الأربعاء، 6 يناير، 2016

Black Friday Haul 2015 | مشترياتي في البلاك فرايدي + نصائح للطلب ♥


السلام عليكم ورحمه الله وبركاته 
وصلت شحنتي من امريكا لكل الميكب و المنتتجات الي طلبتها في البلاك فرايدي :)
وحبيت اكتب بوست كامل عن تجربتي في الطلب والمواقع الي جربتها + شويه نصائح ممكن تفيدكم المره الجايه لمن تطلبون اونلاين في البلاك فرايدي .

ايش هو البلاك فرايدي ؟؟
 يكون في اخر يوم جمعه شهر 11 من كل سنه وهذي المره كان فيه 27 نوفمبر مواقع ومتاجر تسوي عروض وخصومات توصل لـ ٥٠٪ و ٧٥٪ في المحلات بامريكا ومواقع الانترنت الخصومات تشمل كل شي من الكترونيات ، اثاث ، اكسسوارات بيت ، ملابس ، شنط ، ميكب ، كل شي ينزلو عليه عروض وخصومات بما انه موسم الاغلب يشتري فيه هدايا والاغلب يبدون الخصومات والعروض قبلها بأيام وممكن تبقى لأكثر من يوم لبعد الجمعه فتعتبر فرصه ممتازه للي حابه تشتري وتوفر مبلغ .

فوتي البلاك فرايدي ؟؟ استغلي السايبر موندي :)
 فوتي البلاك فريدي او ما حسيتي في عروض تستاهل يوم الاثنين الي بعده راح ييكون سايبر موندي نفس فكره البلاك فرايدي وممكن يكون احسن لأن الضغط عليه اقل من البلاد فرايدي ولأن البلادك فرايدي تكون العروض الحلوه في المحلات علشان كذا تشوفون صور تجمع وزحمه على المحلات عكس السايبر موندي المخصص لمواقع الشراء من النت علشان كذا يكون احسن  .

ايش العروض الي راح استفيد منها ؟؟
طبعا على حسب الي انتي راح تشترين انا ماحبيت اشتري اي شي علشان ما اراكم عندي بدون ما يستخدم ،، اشياء كثره من المكيب كانت في لستتي وعليها عروض حلوه وقررت آخذ ومره وحده طلبت من مواقع ثانيه ما عليها عروض لكن حتى ما يكلفني شحنها اشحنها مره وحده سوا .
عموما كثير حسابات اجنبيه او حسابات الميكب تنزل اخبار عن المواقع الي عندها خصومات وايش تكون وبكذا تاخذين فكره عن المنتجات الي تشمل في الخصم والاحسن تسجلون ايميلاتكم في المواقع حتى يرسلون ايميل اول بأول عن عروضهم والخصومات .

كيف اطلب ؟؟
هذا الكلام على مواقع الاونلاين طبعا وعلشان تطلبين تحتاجين فيزا و بريد امركي ماراح اتعمق في الشرح عن كيفيه الطلب لأن كلها معلومات لو بحثتيها في جوجل راح تلاقين الشرح وبالصور بعد .
انا جربت فيزتين الراجحي و البلاد وكلهم ممتازات ، بالنسبه لشركه الشحن فضلت ورلد شيب لأني اقدر اجمع الاشياء سوا بعدين اشحنهم مره وحده بحيث ما يكلفني وغير كذا يوفرون لك 3 خيارات شركات شحن تشحن لك على السعوديه اما رامكس او دي اتش ال او سمسا (فيدكس) عكس شركه ارامكس شوب اند شيب مثلا لأنو ما عندهم خدمه تجميع الشحنات للأسف. 


طلباتي و العروض الي استغليتها  :
"اضغطو على اسماء المنتجات او المواقع وراح يدخلكم عليها"

نوردستروم | nordstrom :  



كان اول موقع طلبت منه ،، ما اتكر اذا كان عندهم خصومات او لا لاكن كان عندهم عرض حبييييته وموجود للحين يعني ماكان مخصص للبلاك فرايدي .
لو متابعيني من زمان تعرفون انو افضل ماركه منتجات عنايه جربتها قبل هي كلينيك ولاتزل رقم 1 بالنسبه لي وسبق تكلمت عن بعض منتجاتها هنا و هنا ولأني استهلك منتجاتهم بسرعه واسعارها هنا تعتبر مرتفعه قررت اطلب هذي المجموعه اونلاين :



المجموعه عباره عن 3 ستب للبشره الدهنيه بالاحجام الكبيره هنا ،، لكن قلت كبير قصدت كبيره ! التونر لحاله 487ml متخيلين هههههههههههه مستحيل يخلص يعني راح يكفيني على الاقل سنه كامله ، الغسول 200ml برضو كميته كبيره راح يكفيني فتره طويله ، والسبب الرئيسي الي حبيت الماركه كلها هي المرطب الجل ♥ 125ml يكفيني 3-5 شهور استخدام يومي ليل ونهار .
مع المجموعه تجيك احجام ميني من نفس النوع مناسبه للسفر مره مره او للطلعات يوم يومين لأنها صغيره ما تاخذ مساحه ومعاهم شنطه كبيره تكفي كل المنتجات وخامتها ممتازه تستاهل كل ريال 
سعرهم :  المجموعه كلها 66$ يعني بحدود 250 ريال (المرطب لحاله هنا ينباع بحدود 290 ريال) يعني عرض جدا جدا ممتاز وزيدو معاها الشحن لأن ثقيل 100 ريال يصير كله 350 ريال بس ولو راح تشترين كل منتج لحاله هنا راح يكلفيك ما لا يقل عن 700 ريال ، اتذكر اني شفت المجموعه في دبنهامز عندنا لكن ما سألت عن سعرها .



وانا اتصفح الموقع طاحت عيني على هذي المجموعه للبشره من شركه ديرما لوجيكا سمعت عنها مدح كثيير ولأن الشركه اسعارها مو رخيصه حبيت هذي المجموعه احجامها ميني للبشره الي فيها حبوب ومشاكل تتخلص منها انا ما عندي مشاكل لكن احيانا بشرتي تتغير خصوصا بين الصيف و الشتاء وتبهذلني اتوقع هذي المجموعه راح تحل لي المشكله ،، فيها غسول رغوه وتونر ومرطب مطفي .
سعرها : 10$ بحدود 40 ريال لكن للأسف خلصت المجموعه لأنها لمتد ادشن .


انستازيا بفرلي هيلز | anastasia beverly hills :


موقع انستازيا في البلاك فرايدي كان عندهم خصم 20% على منتجات الحواجب بس ويوم الاثنين في السايبر موندي اضافو عرض على الهايلايتر مع فرشه الهايلاتر ،، ولان عرض البلاك فرايدي استمر مع السايبر موندي طلبت مره وحده واستغليت العرضين :



اخذت قلمين للحواجب البراويز و القلم العادي لأنو انستازيا معروفه بمنتجات الحواحب وانا احب الاقلام علشان كذا اخذت نوعين اجربهم والي حببتي فيهم زياده انو فيهم مشط للحواجب عاده بعض الماركات ما تحطه وتعتبر نقطه سلبيه للمنتج :( 
ولان كثيير في الانستجرام مدحو الهايلايتر اول ما نزل والكل اشتراه وشفته بكل مكان قررت اطلبه واشوف على ايش يستاهل ؟؟ 
لمن وصل وجربته ......... يجننن يجنن عرفت ليش كل الكلام ، لمعته لمعه مويه مو جلتر ولا شمر بالعكس ناعمه والي حلاها زياده لونها ، انا اخترت الدرجه سووهوليوود والفرشه الي جت معاها ممتازه للهايلات لأنها مخصصه له اصلا تطلع اللون وتاخذ الكميه المناسبه بدون ما تبين اوفر اببدا انصحكم فيهم مره مره .
سعرهم : البراويز كان (21$ ، 80 ريال) وصار (15.75$ ، 60 ريال)
                قلم الحواجب العادي (23$ ، 90 ريال) وصار (17.75$ ، 76 ريال)
                الهايلاتر مع الفرشه كان (53$ ،198 ريال ) وصار (26$ ، 98 ريال) 


لايم كرايم | lime crime :



وصلني ايميل منهم انهم مسويين تخفض على اللكود لبستك وطببعا اخذت منهم لكن الغريب في الموضوع انو كميه الخصم تختلف من لون للون !! يعني لون عن لون يفرق السعر وطبعا الابشع هو الارخص هههههههههه
سبق وطلبت منهم وشرحت كيفيه الطلب بالصور وفيه كم نقطه لااازم تنتبهون منها لمن تطلبون منهم علشان ما تنسرقون اقرأو الموضوع هنا هذي المره رجعت طلبت 3 درجات كان نفسي فيها لكن مادام كان عليهم خصم رجعت اخذت لون عندي لأني حبيته لدرجه خفت يخلص وطلبت واحد ثاني احتياط  ♥♥



ممكن الدرجات تبين قريبه من بعض في الصوره بس في الحقيقه كل واحد احلى من الثاني ،، اللون الي رجعت اخذته هو ريوت لونه  رووعه هو اللون الي احبه في الارواج وردي على بني خفيييف لكن معظمه وردي على البشره يجنن يناسب كل الوان البشره ويختلف من لون للون لكن في كل حالاته يحلو انسأل عنه كل مره استخدمه حبييته مره مره مره ، اللون الثاني شروم للأمانه تمنيت اني ما اخذته ما توقعت لونه بني كذا هههههه يعني بني صريح وانا ما احب هذي الالوان ابدا ابتلشت فيه لأنه ممكن يبهت الوجه لحاله لكن ممكن اخلطه مع ارواج ثانيه يغمقها لي ..
الدرجه الثاليه فيفد لونه بنفسجي ما للوردي اللون غريب لكن هادي يعني الي تبغى تجرب درجات البنفجي بدون ما تغامر هذا هادي جددا لكن فيه بنفسجي حلو حبيته وحبيت لونه على كثير استخدموه من الي شفتهم بالحقيقه لأن بالصور يختلف اللون .
وآخرهم بمكن لونه احمر/اورنج او برتقالي دائما افكر استخدم ارواج توكن برتقاليه لكن ما احب شكلها علي احسها اوفر هذا اللون مثالي لأنه برتقالي لكن مايل للون الاحمر علشان كذا صار اهدى ،، في الحقيقه لونه اغمق من الصور لكن يضل حلو بإمكانكم تشوفون سواتشات لكل الارواج في جوجل لو حابين .
الاسعار : اساسا سعرهم العادي 20$ يعني حدود 75 ريال وبعد الخصم صار :
                 ريوت : 18$ حدود 68 ريال 
                 فيفد :   15$ حدود 57 ريال
                     شروم : 12$ حدود 45 ريال 
                بمكن:    18$ حدود 68 ريال 


ميكب جييك | makeup geek :


ما اتوقع ميكب جييك كانو مسوين خصم لكن انا كنت حابه اجرب الايشادو حقهم فسويت لي باليت بالالوان الي ابغاها ، طلبتها من موقعهم وشحنها على بريدي الامريكي عادي زي باقي المواقع رفض كذا مره بس بعدين قبل .



اخذت 15 لون متنوع مابين مات وشمر ولونين منهم فويلد الي هي اقوى الالوان عندهم تركيبه كأنها رطبه وفيه درجات محدودع عكس الايشادو العادي  ، ولأنهم يجون بدون باليت اشتريت زي باليت من نفس الموقع يوفرونه الحجم الميديم والحمدلله على عدد الايشادو ،، تركيبته روووعه ولونهم واصح وقوي وسهلين في الدمج جددا والاحلى من كذا انها ثابته سويت سواتس لبعض الدرجات :


سعرهم : النوع العادي بـ 6$ يعني 23 ريال 
                الفويلد الي هي النوع القوي و الرطب بـ 9$ يعني 34 ريال  
                و الزي باليت الحجم ميديوم لـ15 ايشادو بـ 17 دولار يعني 64 ريال .

اخواتي طلبو معاي وجمعناهم كلها في صندوق البريد اكثر من 10 مواقع وكلها وصلت مع بعض لبريدي الامريكي بحدود شهر وكانت ملياااانه شحنتها كلها سوا على دي اتش ال مع انو انصحكم بارامكس لأنها ارخص بس هذي المره اخترت دي اتش ال بدون سبب ما اعرف ليش عموما الشحن كله كلفني حدود 150$ دولار واعتبره جدا ممتازه مقارنه بالكميه الي طلبناها .
تأكدو من المبلغ في الفيوا حتى ما تبتلشون اذا تميتو الطلب وانلغى لأن الفلوس ما تكفي + حاولي تدفعين بـ الباي بال دائما لأنها اامن طريقه تحافظين فيها على معلوماتك وفيزتك حتى لو كان الموقع موثوق + قبل ما تأكدين الطلب تأكدي اذافيه كود خصم تقدرين تستخدمينه ويزيد لكم خصم زياده  علشان تستفيدون (ابحثو في جوجل عن اسم الموقع مع كلمه كوبون بالانجليزي وراح يطلع لكم لو فيه ) 
وبس هذا كل شي طلبته وحبيت اشارككم فيه ،، عروض الاونلاين ممتازه سواء كانت في الميكب او غيره دائما استفيد منها واحب افيدكم فيها لكن بما انو حسابي عن البيوتي ما اتكلم عن الفاشن مع انو كثير مواقه فاشن وماركات تسوي خصومات حلوه ستفيد منها لكن ما اتكلم عنها لو حابيت اقولكم عنها قولولي ♥♥
حبيت التجربه واكيد راح اعيدها السنوات الجايه بإذن الله ، لو عندكم اي سؤال اترطوه في الكومنت ولا تنسون تعطوني رأيكم في المنتجات لأنها تسعدني واقدر تعبي وشكررا لكم وعلى متابعتكم لي صدق احببكم ♥


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك 4 تعليقات:

Rori Alo يقول...

تتهني ماشاء الله ... ارواج لايم كرام والهاي لايتر حق انستازيا يجنن ��❤️❤️❤️
حبيتهم ��❤️

Fadheelah Najjar يقول...

عليك بالعافية، تتهنين فيهم ❤️ .. راح اشوف الريفيو تبعك لكلينك .. احس انها ح تناسبني.. ❤️

غير معرف يقول...

انا طلبت ارواج لايم كريم بعد ما مدحتيها وحبيتها مره خصوصا اللون الي قلتي عنه ريوت يجنن صدق ❤️

غير معرف يقول...

احبككككككككك
والان الان طلبت من لايم كرايم 3 الوان :)
والحلو شحن مجاني لعنواني ب امريكا :)

إرسال تعليق