الثلاثاء، 13 أكتوبر، 2015

My Skin Care Routine | روتين العنايه ببشرتي "الصباحي" ♥


 السلام عليكم ورحمه الله وبركاته 
هذي التدوينه انطلبت مني كثير لكنها تتأجل اكثر من مره لأن ما كان عندي روتين معين امشي عليه مرتب ،، جربت منتجات كثيره وانا عاده ما احب ارجع لنفس المنتجات بعد ما اخلصها علشان كذا ما ككتبت التدوينه الا الحين لأن كل المنتجات الي راح احكي عنها اليوم احبها وناسبتني واستخدمها في روتيني الصباحي
علشان كذا قررت اقسمها ل 2-3 تدوينات ،، اليوم راح اتكلم عن روتيني العنايه الصباح وقبل ما ابدا التدوينه طوييييله تكلمت فيها عن اشياء كثيره علشان كذا اقريها في وقت تكونين مروقه وفاضيه .
طبعا كلنا نعرف اهميه العنايه بالبشره سواء كانت بشره جسمك او وجهك صح !!؟


الي تهملها راح تلاحظ مشاكل كثيييره ما تنتهي بدايه من مسام الى دهون و الحبوب و التصبغات و الاثار وغيرها كثييييير ولأن مشاكل البشره ما تجي بسرعه يعني تطلع لك نتيجه اهمال علشان كذا تاخذ وقت طوييل لحد ما تبين النتائج + صرف فلوس كثيره على علاجات و ادويه وغيرها فمن البدايه اهتمي فيها احسن .
فيه بعض البشرات صعب مشاكلها ما تقدرين تحلينها بنفسك ومهما حاولتي وجربتي ودفعتي ماراح تلاقين نتيجه الا لو استشرتي طبيبه مختصه علشان تنصحك بحلول طبيه  مثل الروكتان ما اظن فيه بنت بشرتها دهنيه وتعااني من حبوب ما سمعت عنه والا ؟؟!
بما اني فتحت موضوع الروكتان راح اتكلم عنه شوي ، للأسف كثير يبدون كورسات الحبوب هذي من عندهم بدون استشاره ولا شي تسمع عنه وتروح الصيدليه تشتريه وتاكله وهي ما تعرف عنه ايييي شي لو تعرف خطوره الحبوب هذي ما شرتها لأنها ممكن تسبب تليف في الكبد تؤدي للوفاة لا سمح الله !!!!! (اخر مراحل خطورتها )
يعني على اي اساس تاكلينها بدون ما تستشيرين ؟ ولو رحتي عند طبيبه ووصفتها لك تلاقينها تحذرك مليون مره عن اشياء لازم تنتبهين لها + يسوون لك تحليل دم كل مره تراجعين عندها علشان ينتبهون لا تصير النتائج عكسيه ، ماراح اكثر كلام لكن قبل ما تفكرين تبدين ابحثي عنه في جوجل الف مره وشوفي تجارب الناس وبعدها قرري ، هذا مقال عن الروكتان مفيد للي حابه تقراه  .
نفس الشي للمراهقات الي بشرتهم فيها حبوب ومسام وما نفعت معاهم المنتجات الي جربوها  الافضل تروح عند اخصائيه تستشيرها افضل علشان تعطيك ادويه طبيه .
عموما الي ابغا اوصله انو فيه بشرات ما تتغير مشاكلها حتى مع الاهتمام علشان كذا الافضل تستشيرين احد عنده خبره فيعا علشان تتخلصين من المشاكل في اسرع وقت .

 راح ابدا اتكلم عنه روتين للعنايه في بشرتي ،، قبل ما ابدا نوعيه بشرتي تختلف بإختلاف الجو ،، الروتين الحالي لبشرتي الحين في الصيف "الحاااار الله ينجينا من النار" صايره دهنيه جدا خصوصا لأني اطلع ومع الايام تزيد الدهون علشان كذا احاول اخفها قد ما اقدر ممكن بعض المنتجات تكون قويه عليك وتجفف بشرتك اقرأي عنها قبل ما تشترينها .

راح اقسم الموضوع لـ 3 اقسام حسب ترتيبي لإستخدامهم .


الخطوه الأولى " تنظيف البشره "  :



مقشر الشاي الأخضر من سانت ايفز :

في الليل بشرتك تمتص المنتجات الي استخدمتيها وتطلع الزيوت و الاوساخ الي في البشره علشان كذا بعد ما اقوم تكون بشرتي دهنيييه والمسام الصغيره حولين الانف واضحه عموما التي زون يكون دهني واحس فيه طبقه دهن في بشرتي ! لو حسيت اني احتاج شي قوي يشيل الطبقه هذي استخدم مقشر سانت ايفر بشكل دائري لمده دقيقه ، حبيبته غريبه كثيييره لكنها مو كبيره كأنها ورقه صنفره حقت الجدار ههههه عرفتوها ؟
راح يشيل الدهون الزايده يشيل الجلد الميت ، المقشر مو قوي علشان كذا عادي تشتخدمينه كل يوم لو محتاجه .


غسول كلينيك Foaming Sonic Facial Soap :

لكن لو بشرتي ما كانت بهذي الحاله السيئه الي تخليني احتاج مقشر قبل الغسول اكتفي بإستخدام غسول كلينيك للبشره الدهنيه ، كلنيك شركه ممتتتتتتازه جدا وانا احبها ودائما استخدمها هي ماركه طبيه/تجميليه فأثق في منتجات البشره حقتهم لكن احيانا تكون قويه وممكن معطره ما اشفوها تنفع للبشرات الحساسه لكن البشرات الدهنيه و المختلطه راح تناسب الماركه جدا ،، ولاحظت بعد انهم كريمين في كميه وحجم العينات عندهم انا اذا اشتريت من وجوه وطبت منهم عينات يعطوني وتكفيني مده طويله لأن كميتها كبيره زي هذا الغسول مثلا حجمه كبيره مقارنه بأنه عينه والا ؟؟
مخصص للبشره الدهنيه و المختلطه ، اذا استخدمتيه يطلع رغوه تنظف البشره والمسام وتخليها نظيفه وناعمه بدون ما تجففها حبيته مره . 


فرشه تنظيف البشره من ذابودي شوب :

انا عاده استخدم الكلاريسونك لأنها عندي لكن لاني استخدمها الليل احسها اوفر وكثيره على بشرتي في الصباح علشان كذا استخدم شي اخف اما اسفنجات تنظيف او فرش زي هذي ، ممتازه تنظف البشره بدون ما تجففها زي الكلاريسونيك لكنها خشنه شوي ممكن ما تناسب الكل والاحلى من كذا سعؤها رخيص بحدود 17 ريال بس .



الخطوه الثانيه (قبل الترطيب) :


purifying pore-tightning من فتشي :

تكلمت عنه في انستقرام قبل فتره ،، منتج زي التونر يساخدم بعد الغسول وقبل المرطب هي خطوه اضافيه انا احبها لكن ما يحتاج تضيفينها اذا مو محتاجه .
هذا النوع يساعد في تصغير المسام و تقليل الدهون خصوصا للبشرات الدهنيه ، انا استخدمه في وسط اليوم اذا حسيت بشرتي دهنيه او ما حسيتها نظيفه عموما استخدم شوي منه على قطنه وامررها على كامل الوجه و الرقبه راح تحسين بنظااافه . 


سيروم فيتامين C من oz naturals :
هذا السيروم وصلني من متجر paradise_shop_2015@  كثييير مدحوه في بلوقات الاجانب وفي اليوتيوب ومع بحثي عنه حبيته اكثر لدرجه حقي بدا يخللص طلبت لي ثاني بنفسي ♥_♥
اليوم نزلت صوره على الانستقرام عن الديرما رولر وان شاءالله راح استخدم السيروم معاه لأني قريت انو يعطي نتيجه واضحه بوقت قصير ، مقال بالانجليزي كاامل حلو يتكلم عنه هنا .
سمعت مره ميكب ارتست تقول انو وحده من مكوناته تستخدم للفيلر فحلو تستخدمين هذا علشان يعبي لك الخطوط لو عندك بدل ما تسوين فلر هذا من الي سمعته لكن انا ما عندي خطوط علشان ما اعرف اذا صدق فيه فرق للخطوط والا لا .
هذا السيروم من الافضل مبيعا عالميا يعالج التصبغات و الاثار و بقع الشمي ويوحد لون البشره ومضاد للاكسده وخالي من المواد الكيماويه والاهم من كذا طبيعي 100% يعطي البشره حيويه و اشراقه ويحميها من الشمس ويحفز البشره على انتاج الكولاجين وينعم البشره والاحلى من كذا تمتصه البشره بسرعه ،كلامهم عنه :
"وقد أظهرت العلم أن التركيب الجزيئي للمصل لدينا يمكن أن تخترق الى مزيد من طبقات الجلد بدلا من مرطب الذي يجلس على قمة من الجلد أو تخترق فقط تحت السطح. تم تصميم OZ المواد الطبيعية فيتامين C المصل خصيصا لتحفيز إنتاج الكولاجين الجديد في حين ترطيب بشرتك أيضا لجعله أكثر ليونة، وأكثر سلاسة وشبابا ، 100\55 نباتي خالي من المواد الحافظة وخاليه من سلفات المعدنيه و خاليه من الزيت والكائنات المعدله وراثيا "
يمكن لأني بشرتي مافيها مشاكل مالاحظت فرق كبيره عكس الي بشرتها ناضجه (فوق30) ممكن تلاحظ فرق اكثير ، انا حبيت النعومه و احساست على البشره كيف يشدها وينعمها .


قطن من ماركه cotoneve  :
نوعيه القطن الي تستخدمينها مهم تكون ممتازه لان بعض الانواع تاخذ من المنتج كثيير وتضيعه عليك مثلا قطن جونسون اسوء نوع كنت استخدمه ولمن احط تونر او بايودرما او مزيل مكياج يمتص منه كثير بدون ما استفيد 💔
هذا النوع ممتاز وخفيف ولا يتقطع مصنوع من القطن ١٠٠٪ فيه ٨٠ حبه ب ٧.٢٥ ريال من الدانوب ، اخزنه في علب شموع باث اند بودي وركس المخلصه بعد ما انظفها .





مرطب البشره الاصفر من كلينيك DDMG :

ممتاز للبشره الدهنيه والمختلطه خفيف وتمتصه البشره بسرعه ، استخدمه قبل الميكب و في الصباح لانه خفيف مو معطر يعني يناسب البشرات الدهنيه الحساسه وغير كذا تحسين ببروده في بشرتك مره حبيه المرطب تكلمت عنه كثيييير ودائما تمدحونه روعه ما يتفوت ابدا ، عاده كنت أخذ الحجم الصغير لكن هذي المره اخذت الكبير ١٢٥ مل ب ٢٩١ ريال كميه بسيطه تكفيك يعني راح يدوم عندك مده طوييله .


كريم عين من Eucerin AQUAporin ACTIVE :

هذي الشركه طبيه ممتازه ودائما منتجاتها تكون حلوه ، كريم العين هذا بالذات حبيييته خفيف على العين لأنه خفيف ما يلزق او يحرق او غيره لكن بنفس الوقت تحت عينك يكون مترطب وناعم ،تعليبهم مرره حلو "ضغاط" يعني ما يحتاج تدخلين اصبعك داخل الكريم وتنقلين باكتيريا وغيره ،، مناسب لكن انواع البشره خاااصه البشرات الحساسه وخالي من العطور ، نادر ما الاقي كريمات عيون حلوه وهذا اككيد واحد منها للي محتاره اي كريم عين تجرب تشتري هذا وتحكم بنفسها .



مرطب الشفايف من بوبي براون :


لفت نظري وانا اتصفح موقع نوردستروم وقررت اخذه من فرعهم الي هنا صح اغلى من النت بس ماابغى انتظر الطلب يوصل  اخذته من فرعهم في بانوراما وموجود في هارفي نكلز الفيصليه سعره ١٢٠ ريال ، علبته معدن خفيف يعكس ، الغريب انو نوع المرطب نفس حق ديور بالظظظظبط مافي فرق الا في الريحه هذا تقريبا مافيه ريحه ، الي خلاني اعتمد عليه واغيره بدل حق ديور هو الكميه ضعف حق ديور واقل سعر منه فيه 15g او 5.oz وفيه حمايه من الشمس بنسبه 15 بس ، ونفس الشي اذا كان الجو بارد راح يتماسك بس اذا مررتي اصبعك يذوب  العلبه كامله معبيه مافيه معدن زايد يعني معبيه الى اخر العلبه وخفيف على الشفايف ، هو مرطب شفايف لا اكثر ولا اقل لكن انا احبه .



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :




هناك 5 تعليقات:

غير معرف يقول...

حبيت التدوينه مرره الله يعطيك العافيه ❤️ راح اجرب كريم العين ان شاءالله

doaa tk يقول...

تدوينهه جميله جدا .. حبيت اسالك مرطب كلينك الاصفر يناسب اللي بشراتهم مختلطة ؟

ghada abdullah يقول...

+doaa tk ايه يناسب البشرات المختلطه

nour houssein يقول...

حبيت التدوينة كتير..على فكرة أنا متابعة جديدة وانتي أول بلوكر تجذبني لمواضيعها..الله يعطيكي العافية

ايثار 💎 يقول...

الله يسعدك ويوفقك يارب ✨

إرسال تعليق