الجمعة، 11 ديسمبر، 2015

Coconut milk | ريفيو شامبو + بلسم جوز الهند من فورميرلي اورجنكس ♥


السلام عليكم ورحمه الله وبركاته 
من فتره طوييييله كنت اسمع عن شركه فورميرلي اورجنكس المتخصصه في منتجات الشعر والكل كان يحبها وداائما اسمع عنها .. صعب تلاقين منتج للشعر يناسبك بسهوله يعني راح تجربين وتجربين وتجربين وبعدين راح تلاقين النوع الي ناسبك وممكن ما تلاقين النوع الي يناسبك مرره حتى :(
ودائما انا اقول لا تاخذين نصيحه من احد على نوع شامبو او بلسم لأن نوعيه شعرهم واحتياجهم ممكن تختلف كلييا عن الي تبغينه وممكن ما تحبينه او ما يناسبك .
جربت كثير من شامبو وبلسم ولحد الحين ما لقيت المثالي بالنسبه ،، نوعيه شعري دهني ومو كيرلي او شبه ناعم "طايح" يعني لكم التخيل لو جربت استخدم شامو وخلا شعري دهني متخيلين كيف راح يصير ملزق في فروه الراس :/ حتى مع الاستشوار ممكن يلزق علشان كذا داائما احرص على اني ادور شامبو يجفف الفروه بشكل بسيط بحيث انه يشيل الدهون الزايده ولا يجفف الفروه علشان ما يطلع قشر من الجفاف .
بعد ما سمعت عن هذي الشركه بحثت عنها ولقيت انها متوفره في سنتر بوينت و صيدليات وايتس ولأني متأكده وايتس توفر المنتجات اول بأول عكس سنتر بوينت قررت اروح لها وأختصر علي الوقت ،، لمن رحت ما لقيت الا نوع واحد بس سألت عن باقي الانواع قالي خلصو جتنا بضاعه اليوم وخلصت !! معقوله حلو لهذي الدرجه ؟
قالي تعالي بكره يمكن تلاقين البضاعه الجديده وفعلا رحت بعد يومين ثلاث بالكثير ولقيتهم جايبين بضاعه ،، احترت في الانواع ولا حبيت اخذ نوع يكون مكونه الاساسي زيت علشان ما يدهن الشعر مع اني سمعت من بلوقر ثانيه انو ما يخلي الشعر دهني بس الاحتياط واجب ههههههههههه.



كلامهم عن الشركه في الموقع هنا ،، مايحبون التكرار قد ما يهمهم مكونات المنتج بحيث تكون طبيعيه وعضويه وصحيه للشعر وانهم يكونون مختلفين عن باقي الشركات بدايه من المكونات الى تصميم والوان علبهم ومنتجاتهم ..
ما يحبون يسوون دعايات ويستخدمون مودلز لمنتجاتهم وهدفهم مو انهم يخلون الشعر "مثالي" قد ما هم يبغونه يكون اكثف ، انعم ، مستقيم كأنه مستشور يعني او كيرلي او اي شكل عموما يكون الشعر صحي وحلو شكله . 



اي منتج يكون بجوز الهند يجذبني ما اعرف ليش احب اجربهم داائما علشان كذا اخترت نوع الشامبو و البلسم يكونون بحليب جوز الهند المغذي ،، مجموعه جوز الهند تتكون من 4 منتجات الي هي : الشامبو و البلسم و سيروم يمنع تقصف او تكسر الشعر و زيت بخاخ مغذي ،، انا اخذت اول منتجين بس ... :)

الشامبو | Shampoo :

وصف المنتج من الموقع : مزيج كريمي وناعم ،، مضاف بـ حليب جوز الهند وبروتينات البيض و زيوت جوز الهند الي يساعد على تقوية و ترطيب الشعر ، و يتركها معطرة بشكل خفييف مع النعومه واللمعه .

رأيي فيه :اول شي ابحث عنه في اي شامبو استخدمه ولو ما لقيته فيه تركت المنتج على طول ولو انو فيه مميزات !! 
وهو النظافه يعني لو ما حسيت الشامبو ينظف فروه راسي الدهنيه على طول اتركه لأن شعور الشعر المغسول وتحسينه مو نظيف مقرف و يضايق وهذا الي صار ،، الشامبو مو سيئ لكن انا احتاج تنظيف اقوى من الي يعطيني اياه هذا النوع بعيد عن انه يعطيني لمعه طبيعيه مو دهنيه يعني تحسن شعرك صحي غير النعومه ما اعطاني الشي الاساسي الي ابغاه علشان كذا تركته ما قدرت اكمل لأني لو استخدمته راح اظطر استخدم بعده شامبو ثاني علشان ينظف الشعر اكثر وبكذا ما استفدت استخدم 2 في نفس الوقت وتركته بعد اسبوعين من الاستخدام يمكن 6 مرات بس لكن انصحكم تجربونه يمكن يناسبك لأنه ابدا مو سيئ لكنه ماكان الإختيار الصحيح بالنسبه لي  .

تقييمه في الموقع : التقيمم كان عالي 4.6 من 5 ،، وآراء الزبائن كانو يمدحونه تقدرون تقرأونه بنفسكم في الموقع لو حابين اضغطو على كلمه الشامبو فوق وراح يوديكم للصفحه في موقهم فيها معلومات زياده للمنتج .
  
السعر : في صيدليه وايتس 40 ريال لـ 385 ml



البلسم | Conditioner :

وصف المنتج من الموقع : خليط حصري لتغذيه الشعر مضاف بـحليب جوز الهند وبروتينات البيض و زيوت جوز الهند والي راح يخلي شعرك اكثر قوه ومرونه .

رأيي فيه : حبيته اكثرمن الشامبو لدرجه خلصت العلبه في فتره قصيييره ،، استخدمه لأطراف الشعر بس انتبهو البلسم ما ينحط في الفروه علشان ما يدهن ويسبب تساقط فقط على اطراف الشعر يحميها من الجفاف و التقصف وينعم الشعره ويقويها ويعطيها لمعان ،، حبيه مره يرجع شعرك حرير والشعر تكون نااعمه ماتتكسر او تكون ميبسه .
تحتاجين كميه قلييله مره حطي على اطراف الشعر وخليه 2-3 دقايق او زيدي على كيفيك شوفي الأنسب لك وبعدها مشطي شعرك تحت المويه والنتيجه مرره حلوه بعد ما يجف الشعر يصير كأنو مستشور ويققل من النفشه كثييير لأن معروف منتجات جوز الهند ممتازه للشعر الجاف و المنفش او التعبان ، اصحكم تجربونه واكيد راح ارجع اشتريه ان شاءالله .
  
تقييمه في الموقع : تقييمه اعلى من الشامبو 4.7 من 5 

سعره : 40 ريال من صيدليه وايتس لـ385 ml



ككل حبيت تجربتي ولو انها مجرد منتجين ،، اخذت فكره عن منتجاتهم وراح اجرب انواع ثانيه من الشامبو ممكن الاقي النوع المناسب لي خصووصا انو مكونات الشركه طبيعيه وانا دائما ابحث عن الخيار الصحي الجيد للشعر البديل عن الي في الاسواق لأن بعضها مكوناتها مو طبيعيه ممكن تضر الشعر .
لو حبيتو التدوينه لا تنسون تشاركوني بتعليقاتكم وآراءكم هنا وفي الانستقرام ♥♥



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :



هناك 3 تعليقات:

Nora Mess Blog يقول...

أنا أستخدم نفس هذا الشامبو حاليا
و رغم انو نوعية شعرك مختلفة تماما عن شعري (من وصفك :) )
الا انو أعطاني نتيجة حلوة
و الحين حمستيني أجرب البلسم


نجلاء يقول...

ياليتك كتبتي وش مكوناته .. تسلمين على مجهودك

نجلاء يقول...

ياليتك كتبتي وش مكوناته .. تسلمين على مجهودك

إرسال تعليق