الثلاثاء، 10 نوفمبر، 2015

Glam Glow | مجموعه الماسكات من جلام جلو (الازرق ، الابيض ، الاسود) ♥


السلام عليكم ورحمه الله وبركاته  ♥ 
على انو كثييير منكم سمع عن هذي الماسكات وكثير تكلمو عنها لكن لا تزال تجيني اسئله عنها وعن رأيي فيها علشان كذا قررت اكتب تدوينه عنهم .
انا جربت 4 انواع من ماسكات الي هم : الأخضر و الابيض و الازرق و الاسود لكن بما انو التدوينه راح تكون طويله ما حبيت اكتب عنهم كلهم ،، قسمتهم لتدوينتين اليوم راح اتكلم عن الابيض و الاسود و الازرق :)
نبذه صغيره عن الماسكات و الشركه للي ما تعرفها :
جلام جلو سأسست عام 2010 عن طريق حرمه ورجال والهدف من هذي الماسكات استخدامهم خلف الكواليس للمشاهير و وفي البرامج والحفلات وغيرهم علشان تعطيهم منظر بشره نظيفه مشرقه ،، في عام 2011 بدو يبيعونها في المحلات بعد ما لاحظو طلب الناس لها لأنهم شافو نتيجتها على المشاهير وتوزعت منتجاتهم لأكثر من 86 دوله !! وفي الاربع سنوات الي راحت نمت الشركه بشكل كبيييير وحصلت على جائزه الجمال و براءه الاختراع لتكنلوجيا TEAOXI® وصار معترف فيها عالميا لعلاجات الطين سريعه المفعول .
هم بدأو بالماسك الاسود وبعدها طلعو ماسكات ثانيه للبشره وماسك للعين و ماسك للشفايف وغسول للوجه وغيره كثييير ،، وطبعا زي اي منتج فيه كثير ناسبهم و كثير ما ناسبهم فالافضل تجربينه بنفسك وتحكمين وطبعا تقدرين تستخدمينها للبنات او الرجال .
الماسكات قويه على البشره ما انصح فيها للي بشرتها حساسه ابدا ولا اي نوع ابتعدي عنها تماما،، اعتبر الماسكات علاجيه اكثر من انها تجميليه او مؤقته .


كلها تستخدم من 2-3 مرات في الاسبوع  و طبعا لكل بشره نوع ماسك مناسب لها ،، تلاقونهم في صيدليه وايتس و سيفورا .
عيبهم الوحيد هو سعرهم ،، الحجم الكامل الي هو الكبير يكفيك من 10-15 استخدام على حسب كميه استخدامك له بحدود 330 ريال لكن في سيفورا يوفرون احجام صغيره "عينه" بحدود 70 ريال للي حابه تجربها قبل ما تشتري الحجم الكبير واحيانا يكون عليهم عروض زي الي اخذته انا في هذي التدونه كان عرض من سنه او اقل في سيفورا تشترين الماسك الازرق الحجم الكبير ويجي معاه هديه ماسك ابيض و اسود بنفس سعر الماسك الواحد يعني ب 330 ريال بس .
علب الماسك حلوه وقويه لكن مشكلتها ما تحبس الهواء عن الداخل يعني احيانا حتى لو كنتي مسكره العلبه زين ممكن بعد فتره ينشف الماسك كامل وما تستفيدين منه هذا الكلام للنوع الابيض و الاسود لكن الباقين عادي ما يصير لهم اي شي .
قبل ما ابدا ،، بشرتي مختلطه عندي مسامات صغيييره حولين الانف وبين فتره وفتره تطلع لي كم حبه .



THIRSTYMUD™ HYDRATING TREATMENT : 


اكثر التقنيات عندهم المتقدمه للترطيب ،، توفر الترطيب العميق تغذي و تهدئ الجلد ، ريحته فانيلا او كوكنت يخلي جلدك بعد استخدامه بااارد ويعطيك شعور "الوخز" فهمتو قصدي ؟؟ يعني زي القلوسات الي تحسسك بحرقان خفيف هذا يحسكك بحرقان خفيف على بشرتك .
من مكوناته حمض الهيالورونيك و حمض الليمون للترطيب العميق واحماض من التفاح و الشوفان لتسكين و تهدئة الجلد و العسل الخام و جذر الزنجبيل لإزالة السموم وطبعا المكون الاساسي بالنسبه لي جوز الهند يبرد البشره ويعطيها ترطيب مع زيت الزيتون .
حبيته لكن ماراح ارجع اشتريه مقارنه بسعره نتائجه ماهي مناسبه لبشرتي ،، لأن بشرتي مختلطه ما اشوف اني احتاج ترطيب عكس البشرات الجافه .
استخدمه قبل المناسبات لان نتيجته مؤقته ويعطي اشراقه في بشرتي ورطوبه كافيه و يخلي مكياجي نظيف وحلو . 
قوامه زي العسل ولونه فاتح سهل في المد لكنه ما ينشف يعني انتي احسبي 20 - 30 دقيقه وامسحيه ،، تقدرين تستخدمينه لوجهك و رقبتك وينصحون استخدامه وقت النوم يعني حطيه ونامي وفي  الصباح راح تلاقين نتيجه خياليه لكن انا ما جربت لأني اعرف انو راح ينمسح في الوساده هههههههههه.


YOUTHMUD® TINGLEXFOLIATE TREATMENT :


هذا النوع الاول الي طلعو وهو اشهرهم مستخرج من سواحل جنوب فرنسا تحتوي على نسبة عالية من الصخور البركانية القديمة , ويحتوي على مضادات الأكسدة و المعادن الغنية.
المفروض يشد مسام البشرة ويقشر البشرة بلطف و يتركها متألقة ومتوهجة بشكل ملحوظ ويساعدها تكون أكثر سلاسة وأكثر إشراقا ونعومة و يمتص الشوائب و الاوساخ بدون ا يتخلص من الزيوت الطبيعية في البشره .
هو اول ماسك جربته ما تتخيلون قد ايش حرق بشرتي مع انها مو حساسه ابدا ابدا لكني تأمت مررره وجربتها مره ثانيه وثالثه لكن ما قدرت اتحمل صراحه وبلشت فيه لأن الي كان عندي الحجم الكبير بعد فتره طلعت لي حبه كبيييره في وجهي ازعجتني مره حاولت بكل شي عندي علشان اوخرها لكن ما راحت وجا على بالي استخدم هذا الماسك فوقها و النتيجه خياليه من بكره اختفت الحبه تماااما ما تتخيلون قد ايش حبيت الماسك بعدها كل حبه تطلع لي استخدم هذا فوقها ومن بكره تختفي . ما اقدر احكم على باقي المميزات لكن بالنسبه لتنظيف البشره اتفق معاهم 100% اتوقع لو تعانين من رؤوس سوداء استخدميه على انفك ثلاث مرات في الاسبوع وراح تختفي نفس الشي في مناطق الدهون و الحبوب .
تركيبته طين ثقييييله وخشنه فيها قطع سوداء ممكن تكون مزعجه في الاستخدام اول ما تحطينه يكون لونه قريب للاسود لكن اذا نشف يصير رمادي وبكذا تمسحينه . 



SUPERMUD® CLEARING TREATMENT : 


هذا كان المنتج المثالي بالنسبه لي اشوفه نسخه خفيفه من الماسك الاسود المفروض يحارب جميع المشاكل التي تعاني منها البشره ، يعالج حب الشباب ، الشوائب ، التشققات ، التصبغات ، الرؤوس السوداء والبيضاء ، يعمل على تضيق المسام يعطي نتائج فوريه بفضل احتواءه على 4 تقنيات متطوره وغيره كثيير .
يجنن يجنن تركيبه تشبه الاسود لكن مافيها قطع كبيره مزعجه في الاستخدام واسهل في المد بكثيير .
استخدمه على اماكن التي زون في البشره الي هي الجبهه و الانف و الذقن كل المشاكل في هذي المنطقه راح تختفي او تخف بنسبه كبيره بدايه من الدهون و توسع المسام حتى الحبوب وغيرها ،، اول ما تحطينه يكون لونه رمادي غامق وبعد دقايق يبدا ينشف خليه 15 -20  دقيقه وراح ينشف تماماً ولونه يصير رمادي فاتح راح تشوفين كيف الزيوت والاوساخ بالبشره و المسام تبين على شكل نقط على الاماكن الي فيها مشاكل راح تحسين انو الماسك صدق ينظف بشرتك ممتاز جدا جدا وانصح فيه البشرات الي تعاني من مشاكل سواء كانت دهون او مسام او غيره راح تحبونه صدقوني بيكون سحر في علبه ههههههه لكن لو بشرتك مافيها مشاكل ممكن ما يبين فرق كبير معاك  ♥♥ 
بشرتك بعد استخدامه راح تكون نظيييفه والمسام تصغر والرؤوس السودا تختفي وبشرتك تكون نااعمه وتبين نقيه وصافيه ومشرقه راح تخلي بشرتك تلمع لمعه طبيعيه بإختصار الماسك خياااال ،، لازم تنتبهون لنقطه لو بشترك فيها مشاكل او دهون داخل البشره ممكن هذا الماسك يطلعها وبكذا راح تكون بشرتك مليانه حبوب علشانها بتروح يعني بشرتك قاعده تتنظف من جوا مع الاستمرار تختفي هالمشكله .
ولان القناع فيه احماض معينه وهالاحماض تكون مسؤوله عن النتيجه اللي يعطيك اياها الماسك من نضاره ونطافه واشراقه و وتحسين ملمس البشره وتفتيحها وغيرها بشرتك راح تكون اكثر حساسيه عرضه للشمس لااازم تستخدمين واقي + ممكن تفقدين كثير من الزيوت والمويه في بشرتك لأن الماسك يجفف البشره من الاوساخ فبالتالي اهتمي في المرررطب لازم لازم تستخدمين مرطب بعده .



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :







ليست هناك تعليقات:

إرسال تعليق