الجمعة، 28 أغسطس، 2015

The body shop cleanser | مجموعه البابونج لتنظيف الوجه (ازاله المكياج) ♥


السلام عليكم ورحمه الله وبركاته 
كلنا نعرف قد ايش مهم تشيلين مكياجك كامل في نهايه اليوم قبل ما تنامين والا ؟؟! 
لكن الصراحه في ايام كثيييره مايكون لي خلق امسحه وفي نفس الوقت لازم ينشال علشان كذا بديت استعمل منتجات لأزاله المكياج او "لتنظيف الوجه" تكون اسرع ماتاخذ وقت وفي نفس الوقت تنظف البشره بشكل كافي من اول مره !
وحده من اشهر الطرق لإزاله المكياج هي الزيوت ،، اي زيت عندك راح يمشي الحال يعني مثلا كثير يحبون يستخدمون زيت الزيتون وغيرهم يستخدمون زيت جوز الهند هذي الزيوت حلوه للبشرات العاديه و الجافه او الحساسه  لكن انا ما تناسبني لانها تبقي اثر دهني مزعج بالنسبه لي خصوصا لان بشرتي متخلطه مايله للدهنيه .

بحثت عن بدائل هذي الزيوت ولقيت ماركات توفر منتج بمسمى Cleansing oil وفكرته انها عباره عن زيت عادي تضغطين من 1-2 في يدك على حسب كميه المكياج او حجك وجهك ،، بعدها تسوين مساج لوجهك بهذا الزيت يعني حطي الزيت فوق المكياج وابدي سوي مساج كااامل حتى على العيون لمده دقيقه وبعدها اغسليه بمويه وهنا راح تلاحظين فرق ! 
في الزيوت العاديه راح تحسين بدهن في وجهك ممكن يبقى بعد الغسيل لكن هذا المنتج يتحول لسائل مثل الحليب تقريبا خفيييف وما يكون فيه اثر دهني مثل الزيوت العاديه ويروح بمجرد ما تخلصين بغسيل بشرتك :)
وحده من اشهر الماركات الي توفر هذا المنتج هي ماك ،، انا جربته وحبييييته جدا وخلصته بعدها بحثت عن بدائل له علشان اكتب تجاربي عنهم خصوصا لان سعره يعتبر غالي بالنسبه للبعض (بحدود 134 ريال)  ، بعد البحثت لقيت كثثثير يتكلمون عن هذا النوع من ذابودي شوب غير اني كنت اسمع عنه كثيير من البلوقرز خصوصا البلوقر امل علشان كذا قررت اشتريه .

زيت البابونج لتنظيف المكياج (77 ريال) | Camomile silky cleansing oil : 
مثل ما شرحت فكرته فوق ، يستخدم لمن يكون وجهك جاف ويدينك جافه يعني لا تبللين يدك قبل لانها راح يصير حليب قبل ما تستفيدين منه ، تركيبته تشيل كل انواع المكياج سواء كان كريمي او باودر ، واتر بروف اوغيره راح ينشال  . 
صح انو ماراح يترك اثر دهني كثير زي الزيوت العاديه لكن ممكن يترك بقايا خفييفه تروح بسهوله بعد استخدامك للغسول .
ممكن تبللين منشفه وجه وتمسحين فيها راح تعطيك نتيجه اقوى من استخدامك ليدك .
المنتج ممكن ما يعجب كثير صح انو يختصر وقت لكن فيه بنات يفضلون يستخدمون مناديل ازاله المكياج و قطن مع محلول خاص وغيره وهذا ممكن يكون افضل واحلى نتيجه لكنك بكذا راح تضيعين وقت + فلوس لأنك كل مره بتروحين تشترين قطن ومناديل لأنك مستحيل تشيلين مكياجك كامل من قطنه او منديله وحده ! الا اذا كان خفيف طبعا .
مع البحث قريت انو نسبه زيت البابونج فيه قليله هذا غير انو معطر وممكن يسبب تهيج للي بشرتها حساسه  !! هذا من قرائتي للمنتج لكن ما احسه بهذيك الخطوره ههههههه الي كاتبه الكلام مبالغه في كلامها لاني ما ذكرت كل شي قالته لكن زيه زي اي زيت لو كذا اجل كل المكياج فيه خطوره !!!! وبالنسبه لنقطه انو معطر ريحته جدا جدا جدا خفيييفه .

ايجابياته :

  • يمسح كل انواع المكياج .
  • سهل في الاستخدام وما ياخذ وقت .
  • يحفظ لك فلوسك لأنك مو مضطره تشترين قطن او غيره لانه يكفيك بنظري فوق 50 استخدام .
  • يترك البشره ناعمه وطريه .
عيوبه :
  • ممكن يترك اثر دهني خفيف لو ما مسحتيه زين .
  • لو مسحتي مكياج عيونك فيه يدخل الزيت جوا العين ويصير مغبش يعني تحسين فيه زيت داخل عينك ، انا امرره المويه حولين عيوني اكثر من مره ويروح لكن كثير يكرهونه بسبب هذا الشي .
  • علبته ضغاظ والمفروض يكون حلوه لكن الضغاظ نفسه مزعج لأنه يطلع المنتج بقوه بشكل مستقيم لو مسكتيه بطريقه غلط وضغطتي راح يحوسك ويبلل ملابسك.
  • لو كان مكياجك جدا ثقيل مثلا سموكي اسود و مسكرا كثييره ممكن يبقي اثر شوي.
  • ما يكفي تستخدمينه لحاله لازم تغسلين بشرتك وتستخدمين تونر حتى تتأكدين تماما انو كل مكياجك راح وبعدها استخدمي المرطب لأنه احيانا يبقي اثر فاونديشن لمن تمسحين بشرتك بتونر .
  •  بالنسبه لي حبيت حق ماك اكثر لأنه ما يترك اثر زي ما يتركه هذا حتى لو انه قليل ويختفي بعد استخدامك للغسول .

عموما صارلي فتره طويله استخدمه واقدر اقول لكم رأيي الكامل عنه ،، المنتج احسه يناسب البشرت العاديه او الجافه وممكن المختطله لانه يترك ترطيب ونعومه حلوه لكن مو الدهنيه ابدا لأنه راح يكون مزعج لها .
على انو منتج يزيل مكياجك كامل لكنه مو الحل لوحده تبغى منتج واحد يشيل المكياج تماااما يعني الا ما يبقي اثر سواء كان فاونديشن او مسكرا على الرموش السفليه مثلا ، اعجبني المنتج لكني ما "حبيته" يعني حلو اني اشتريته واستخدمته لكني ماراح ارجع له لانه ما غطا احتياجي له مثل حق ماك اكثر لان بشرتي مختلطه / دهنيه وهذا السبب الي خلاني ما ارجع له لكن في وقت الشتاء لمن تتغير بشرتي اكيد راح ارجع لك .



زبده زيت البابونج لنظيف المكياج (79 ريال) | camomile sumptuous cleansing butter  : 
نفس الشي مزيل مكياج بزيت البابونج لكن الفرق بالتركيبه او النوع يعني الي فوق زيت هذي زبده تذوب بعد ما تمررين اصبعك عليها .
فكرتها انك تاخذين شوي وتمررينها على وجهك او تسوين مساج وراح تشيل مكياجك ، علبتها وطريقتها عمليه خصوصا في السفر لانها صلبه مو سائله زي الزيت .
طريقتي في استخدامها مختلفه كليا عن الي هم شرحوه ، انا ما احب استخدمها للوجه ما احس انها تشيل المكياج زي الزيت فوق مثلا !
لكني استخدمها لمكياج العين روووووووعه ،عندي طريقتين لإستخدامه :

  •  بإصبعي اخذ شوي وامرره على عيوني مع مساج خفيف وبعدها بقطعه قماش او منشفه امسحه
  •  الطريقه الثانيه وهي الي افضلها بقطنه امررها على الزبده وبعدها احط القطنه على عيوني 10 ثواني وامسح على تحت وفوق كل مكياج العين حتى لو سموكي اسود بيروح وزياده على كذا الجلد حولين العين راح يكون مترطب وناااعم لا تغسلينه بمويه خلاص اتركيه كمرطب للعين  ما في ولا مزيل مكياج عين اعطاني مثل هذي النتيجه _ 


شايفين قوامه كيف ، سهل استخدامه لانه يذوب بسرعه وكميته كبيره جداا تحتاجين شوي علشان تشيلين المكياج كامل ، استخدمه كثييير حتى لمن العب في الايشادو بدون ما اطلع في البيت يخدمني .
ريحته نفس الشي خفييييفه ما تضايق ، افضله للعين اكثر لان كميه الترطيب الي تتركيه بعدها ما تناسب للبشره الا اذا كانت بشرتك جافه :)





 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليق واحد:

Nada read يقول...

وعليكم السلام
اول مرة اسمع عن هالمنتجات ان شاء الله من قائمتي

إرسال تعليق