الجمعة، 13 نوفمبر، 2015

GLAM BOX EVENT | ايفنت جلام بوكس + محتويات صندوقي الي اخترته ؟؟♥


السلام عليكم ورحمه الله وبركاته 
قبل اسبوعين تقريبا وصلتني دعوه من شركه جلام بوكس لحضور ايفيت في صالون لوذان ،، للأمانه انا اما احب اروح ايفنتات ابدا ما اعرف ليش لكن ما احب دائما تجيني دعوات حضور لكني اعتذر منها اما اكون مشغوله او مو في المود ابدا لحد الحين ما حضرت الا ايفنتين وكلهم في صالون ههههههههههه .
عموما نرجع للموضوع قبلها بكم يوم كنت ماسحه فكره الروحه من راسي لكن في نفس اليوم قررت اغير رأيي واروح اجرب كم ساعه وارجع اذا ما حبيت الجو هناك .
الايفنت كان قبل عشر ايام التدوينه نزلت متأخر لأن ما عندي وقت اكتبها :(
ولأني قررت اروح في نفس اليوم بدون ما افكر اني راح اقعد لوقت طول ما اخذت الكاميرا ولا صورت الخدمات الي هناك ومكان الايفنت وغيرها لكني نزلت مقطع صغير في الانستقرام صورته من جوالي لو حابين تشوفون الايفنت ♥♥
لمن وصلت رحبو فيني وعرفوني على الخدمات الي متوفره واقدر اسويها في الايفينت زي البدكير و المنكير وخدمات الشعر و البشره وغيرها كثييير ، عرفوني على شركات مكياج و شعر مره حلوه وبدال ما اقعد ساعه قعدت حتى نهايه الايفينت .
للي ما تعرف ايش هو جلام بوكس اصلا وايش فكرتهم ، انا مشتركه معاهم مده سنه وكل صندوق يوصلني اكتب عنه تدوينه وعن رأيي في منتجاتهم واذا حبيتها او لا ، المواضيع كلها هنا والشرح كان في الصندوق الاول :)


لو تتابعون تدوينات جلام بوكس الي اكتبها راح تلاحظون غالبا ما اكون حابه محتوياتها واتمنى يطورون منها ،، في الايفينت لمن عرفونها على الشركه زياده وبدايتها وفكرتها فهمت انها اساسا كانت في الامارات وتوها دخلت للسعوديه من 3 شهور بس وانهم قاعدين يطورون من البوكسات ويسمعون اقتراحات المشتركات علشان يطبقونها ويحسنونها ، تحمست للشهور الجايه  ♥♥
من ضمن فعاليات الايفنت انو الحضور يسوون بوكسهم بمنتجاتهم المفضله بنفسهم ،، حطو منتجات كثيير على الطاولات واعطونا صناديق نعبيها بالمنتجات الي حابينها طبعا هم في الاشتراكات يحطون من 4-5 منتجات لكن في الايفنت قالو اختارو الي تبغون حتى لو كان اكثر من خمسه منتجات :


المنتجات كثيييره لكن انا اخترت بعضهم و الباقي هم اعطوني اجربها ، من اليمين :
ماسك للترطيب من شركه كوريه اظن ، احب الماسكات الي زي كذا استخدمها قبل المناسبات علشان تكون بشرتي مترطبه وجاهزه للميكب .
الي بعدهم منتجات للشعر صاحبه الماركه اجنبيه كانت هناك اول ما وصلت جت لعندي وودتني لقسم الشعر وعرفتني على ماركتها ومنتجات الشعر حقتها اكذب عليهم لو قلت اتذكر شي من الي قالته هههههههههه كل الي اتذكره اني حبيتهم من شرحها للمنتجات يبغالي ارجع اقرا عندهم قريب ان شاءالله ، المنتجات عباره عن شامبو مرطب للشعر يعالج ويقوي الشعر المعالج كيميائيا ويعوض عن نقص البروتين في الشعر الي اتذكر انها قالت ما يخلي الشعر مدهن ولو انه يرطب الله يستر هههههههههه والمنتج الثاني ليف ان كريم او ليف ان رمدي ما اعرف ايش اسمه بالظبط لكن تستخدمينه بعد الشور وشعرك مبلول يرطب ويعالج الشعر ويحافظ على شكله .
الثلاث منتجات الي بعده مكياج من ماركه اول مره اسمع عنها اسمها Valerie Beverly Hills اخترت قلم للحوجب (ما يرسم ناشف ما اعرف اذا ناشف ولازم ابريه علشان يلين او خربان اذا فضيت بحاول اصلحه ان شاءالله) و محدد شفايف (لونه مره مره حلو بنفسجي هادي لكن جودته عاديه نفس الشي جاف شوي ما اعرف اذا هو كذا او اذا بريته راح يتعدل ؟؟) وهايلات مطفي مايل للزهري لتحت الحاجب (نفس فكره هاي براو من بنفيت يجنن كريمي ولونه قوي وسهل في الدمج احب استخدمه داخل العين ثابت وواضح يوسع العين هذا واحد من اكثر المنتجات الي حبيتها في البوكس)
الي بعده بوش اب لاينر من بنفيت الحجم الصغير ، والي بجنبه سيروم للوجه من كودلي الشركه هذي يمدحونها بشكل مو طبيعي لمن شفت هذا المنتج اخذته بدون ما اقرا عنه علشان كذا ما اعرف عنه اي شي ما عدا انو يستخدم في الصباح قبل المرطب وباقي الشرح بالفرنسي .......!
مسكره جيفنشي حبيتها بعد ما وصلتني في بوكس شهر يوليو هنا والي بعدها مجموعه عطور من كارتييه ♥-♥ هذا اكثر شي حبيته من الي اخترتهم ريحتهم تجننن .

شكرا لكم متابعاتي وصديقاتي وشكرا جلام بوكس على مجهودكم الرائع بالايفنت ♥

 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :


ليست هناك تعليقات:

إرسال تعليق