الاثنين، 8 فبراير، 2016

Bellezzabox | صندوق الجمال (2) !! فكره جديده + منتجات حلوه ♥


السلام عليكم ورحمه الله وبركاته 
تكلمت قبل عن صندوق الجمال من بيلا بوكس في اول صندوق لي هنا وذكرت تفاصيل اكثر ومعلومات مفصله عنها بدايه من ايش هو لكيفيه الاشتراك و الأسعار وغيرها  ،، للي ما قرأتها تقرأها قبل ما تكمل لأن هذي التدوينه تابعه لها ،، وصلني البوكس الثاني الي هو بوكس شهر يناير (جانوري) :)
Bellezzabox | صندوق الجمال بوكس جمال شهري ،، يعني فكره المشروع انك تدلعين نفسك بمنتجات جديده كل شهر بملغ رمزي لشركات كبيره !! يوصلك البوكس نهايه كل شهر فيه 5 منتجات ما تعرفين ايش هي وتكون مفاجأه لمن توصلك ، المنتجات متنوعه ما بين ميكب و عنايه بالبشره وغيرها ، الي يميزهم عن غيرهم انهم يتعاملون مع شركات كبيره وممكن ما تكون متوفره في السعوديه لأنهم يجيبونها بنفسهم من امريكا او يوصون عليها من امريكا و دبي يعني تجربين شركات غاليه ومنتجاتها حلوه وبسعر معقول ولو انها احيانا تكون ميني .

* توضيح مهم ،، ما قلته في التدوينه الي راحت لكن حبيت اوضحه الحين ، لما تشتركين 3 شهور منتجات البوكس في الشهر الواحد تختلف يعني ممكن البوكس الي وصلني لشهر يناير هذي المره اختلف عن بوكس شهر يناير الي وصل لوحده غيري طيب ليش ؟؟!
لمن تسجلين مع بيلا بوكس هم راح يقسمون احتياجك في الميكب على الثلاث شهور بحيث تغطي على المتطلبات وتكونين اهذي كل شي تحتاجين خلال فتره تسجيلك يعني مثلا مشتركه رقم 1 بدت اشتراكها واتسلمت اول بوكس لشهر جانوري وكان فيه منجات كثيره من ضمنها روج لكن المشتركه 2 كانت مشتركه من زمان فبوكس شهر جانوري يعتبر ثاني بوكس لها وفي اول بوكس لها استلمت روج فأكيد ماراح يكررون لها المنتج علشان كذا حطو لها بودره وجه ،، الحين مشتركه 1 استغربت ليش يحطون لها بودره وانا روج مع اننا دافعين نفس المبلغ ؟؟!
مشتركه 1 هذا اول بوكس لها لكن مشتركه 2 هذا ثاني بوكس لها علشان كذا طبيعي تغيرت المنتجات لكن مشتركه 1 تخلي في بالها انهم راح يرسلون لها منتجات ثانيه ممكن تكون احلى في البوكس الثاني حقها الي راح تستلمه الشهر الجاي .
والله مدري فهمتو والا لا هههههههههههههه الي ما فهمت تجيني في انستقرام اشرح لها او تسألهم وراح يشرحون لها أكثر ♥♥




وصلني البوكس مغلف بكيس او غلاف شفاف وحاطين عليه فاتوره التوصيل من شركه التوصيل عكس المره الي راحت كان في كيسه بيضاء حتى ما تلخبط شركه التوصيل وتعطيك بوكس مو لك فتغليفهم هذا سهل عليهم ♥ شكله مثل ماهو مبين في اول صوره فوق مغلف بشريطه زرقاء وعليها استكر اللوقو + ورقه صغيره مكتوب عليها كلام نزلته في انستجرام .
 اول ما فتحت البوكس طلعت ريحه تجنن زي البوكس الي راح هههههه دائما بوكساتهم ريحتها حلوه شكلهم يبخون فيها عطر♥♥
المنتجات الي مالها بوكس مغلفه بكيس بلاستيك مثل الكيس الي غلفو فيها البوكس اول ما وصلني ،، حبيت تغليفهم بسيط ومرتب لكن تمنيت مره لو انهم اضافو ورقه فيها تفاصل اكثر عن المنتج وكم سعره في الاسواق علشان تاخذين فكره عن المنتجات قبل ما تستخدمينها لو ما عندك خبره فيهم انا عن نفسي عرفت المنتجات لأيش وبحثت عن الي ما عرفته .




ذكرت قبل توصلك 5 منتجات كل شهر ،،هذا بوكس شهر جانوري لكن اللي حابه تسجل لشهر فبراير تكلمهم الحين لأن عدد المشتركين محدود وراح يسكر مجرد ما يكتمل . عباره عن خمس منتجات 2 منهم فل سايز و2 ميني و 1 عينه  .






  • مناكيرميني من فورميلا اكس بالتعاون مع كات فون دي ماركه المكياج ،، الدرجه HOMEGIRL جربته مره وحسيت تركيبته ثقيله ما تنشف بسرعه لكن لونه قوي طبقه وحده تكفيه ،، ما اعرف اذا حبيته او لا لازم اجربه أكثر وأحكم .
  • كريم لليد من فروت اند باشن ،، ما سمعت عنها شي من قبل جديده علي الماركه موجوده في دبي وقطر و بريطانيا بس ،  عموما اظن من شركه فرنسيه علشان الكتابه الي عليها وأتوقع انه مجدد للبشره من الكتابه ما اعرف والله لكن حلوه ريحته نفس ريحه البوكس ومنتجاتهم عضويه ما تضر البشره  .
  • ماسك الماكديميا للشعر تكلمت عنه في بداياتي في انستقرام وعندي منه الحجم الكبير واحبه لأطراف الشعر مرتين بالأسبوع يجنن يرطب الشعر مره مره ينباع في صيدليه نزيه لكنه غالي بس يستاهل راح تلاحظون فرق على طول ،، هذي العينه راح تكفيني 2-3 مرات تقريبا لأنها على أطراف الشعر بس ! انتبهو .
  • ايشادو من كولور بوب اسمه 90210 ساتن لونه بني بلمعه خفيييفه ،، سبق وتكلمت عن منتجات كلربوب ورأيي فيها + كيف طلبت هنا صوره اوضح : 



  • وآخر منتج هايلايتر ستك من فورايفر 52 لونه وردي لكن لمن سويت سواتش اللون الوردي مو قوي فيه يعني مجرد لمعه بدون لون حلوه للستروبنق لأنها طبيعيه ما تبين على البشره ملطخه ،، كثير منشنوني و مدحوها لي في انستقرام الأيام الي فاتت بعد ما عرفو اني استلمت البوكس حقي ، صوره اوضح :



حبيت بوكس هذا الشهر واتمنى اعجبتكم التدوينه وشكرا لكم على الدعم وكومنتاتكم الحلوه و على المنشن للحسابات الي يطبقون نفس المفهوم في انستقرام او على المنتجات الي تنصحوني فيها ،، لو حبيتو التدوينه او عندكم استفسار ممكن تتركون تعليقكم او سؤالكم تحت وراح ارد بأسرع وقت ان شاءالله .

 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك تعليق واحد:

Fadheelah Najjar يقول...

تتهنين فيه يارب ❤❤.. نفس بوكسي هذا الشهر.. يفرق انو جاتني فرشاة وانت لوشن.. بس الهايلايتر جمييييل ❤❤..

إرسال تعليق