الخميس، 20 أغسطس، 2015

Brand focus | منتجات جربتها من ماركه "اوستراليس" ♥


السلام عليكم ورحمه الله وبركاته 
تدوينه اليوم فكرتها اخذتها من يوتيوبر وطبقتها اول ما فتحت المدونه ،، 
"براند فوكس" يعني راح اركز على ماركه معينه وأتكلم عن تجاربي فيها ،، اول ما فتحت المدونه تكلمت عن ماركه ميبلين والمنتجات الي جربتها منهم وقتها تلاقون التدوينه هنا .

هذي المره راح اتكلم عن ماركه استراليه اسمها اوستراليس ، الي متابعتني في انستقرام راح تطقني من كثر ما تكلمت عنها ههههههههه 
لكن والله لو ما حسيتها تسوى ماكان تكلمت عنها خصوصا انو جودتها عاليه واسعارها جدا مناسبه ، اول مره سمعت عنها من ميكب ارتست في اليوتيوب استراليه اسمها كلوي ودااائما تمدح فيها وبعدها بحثت عنها ولقيت كثير يوتيوبر استراليات يمدحونها ! 
اتذكر بحثت عنها اونلاين ولقيت لهم موقع ويبيعون فيه هنا  :)  
ما بحثت عن تجارب الناس في الطلب لأن فترتها كنت مشغوله بأشياء ثانيه لكني حطيت كثير منتجات في اللسته علشان ارجع لها بعدين واقرا عنها زياده .
وفي يوم لقيت حساب وكيل لهم في السعوديه يوفر منتجاتهم في الانستقرام ما تصدقون قد ايش انبسطت وسويت فولو ، اظن انهم دخلو حسابي واعجبهم وراسلوني بإنهم حابين يرسلون لي منتجات اجربتها يعني بدال الفرحه فرحتين #الحمدلله هههههههه 
ما جربت منتجات الماركه كلها لكن هذا الي عندي منهم وجربتهم كلهم ،، اسعارهم منخفضه ومناسبه جدا وراح اذكر سعر كل منتج مع الريفيو تحت .
حساب وكيلهم في الانستقرام للي حابه تطلب : MAHB.COSMETICS@ 
ولو عندكم ماركه معينيه حابين اتكلم عنها اكتبو لي في الكومنت وان شاءالله تكون المره الجايه .




باليت الكونتور (100 ريال) :
علشان اختصر الوقت راح اعطيكم رابط تدوينه مقارنه بينه وبين باليت الكونتور من انستازيا كتبت رأيي فيهم مع سواتش للدرجات وغيره هنا .

جامبو برونزر (55 ريال) :
برونز حجمه كبير ، لونه غريبب على انو برونز صاير مايل للرمادي اكثر ، الالوان الي كذا تنفع للكونتور لكن هذا فيه شمر خفييييف  .
ما ينفع تسوين فيه كونتور قوي لكن مرريه بفرشه كبيره على اماكن الكونتور وراح يبين خفيف وطبيعي بدون ما يبين الشمر ، ناعم لدرجه يتفتت بسرعه وهذا الي يقهرني فيه لكنه كبرونز وكونتور عموما حلو .

بودره وجه درجه لايت بيج (55 ريال) :
فيه منها 3 درجات والي عندي افتحهم ، لونها بالنسبه للون بشرتي جدا فاتحه علشان كذا استخدمها لإناره تحت العين يعني بعد الكونسيلر اثبته فيها زي تكنيك البيكنق .
لونها قوي لكنها ناعمه وتندمج مع البشره ما تبين مغبره ، تجي معاها اسفنجه ومرايه زي البودرات عاده .

لوس باودر شفافه (66 ريال) : 
يقولون انها تقارن بلورا مرسييه لكني ما اعرف !
حلوه لتثبيت الكونسيلر و الفاونديشن لكن لا تكثرين منها ، لاحظت انها تخلي مكياجك مغبر اذا كثرتي علشان كذا استخدمي فرشه باودر كبيره ومرريها بخفه على الوجه كامل تثبت المكياج وتمنع الدهون وسط اليوم ، كميتها كبيره وتحتاجين قليل منها يعني راح تقعد عندك فتره .

باليت الكونسيلر (50 ريال) :
باليت صغير فيه 4 الوان 3 منهم مصححات وواحد كونسيلر .
وحده من المنتجات الي ما ناسبتني ، مو معناته سيئ لكن ما اعطتني المطلوب لكني لازلت استخدمها بطرق ثانيه .
فيه مصحح اخضر للي عندها احمرار انا ما عندي علشان كذا ما استخدمه ، وفيه مصحح مشمشي لكن لونه جدا جدا خفيف لدرجه اني استعمله ككونسيلر او برايمر للجفن ، كوركتر بنفسي للاصفرار وبهتان الوجه ما استخده لاني مو بحاجته ، كونسيلر نفس لون الكوركتر المشمشي تقريبا يعني اثنينهم نفس الشي بالنسبه لي .
اللونين الي استخدمهم هم المشمي و الكونسيلر سواء كان تحت العين في الصباح او قبل الايشادو كبيس وعاجبتني هذي الطريقه .





ايشادو درجته xoxo لمتد ادشن (45 ريال) :
ايشادو مقسوم للونين وردي و بنفسجي بشمر خفيف ، ما استخدم الدرجات هذي عاده ولاحظت جودتها مو حلوه مره كأنها حقات اطفال لكني اسخدم البنفسجي احيانا على كسره العين مع ايشادوات ثانيه ويطلع حلو .

جامبو بنسل اقلام ايشادو كريمي Irresistible Plum هذي الدرجه  (45 ريال) : 
وحده من الاشياء الي مههههم استخدمها قبل الايشادو وراح تعرفين ليش لمن تستخدمينها ، عندي انواع كثير والاوان متنوعه من ماركات مختلفه لكن هذا اقلهم سعر وجودته ممتازه ، قبل ما احط ايشادو استخدم ايشادو كريمي علشان يخلي اللون اقوى وثباته اعلى بميه مره .
هذا النوع مرره حلو سهل في الاستخدام لونه بنفسجي واحب استخدمه في السموكي لوك علشان لونه غامق واحيانا استخدمه كـ ايلاينر ادمجه بسرعه لانه ينشف ويثبت ، فيه الوان غير هذا اللون يجننون شوفوهم في الانستقرام .

ايلاينر اسود (40 ريال) :
اذا ما تعرفين ترسمين ايلاينر هذا النوع راح يساعدك مرررره انا احبه واغلب انواع الايلانر الي استخدمه يكون نفس الشكل و الفكره ، هذا النوع اسفنجته او فرشته حاده وقويه فتسهل عليك تسوين ايلاينر حاد ، لونه اسود مطفي وثابت لكن مو واتر بروف ، مع الايشادو ممكن يكون باهت خصوصا اذا كان الايشادو شمر لكن عموما هذا واحد من افضل الانواع الي جربتها .

مسكره من الافضل مبيعا (50 ريال) :
ممكن هي اكثر منتج ما حبيته من الي جربته والسبب انها تطول لمن تنشف وصعبه في المسح :(  لكنها تطول رموشك بشكل فضييييع تجنن في تطويل الرموش استخدمها مع مسكرات ثانيه علشان تعطيني نتيجه حلوه وتنشف بسرعه عكس لمن استخدمها لحالها .

ايشادو ميتاليك بلمعه lana del gray درجتي (45 ريال) :
لو بتاخذون شي واحد من الماركه خذو هذا خصوصا هذي الدرجه ، ما اعرف ايش اقول عنها ...... ! بأختصار خياااال لونها رمادي على ازرق على بنفسجي مرررره حلوه ولمعتها قويه كأنك مستخدمه جلتر ثابته طول اليوم ولونها قوي كل ما استخدنه سألوني عنه تمنيت عندي كل الالوان هههههههه
لازم لازم تجربونها صدقوني ماراح تندمون ، استخدامها بالاصبع طبعا لأن قوامها كريمي او موس  مو جافه او باودر .




مثبت المكياج (50 ريال) : 
مكتوب انو بخلاصه الصبار وماء الودر ،، بالنسبه لتثبيت المكياج انا قلت قبل وراح اقول مره ثانيه ، ما اعاني من عدم ثبات المكياج كثير علشان كذا ما اقدر احكم على مثبتات الميكب :( 
لكني احب استخدمهم قبل المكياج زي البرايمر علشان يخلي الفاونديشن اسهل في الدمج ونضر اكثر مو مات .

برايمر برونزي (45 ريال) :
برايمر برونزي تكلمت عنه في انستقرام قبل ، كنت احسبه يعطيك لون برونزي قوي لكنه خفييف بلمعه ، حلو قبل الفاوديشن صح فيه لون برونزي خفييفه لكن ماراح يغير من لون الفاونديشن ابدا .
الي تحب بشرتها تكون فيها لمعه خفيييفه وترطيب راح تحبه .

روج سائل مطفي pa-ree الدرجه (50 ريال) : 
تركيبه اثقل من انها تكون سائله تذكرني بأرواج جرلاتك الموس ، ريحتها مررره حلوه  ولونه يجنن على البشرات الفاتحه انا ما اقدر استخدمه لحاله يبيني مريضه لانه فاتح علي علشان كذا استخدم محدد غامق قبله ، ينشف بسرعه ويصير مطفي لكن ما يجفف الشفايف بس تأكدي من انك مقشره ومرطبه قبل علشان ما يتكتل  .

لكود هايلايتر ذهبي (50 ريال) :
توقعته يكون قوي للمناسبات لكن لمن جربت طلع خفيييف ما ينفع للمناسبات ابدا لأنه ماراح يبين لكني استخدمه في الصباح ممكن اخلطه مع البيبي كريم او مع الفاونديشن .
اضاءته ناعمه مافيها جلتر علشان كذا اذا بتستخدمينها لحالها تأكدي من انك تطبطبين عليها مو تمسحين لانها راح تختفي ، احب استخدمها تحت اي هايلات علشان يكون اقوى واكثر ثبات وهذي طريقه ممتازه خصوصا في المناسبات .
حلو للي بشرتها جافه وتبغى لمعه خفيفه اخلطيها مع المرطب او فوق المرطب بدون مكياج عادي ارح تعطيك لمعه حلوه خصوصا في الصباح .





سواتش لبعض المنتجات :
( من اليسار ، البرونز ، البرايمر ، الهايلايتر ، الروج ، الايشادو الميتالك ، الايشادو البنفسجي و الوردي ، الجامبو بنسل ، الايلاينر الاسود ، الاربع مصححات وكونسيلرات ، البودره المضغوظه )








 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :



هناك تعليق واحد:

Nada read يقول...

وعليكم السلام
شكلها برند حلوة لكن لازم تجرب قبل احكم ):
عالعموم اكثر شي اعجبني هو الايلاينر
وتغليفهم جميل جدًا

إرسال تعليق