الخميس، 17 مارس، 2016

Forever52 | افضل عجله جربتها !!✨ (فاونديشن وكونسيلر وهايلايت وكونتور) ♥


السلام عليكم ورحمه الله وبركاته ♥ 
دائما تكون فيه منتجات حلوة وبسعر مناسب لكن محد يعرف عنها وإلا ؟؟!
عجلات الكونسيلر أو عجلة المكياج عموما إنشهرت كثييير خصوصا بعد ما جربو العجلة الي من كيرولاين لكن لمن جربتها للأسف ما ناسبتني أبدا لأكثر من سبب أولها تركيبتها الثقيييييلة والي تنفع بس في المناسبات غير إنها صعبة في الإستخدام "بالنسبه لي" لأنها ما تذوب بسرعه ولا تندمج بسهولة ولا تعطي فنش حلو يعني ككل ما حبيتها :(




في بدايات حسابي في إنستقرام فيه تاجره من جده طلبت ترسل لي منتجات أجربها ترددت في الأول لأني ما احب هذي الماركه لكني ما جربتها قبل فليش احكم على شي ما جربته ؟؟!
وافقت واخترت منتجات تناسبني ومن ضمنها هذي العجلة الي كان اختيارها صدفة لا أكثر ولا أقل حتى اني فكرت الغيها ما أعجبني شكلها هههههههه .
ماركه المنتجات اسمها فورايفر52 المانية اسعارها مناسبه وتعتبر رخيصة لكن مشكلتها انها ما تنباع في كل مكان ، الي اعرفه في الرياض موجوده في طيبه لكن فيه منها تقليد وانتي وحظك اذا اشتريتيه كان اصلي او تقليد انا اخذت واحد ثاني احتياط لو خلص الي عندي ما جربته فما أعرف اذا اصلي او لا  لكن الي في جده ريحو نفسكم وخذوه من التاجره لأنه اصلي ونفس الي مجربته والي في باقي الأمكان اطلبوه منها او ابحثو عن المحلات الشعبيه الي توفره  ،، جربت كثير من منتجات الماركه وبعضها كتبت عنهم تدوينة هنا و هنا .
 هذا حساب التاجرة في انستقرام  : nona_makeup4ever52@ 



عباره عن عجله فيها 4 درجات ، ما أعرف اذا للعجلة نفسها فيها درجات او لا لكن فيه حروف ورقم اربعه  جنبهم !! عموما لو فيه فاللونين البني والأبيض ثابتين يعني ماراح يتغيرون يمكن اللونين الي تحت يختلفون .
الي أعجبني وحبيته فيه انه كرييييمي جدا جدا مجرد ما تحطين اصبعك يذوب ، لونه قوي وواضح يعني صبغته عالية تحتاجين كمية قليلة منه سهل في الدمج  سواء استخدمتي إسفنجة أو فرشه ،، تغطيتهم متوسطة لكن الفنش ديوي أكثر من انه مات علشان كذا يفضل تثبتينه بباودر لثبات أطول .
اللون البني مناسب كبرونز أكثر من كونتور لأن الاندرتون حقه ما يناسب ، فيه لون مايل للأورنج اكثر من الرمادي علشان كذا ما يناسب ككونتور ، أستخدم كمية صغيييرة على اطراف الوجه يعطي البشره دفئ ولون حلو .
 اللون الفاتح ما يناسب بشرتي لحاله لأنه يصير "أبيض" علشان كذا إما أخففه مع اللونين الي تحت أو مع أي كونسيلر ثاني وأستخدمه في أماكن الإضاءه أو تحت العين وإلا أستخدمه لحاله بشكل خفييييف فوق الكونسيلر كإضاءه حتى ينور لي تحت العين بدون ما تكون اوفر .
اللونين الباقين مثاليين للون بشرتي ولهم استخدامات كثيييره ممكن تستخدمينهم ككونسيلر او كفاونديشن او تخلطينهم مع اللون الابيض ويصير اضاءه او تخفين اللون الغامق ويصير كونتور خفيف عموما أستخدمها بكذا طريقه لكني معتمدتهم كفاونديشن ،اللون الي في اليمين مايل للوردي أكثر لكن الي في اليسار مايل للأصفر أكثر علشان كذا أحب اخلطهم سواء ويصير لوني المثالي والفنس طبيييعي ولمعته حلوه كثير يسألوني عنه لمن أستخدمه في المناسبات او الزيارات  :)
وأستخدم اللون في اليمين مع شوي من اللون الأبيض لتحت العين كونسيلر .
حبيت العجله مره مره عملية ورخيصة وجودتها عالية ما حسستني ولا سببت لي مشاكل في بشرتي ابدا ابدا الحمدلله  .



أستخدم اصابعي علشان ادمج الألوان والا أستخدم هذي الأنواع من الفرش علشان أفردها على البشره .
من اليمين فرشه سيقما الميني كبوكي استخدمها لتحت العين لو حبيت ادمج فيها الكونسيلر ، الوسط فرشة الكونسيلر من سيقمها و الفرشه الأخيره عاديه مسطحه أستخدمهم حتى افرد المنتج على كامل بشرتي .
وعلشان أدمج أستخدم فرشه ريل تكنيك من مجموعه الوجه البرتقاليه عرفتوها ؟؟ هي الأفضل بعد ما جربت كذا طريقه وكذا فرشه وإسفنجه استنتجت ان ريل تكنيك هي الأفضل والي تعطيك نتيجه طبيعيه أكثر .




سواتش للدرجات : (مع الدمج تخف حده اللون وانا احب يكون الفاونديشن اغمق بدرجة لدرجتين حتى ما يقلب رمادي )




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك تعليق واحد:

Dolal Al-kamel يقول...

ياليت صورتي العلبه من ورى عشان اذا رحنا لطيبة نتاكد انه الاصلي او التقليد 😿💕

إرسال تعليق