الخميس، 24 مارس، 2016

Color Switch Solo | الحل المثالي لتنظيف فرش المكياج المستخدمة !!♥


السلام عليكم ورحمة الله وبركاته ♥
كل فتره وفتره يطلع لنا منتج جديد في عالم التجميل يبهرنا وينشهر والكل يبدا يشتريه ويقلب إنستقرام كله عن هذا المنتج والا !!:/
هذا الي صار ،، تدوينه اليوم عن منتج أول ما نزل الكل حبه وإشتراه وإستخدمه الا انا بعد فتره طويييله ولأني كنت بحاجه لشي مثله قررت أجربه وما ندمت ابدا ابدا .
راح أتكلم لكم عن :
Vera Mona Colour Switch Solo | فيرا مونا كولور سويتش سولو الأمريكية 
منتج مثالي وأشوفه مهم خاصه للميكب ارتست و مهووسات المكياج مثلي ههههههههه او عموما اي وحده تعاني من فرشه المكياج المستخدمه وما تقدر تستخدمها مره ثانيه لأنها مو نظيفه فتظطر تغيرها أو تغسلها وتستناها تنشف ......!

المنتج عبارة عن ( إسفنجة خشنة ) تنظف لك فرش المكياج بدون ما تحتاجين مويه ولا صابون ولا مطهر ولا شي ابدا كل الي تحتاجيه فرشه وهذا المنتج بس .
لكن تنظيفه ما يعني إنه قتل البكتيريا ولا يغنيك عن التظيف الدوري بالمويه والصابون  ابدا لكنه حل مثالي للي تبغى تستخدم نفس الفرشه بأكثر من لون لأن فكره المنتج انه ينظف لك البودره او اللون نفسه من الفرشه لكن ما يغسلها لك ، فهمتو قصدي ؟؟!

حقي أخذته من متجر في إنستقرام من سنة تقريبا لكن للأسف قفل لكن عموما تقدرون تلاقونه في متاجر الإنستقرام لو بحثتو ،، الشركة نفسها عنها أكثر من نوع وأكثر من شكل الي حابه تشوف باقي المنتجات هنا .   
الي عندي هو ابسطهم وأرخصهم إسمه Vera Mona Colour Switch Solo .



فكرتة : 
من الداخل فيها الإسفنجة السوداء وتغطيها بالكامل عكس باقي أنواع الشركة .
الإسفنجه هي الي تستخدمينها لتظيف الفرش ،، شخصيا انا أفضل استخدم المنتج ومخصصته بس لفرش الايشادو ما أعرف ليش لكن ما فكرت أستخدم فرش الوجه ابدا أحس فرش الوجه تنقل البكتيريا على طول علشان كذا اغسلها أول بأول عكس فرش الأيشادو .

طريقة إستخدامها :
طريقة إستخدامها جدددا سهلة كل الي عليك بعد ما تخلصين إستخدام الفرشة بأي لون انك تمررينها عشر ثواني على الإسفنجه بشكل دائري وراح يختفي اللون الي عليها تماما وترجع نظيفة وما عليها أي لون وبكذا يسهل عليك إستخدام الألوان الغامقة و الفاتحة ولو استخدمتي لون غامق وحبيتي تدمجينه بنفس الفرشه بس نظفيها وكملي دمج عادي ،، هذي فرشه ايشادو من سيقمها إستخدمت فيها لون بني وبعدين أسود وبعدين مررتها على الإسفنجة ونظفتها ورجعت جديدة مافيه أي لون :


طريقة تنظيفها :
ما أعرف اذا طريقتي صح أو ممكن تخرب المنتج لكني ماشية عليها فتره طويلة ومرتاحه فيها ما خربتها ، طلعي الإسفنجة من الحديدة ومسحي الحديدة من الداخل حتى تروح بقايا الأيشادو و الأوساخ في الداخل ،، والإسفنجة أستخدم لها اي صابون للفرش اما حق بيوتي بلندر أو حق ريل تكنيك أو صابون جونسون أو غيره وغسليها زين لمن تشوفين الألوان تطلع منها ويبقى لون الموية نظيف وبعدها خليها في مكان هوا حتى تنشف تماما ورجعيها لعلبتها وبكذا تكون جديده لللإستخدام وتدوم معاك فتره أطول بدون ما تجمع بكتيريا ، ولو حسيتي إنها خربت أو حبيتي تغيرينها في الموقع يوفرون الإسفنجه لحالها بـ 7.99$ حدود 30 ريال . 


رأيي فيها :
ممتاز جدا جدا ويستاهل كل ريال فكرته عملية وتساعدك كثيير وسعرها مقعول وعدهم عروض حلوه وأشكالها كثيره راح تلبي إحتياجك كميكب ارتست او غيره ،، غير انه حجمها صغير ووزنها خفيف ومحميه من الجراثيم لأنها في علبه راح تخدمك في السفر خصوصا إني ما احب آخذ فرش كثير أكتفي بوحدة ثنتين لكل الألوان ولو ان عندي فرش كثيييره ما أحب آخذهم .
حتى البنات الي ما عندهم الا كم فرشة هذا المنتج راح يناسبهم ويسهل عليهم تعب غسيل الفرش يوميا .  
* نقطه مهمه طريقه تنظيفك لها هي الي راح تحدد عمر الفرشه واذا راح تخرب او لا اذا مررتي الفرشه بشكل عشوائي وخربتي شكلها أكيد ماراح تدوم معك علشان كذا قلت بشكل دئري حتى تحافظ على شكلها .

سعرة في الموقع : 16.99$ يعني حدود 65 ريال . 

فيه بدائل لها ؟ 
كثير قالو انو حشوات الشعر "الدونات" بديل لها بس حطيها في علبه وتصير زيها وسمعت كثير ذموها وقالو تخرب الفرش لكن ماراح تعرفين الا لو جربتي :)




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


ليست هناك تعليقات:

إرسال تعليق