السبت، 23 يناير، 2016

Becca highlighter | هايلايتر بيكا بالتعاون مع جاكلين هيل !! افضل هايلايت ♥


السلام عليكم ورحمه الله وبركاته ♥
الإضاءه وحده من منتجات الميكب الي احبها واعتبرها اساسيه في اي لوك تعطي البشره منظر صحي وجلوي وطبيعي وتحلي الميكب كثيييير، وقبل فتره عرضت صوره  لهايلايتر بيكا شامبين بوب وجتني اسئله عليه لمن اشتريته قبل شهور وللأسف ما كان فيه فرصه اتكلم عنه الا الحين . 


بيكا شركه امريكيه مشهوره جدا جدا بالهايلايترز يعني الاضاءات حقتهم بطله !! ما اتذكر سمعت اي وحده سبتها وبدون مبالغه كل يوتيوبر اتابعها عندها هايلايتر واحد على الاقل ،، خلونا شوي من ماركه بيكا راح اتكلم لكم عن يوتيوبر اسمها جاكلين هيل كثير يحبونهاعلشان شخصيتها ومكياجها وتواصلها مع متابعينها عموما يعني محبوبه عن كثيرين من الناس ،، وفي بدايه 2015 اعلنت انها راح تسوي تعاون مع ماركه بيكا وتطلع هايلايتر خاص فيها لأن دائما دائما تجيها اسئله عن الاضاءه الي تستخدمها وهي تحبهم وتعتبرهم مهمين في مكياجها وبدون المكياج يعني احيانا تحط الهايلايت فوق المرطب وتطلع لمشاويرها عااادي .
لمن طلع الخبر الناس تحمسو مره لدرجه اول ما نزل في ساعتها خلص تماما من كل فروع سيفورا وبعده رجعو نزلوه وخلص في وقت ما نزل وكل مره ينزل فيها يخلص في وقت نزوله من كثر ماهو حلو لدرجه اخذ المركز الاول في اكثر مبيعات سيفورا في هذيك الفتره وكان في الصفحه الرئيسيه في موقعهم ، كان لمتد ادشن لكن لكثره الطلب عليه مؤخرا خلوه دائم يعني راح يمديك تشترينه حتى لو بعدين  .
المشكله الوحيده انه حصري في سيفورا فقط ومو اي سيفورا ! سيفورا امريكا وسيفورا اونلاين و الطلب من سيفورا اونلاين عذاب حكيت عن الطلب و مشترياتي منهم هنا لكن عموما انه متعب وغثيث علشان كذا قررت اطلبه من وحده من التاجرات الي في امريكا وتوفره لي بسهوله بدال ما اتعب نفسي ههههههههه .
تتذكرون قبل فتره نزلت مشترياتي من موقع تارت هنا لأن تارت نفس مشكله سيفورا جمعت طلباتي كلها وقلت لجوري تطلبتها لي ALJORYS.LUXURY مو اول مره اتعامل معاها واظن اغلب متابعيني عارفينها عموما هي وفرت كميه منهم ووقتها طلبتها منها سعرها كان بحدود 245 ريال ما اعرف اذا للحين توفرها لكن اسألوها .



رأيي فيه ؟؟!
تعليبهم للمنتج عادي كتعليب اي منتج عندهم يعني مافيه اي شي جديد غير العلبه الخارجيه هي الي اختلفت ،، تقدرون ترجعون للصوره الاولى وراح تشوفون صوره اوضح لعلبتها لونها روزجولد وملمسها كأن عليها قطرات مطر فيه صوره قديمه وقت ما شريتها نزلتها في انستقرام موضحه العلبه اكثر ♥♥
 علبه المنتج من برا حديد وعليه لوقو الماركه او اسمهم وحوالين المنتج مغلف ببلاستيك ملمسه غريب يذكرني بملمس علب نارس !! وكأي منتج جديد لمن تفتحينه تلاقين قطعه بلاستيك تغطيه منظر فقط يعني ترمينها لأن ما منها فايده .
الدرجه اسمها Champagne Pop وصفو لونها بأنه :


" soft white gold with pinky peach undertones"

يعني اقدر اقول انه بيج او ابيض ناعم مو ناصع مع اندرتون مشمشي ، اللون دافئ ،، لو راح اوصفها من نظري لها لونها ذهبي ناعم يعني مو اللون الي تكون فيه درجه الذهبي قويه ولا لونه ابيض بحيث يبين غبار على البشرات الحنطيه لكنها بينهم ذهبي ناعم ويتخلله لون مشمي جميل جدددا وغريب ما عندي اي اضاءه نفس لونها ،، مناسبه لجميع البشرات حتى السمراء وتبين مختلفه من لون للون يعني على البشرات الفتحه راح يبين اللون المشمي وقليل من الذهبي فتعطي منظر مشرق عكس البشرات السمراء راح يطغى اللون الذهبي وتجذب اكثر وعلى العموم مناسبه لجميع البشرات بدون استثناءات .
الهايلاتر يبين روووعه على البشره لأن حبيبات اللمعه فيه مطحونه بحيث انه يعكس اللون متى ما جاها نور وراح تبين بشرتك كأنها زجاج "جزاز" او لمعه مويه طبيعيه جدا جدا على البشره مافيها قطع جليتر تبين على البشره بالعكس لونها يندمج  ما يبين انك حاطه الا لو قرب احد منك مررره اكيد راح يبين زي اي منتج مكياج ثاني يعني لا تقربين من المرايه وتقولين باين هههههههه اعرف بنات يسونها !!
ممكن تستخدمينها كآيشادو وراح يكون جمييل ،، وممكن تستخدمينها لحالها بدون ميكب تعطي بشرتك منظر ديوي او رطب والاحسن من كذا ممكن تستخدمينها على كامل جسمك في المناسبات تجنن تجنن تجنن في السواتش تحت حطيت لكم وحده مستخدمتها على جسمها شوفوه واحكمو بنفسكم .
صبغه الاضاءه عاليه لكن دائما اي منتج صبغته ولونه يكون قوي يقابله عيب واحد الي هو التناثر ، تتناثر بشكل بسيط وتعتمد كميه الثناثر بنوعيه الفرشه الي تستخدمينها .
مثل ما قلت لمعتها ناعمه مافيها جلتر او قطع تبين وتقدرين تتحكمين في قوه اللون اذا حبيتي تقللين وراح يعطيك لوك طبيعي او اذا كثرتي راح تكون اقوى واوضح لكن ككل ثباتها عالي ما واجهت اي مشكله او قله ثبات وقت إستخدامي لها  . 



كثير منكم سألني اذا هي افضل او حقت انستازيا سوهوليوود احلى ؟؟! 
  شوفو الفرق بينهم بسييييط وكلهم حلوين في سوهوليوود اللون الذهبي فيها اقوى عكس شامبين بوب لأن فيها اندر تون مشمشي فلو قارنت بين ايهم طبيعيه تندمج مع البشره ولا تبين اكثر ؟ راح اقول شامبين بوب يعني الي عندها سوهوليوود وتشوفها طبيعيه على البشره ولا تبين اذا هي طبيعيه اكثر منها متخيلين !
لكن في نفس الوقت اللون في سوهوليوود اقوى وانصع يعني في المناسبات افضلها اكثر من شامبين بوب لأنها تبين اكثر عكس اذا عندي عزيمه او زياره او طلعه خفيفه او حتى يوميا افضل شامبين بوب على سوهوليوود لأنها انعم .
عموما كلهم حلوين ولو مازلتي محتاره خذي الارخص او الاسهل في الشراء .  



كميه المنتج كافيه ؟؟!
في كل ماركه تختلف كميه الهايلايت فيها يعني مثلا في ماك سوفت اند جنتل فيها 10g اما انستازيا سوهوليوود فيها 9g وفي ذا بالم ماري لو 8.5g اما بيكا شامبين بوب فيها 8g بس يعني اقلهم .




 طريقه إستخدامها يكون بفرشه وما تفرق شعرها طبيعي او صناعي انا افضل الطبيعي اكثر لان الصناعي يكون شعرها ناعم لدرجه ممكن ما يمسك المنتج ويصعب عليك استخدامه لكن الفرش الطبيعيه يكون شعرها اخشن بشوي وبكذا تمسك المنتج وتوزعه بسهوله بدون ما يبين اوفر لكن في المقابل راح يتناثر اكثر من لمن تستخدمين فرشه شعرها صناعي وناعم .
الفرشه الي احبها واستخدمها مع الهايلايت من انستازيا بفرلي هيلزشعرها طبيعي رقمها A23 مخصصه للهايلايت حجمها مثالي مو صغيره ولا كبيره بينهم ولا تاخذ منتج زياده شفت كثير يستخدونها خصوصا في انستقرام في مقاطع الميكب ولمن كان عليها عرض في البلاك فرايدي طلبتها ،، طلبات البلاك فرايدي و العروض الي استغليتها كتبت عنها تدوينه مع نصائح مهمه تلاقونها هنا



سواتش للهايلايت :
صعب يبين اللون الحقيقي لأن لمعته تختفي بالتصوير لكني حاولت اجمع صور من جوجل علشان يوضح لكم اللون وابحثو زياده في جوجل راح تلاقون صور اوضح  :









 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


هناك 4 تعليقات:

Haya Ali يقول...

تجنن الاضاءه من اشتريتها ماستخدم غيرها تسلمين على التدوينة ❤️

غير معرف يقول...

حمستيني عليه من زمان محتاره بينه وبين انستازيا سو هوليود وشكلي باخذهم كلهم ههههههه شكرا لك ❤️

nS. يقول...

شكلها وااايد حلووه ..
الله يوفقج ❤️

Noura Khaled يقول...

جعلك بالجنة يختي مره كنت محتارة بينهم والان فكيتي الحيرة عني وعرفت وش اخذ مره شكرا ❤❤ ريفيوهاتك دائما تبرد القلب يعطيك ألف عافية ❤❤❤❤

إرسال تعليق