اليوم ما يعني انك تسوينه ابدا ابدا انتي ابحثي عنه أكثر وإستفسري وإستشيري طبيبتك قبل ما تسوينه علشان تعرفين اذا يناسبك او فيه خيارات أفضل لك لكن غالبا يناسب الكل ماعدا :

  1. المرأة الحامل - المرأة المرضع .
  2. من هم تحت 17 لأن الأسنان في طور نموها وهذا يأثر في بنائها .
  3. أصحاب الأسنان اللبنية .
  4. الي عندها حشوات ، قشور أو غيرها .

كم سعره ؟؟!

ما أتذكر كم بالظبط لكن أظن بحدود 1000ريال وفيها ، شاملة المجموعة كاملة لكن عموما تلاقين الأبر تنباع لحالها بميتين وشي انتي عليك تسوين قالب في العياده ما أعرف وين تلاقين الأبر لحالها لكن سمعت انها تنباع .


المجموعة :
  1. اوراق عن المنتج ودرجات التبييض .
  2. 8 إبر جل كل 4 في مجموعة .
  3. القوالب مع علبتها حتى تحافظ عليها .
  4. معجون اسنان ميني خاص للتبيض يرجع للسن بياضه لو حسيتيه بهت بعد فتره من إستخدام الجل .
  5. شنطه صغيره تحافظ على المنتجات كلها في الداخل .


ورقه فيها درجات صفار الأسنان حتى تحددين قبل وبعد ويبين الفرق معك .



عن الشركه لو حابين تعرفون أكثر ابحثو عنها في جوجل .



التعليمات وطريقة إستخدامة :

  • فرشي أسنانك قبل الإستخدام ونشفيها تماما .
  • على القالب حطي نقطه قد حبه الرز على كل سن ويكون في الجهه الأماميه مو من الداخل .
  • لو كانت فتره إستخدامة طويله ممكن تستخدمينه وقت النوم أريح لك .
  • لا تتعدين الساعات المسموح لك فيها ولا تبدين بوقت طويل تدرجي كل مره حتى ما تتحسس الأسنان .
  • لا تكثرين من الجل في القالب حتى ما يوصل للثه + تأكدي من ان الجل وصل لكل السن على ياخذ مفعوله .
  • ابدي بوقت قليل وزيدي كل يوم ولو حسيتي اسنانك تحسست بعد كم يوم وقفيه يوم راحه وكملي بعده واذا لازال يحسس روحي للطبيب .
  • الأنتظاااااااااااااااام لا تهملينه يوم واحد الا لو تحسست !! عادة مافيه وقت محدد توقفين ممكن عشرين يوم (الاربع ابر تكفي عشرين يوم) وفيها لكن انتي اذا وصلتي للدرجه الي تبينها وقفي.
  • الأسنان وقت إستخدامه يمكن اول يومين ثلاث راح تشوفين فيها بقع بيضاء ليش ؟؟ لأني قلت فوق ان الجل يذيب التصبغات و الأوساخ فهذي البقع هي الأوساخ و الصفار قاعده تذوب علشان تروح .
  • ابتعدي عن التدخين ، القهوه ، الشاهي ، الكتشب ، الاكل الملون عموما لأن فتره استخدان السن تكون المسام مفتوحه فراح تاخذ اللون على طول وما يصير للتبيض اي فايده بالعكس بتقلب الأسنان صفراء زيادة .
  • بعد ما تخلصين شيلي القالب ونظفيه زين وتأكدي من انو نظيف وناشف قبل ما ترجعينه للعالبه والا راح تتكون بكتيريا .
  • لا تفرشين اسناك بقوه وإستخدمي انعم فرشه في الحياه وإستخدمي معجون سونسداين حتى تروح الحساسية او اسخدمي المعجون الي جا معاه . 
  • احفظي الجل في حراره غرفه معتدله او في الثلاجه أفضل .
  • المنتج صالح لمده سنتين اذا كان في الثلاجه .



تجربتي ورأيي فيه ؟؟
بعد ما نصحتني فيه دكتورتي وبدأت فيه وقت إستخدامه كان طويل من 4-7 ساعات علشان كذا استخدمه وقت النوم وأقوم بعد 6 ساعات أغسله في اول يومين بدأت الاحظ الفرق السن كان مبقع بشكل خفيف في البدايه خفت لكن لمن بحثت عرفت انها التصبغات قاعده تذوب وطبعا تكون اقوى كل ماكانت اسنانك صفراء زياده ،، وفي وقت إستخدامي له أسناني كانت تألمني مره مره كأن فيه أحد يشدها يجي الألم ثواني ويروح واحيانا دقايق ويروح لكنه يجي بين فتره وفتره وقت إستخدامه وبعد ما اوقفه يوقف عموما بعد اسبوع إختفت البقع وبدا السن يبيض اسرع من الأول البياض كان طبيعي جددا يعني بياض نظافه مو كانه طامس !! كثييير لاحظو الفرق وسألوني عن الي أستخدمه ومع الأرواج الي تطلع أسناني صفراء صارت تطلع بيضاء شكلها مرره حلو وبعد اسبوعين لثلاث يعني حدود 18 يوم وقفتها لأني وصلت للدرجه الي ابغاها ومع الإنتظام بالتفريش بالمعجون الي جا معاه يرجع لي بياضه ويخليه يدوم فتره أطول ممكن بعد 7-8 شهور رجعت أستخدمه مره ثانيه كم يوم بس ورجع لونه مثل اول ♥♥

النتيجه صح حلوه ودائمة وآمنة لكني ما قدرت أكمل عليه بسبب الألم وقت إستخدامه الشد الي يجيني مو طبيعي والمشكله يجي فجأه اصدع منه + شعور ان فيه قالب على اسناني في الليل يقرفني ما أعرف أنام فيه واذا اسخدمته في وسط اليوم ما أقدر لأن وقته طويل 6 ساعات !!!! وطعمه شين (طعم نعناع عادي انا ما احبه) وغير كذا ما أعرف ليش بس لثتي تحمر وتحسس مع اني ما أكثر من الجل فما أقدر استحمل لأنها مو يوم يومين امشي حالي فيها ما قدرت صراحه بعد الإستخدام الأول  ما قدرت أعيد عليها كل ما رجعت حطيت القوالب يبدأ نفس الموال ما أعرف أنام ولا أعرف أتكلم فيها ولا أستحمل نغزات الألم الي تجي فجأة هذا كله لأن اسناني حساسة جدا :( الحمدلله 
لكن ككل انصحكم فيه جربيه ممكن يناسبك والنتيجه أفضل من باقي طرق التبييض وأطول دوام ، من اول استخدام ما رجعت أسناني بعدها زي أول .
صاحبتي تستخدمه وأشوف عليها النتيجه مره مره حلوه ولا عانت مثلي وشفت كثير بنات في انستقرام جربوه وحبوه أفكر أرجع أجرب القوة الأقل منها بس محتاره .

لمتى تبقى اسناني بيضاء ؟؟!
مثل ما قلت لكم فوق هو يذوب الترسبات والألوان من الأسنان ويرجع لون سنك الطبيعي علشان كذا اللون يبقى مادام انك تعتنين فيها ولو اهملتي اكيد راح ترجع تصفر شي طبيعي انتي ارجعي استخدمي الجل مره ثانيه وحافظي عليها .


صور قبل وبعد لتجارب الناس من جوجل :




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك تعليقان (2):

Unknown يقول...

يعطيك العااافيه ، جربته والنتيجة تجنن بس ترجع الاسنان وتتعيجزين تستخدمينه مره ثانيه

غير معرف يقول...

صراحه جات التدوينه بوقتها بس ما اعتقد اني بسويه مع اني شفت عليه كثير مدح
لكن لان سعره شوي مرتفع، فـ ودي اجرب لصقات كريست بالاول
بس برضو قريت انها تصبغ الاسنان في البدايات ورح ابحث واقرا اكثر
عشان اجربها. شكرًا��

إرسال تعليق