الخميس، 7 مايو، 2015

Sephora Haul | مشترياتي من سيفورا وقت تخفيض 20% ♥



السلام عليكم ورحمه الله وبركاته 
قبل فتره سيفورا أرسلو لي على الايميل عرض خصم 20% لحاملين البطاقه السودا
العرضهذا يصير مره وحده في السنه لمده كم يوم لأصحاب البطاقه السودا وفوق .
طيب أيش هي بطاقات
سيفورا ؟؟
ما أعرف كثير عنها لكن أعرف انها بطاقه يضاف لك نقاط فيها كل ما شريتي من محل
سيفورا ولكل 10 ريال 1 نقطه وحده .
تقدرين تطلبينها لمن تروحين لمحلهم واطلبي منهم يشرحون أيش هي بالظبط عموما أول
ما تاخذينها راح تكون البطاقه بيضاء وبعد ما تشترين بمبلغ 2000 ريال مو شرط في
 وقت معين يعني طوال ايام السنه تقدرين تشترين وكل ما حاسبتي أعطيهم البطاقه
 علشان يضيفونالنقاط فيها وبعد ما توصلين 200 نقطه راح يعطونك البطاقه السودا
ولها مميزات حلوه كتبت عنها في هاشتاق في الانستقرام ______g# .
لمن وصلني الأيميل رحت علشان آخذ كم منتج أبغاه وأستغل العرض بعطور حابتها
في التدوينه ما صورت العطور لكن صورت باقي الأشياء ^^
ملاحظه : الأسعار الي راح أكتبها هي السعر الأساسي بدون الخصم .

BeautyBlender :

اسفنجه بيوتي بلندر ما أتوقع فيه أحد ما سمع عنها قبل مررره تجنن وتستاهل كل ريال تكلمت عنها وعن الميني ورأيي فيهم هنا .
وبما إنها كانت في الخصم أخذت زياده من العاديه و البيضاء و السوداء الفروق بينهم بسيطه بعدين راح أتكلم عنهم بالتفصيل إن شاءالله .
سعرها : 80 ريال للوحده . 




Urban Decay 24/7 Glide-On Eye Pencil :

سألتكم في إنستقرام قبل فتره عن أحسن كحل أسود لداخل العين ثابت وما يسيح ؟ الأغلب مدح Perversion من اربن ديكاي لونه أسود قوي وكريمي لكن يجف بسرعه ويثبت ، أنا ما أحب اللون الأسود لداخل العين لكني أستخدمه في خط الرموش العلوي يعطي الرموش منظر كثافه روووعه جربوها وراح تفرقون .

سعره : 94 ريال .


Urban Decay Moondust Eyeshadow :

هذا الكولكشن من الايشادو يجنن طلبت لون اونلاين من زمان وحبييييته عباره عن جلتر مضغوط جد جد يجنن تحت الاناره يلمع ومره حلو ، قبل فتره نسيت مين لكن في الإنستقرام نزلت صوره لمجموعه الألون الجديده إنبهرت عن الدرجة Solstice لونها قريب من بقمنت ماك بلو براون لكن لمعته قويييه تقريبا جلتر .
 الصور ما تكفي علشان ابين لكم كميه الجمال فيه لازم في أقرب روحه لكم لسيفورا تجربونه . 
سعره : 94 ريال 




SEPHORA Teint Infusion Ethereal Natural Finish Foundation :

فاونديشن سيفورا على اني ما سمعت عنه قبل لكن لمن جربته اعجبتني تغطيته وملمسه ذكرني بفاونديشن ديور نيود اير الجديد نفس الشكل حتى ، أخذت الدرجه 33 بالنظر ما أدي اذا هي نفس درجتي او لا ، تركيبته خفيفه علشان كذا ممكن تلاقين الفاونديشن انقسم لازم تحركينه قبل ما تستخدمينه حتى يندمج مع بعض .
سعره : 99 ريال . 

 Sephora Houppettes , Puffs :
اسفنجه للباودر ، الي عندي رميتها علشان كذا رجعت أخذ زياده .
سعرها : 28 ريال لحبتين 




Formula X The Colors :

اول ما نزلت هذي الماركه للمناكيرات ما بقي يوتيوبر اجنبيه ما مدحته وقالت انو يستاهل التجربه وأنهم حبوه أكثر من ماركات المناكير المعروفه مثل opi و essie ولمن نزلت عندنا تحمست لهم كثيير خصوصا انو سعرهم زي أسعار المناكيرات مو مرتفعه ، اللونين الي أخذتهم اليمين Monumental بيج فاتح يناسب لون بشرتي لاحظو الخط تحت الي اقصده انو عندهم درجات بيج كثيير اختاري الدرجه الي تناسب لون بشرتك ما تبين فاتحه بزياده علشان ما يكون شكله شين على يدك ، اليسار Fahrenheit احمر مايل للفوشي مرره حلو ويحلي اليد كثيير ، تركيبتهم خفييييفه وتنشف بسرعه تحتاجين طبقتين علشان يبين اللون قوي .
 سعره : 49 ريال .   





MAKE UP FOR EVER Aqua Lip Lipliner Pencil :

محدد الشفايف من ميكب فور ايفر ، ميكب فور ايفر وماك من أحسن الماركات الي عندهم محدد الشفايف ، هذا النوع مرره حلو كريمي ويجف لمات طبعا وثاااابت ثابت اظن انو واتر بروف والوانهم مره حلوه ، الي أخذتهم 4C و 14C  .
سعره : 95 ريال . 


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :



هناك تعليق واحد:

hamdiah .e يقول...

محددات الشفايف من ميك اب فور ايفر شي شي خياااالي ، صدق تستاهل كل ريال بس مشكلتها قصيره ليتهم يطولونها زي حقت ماك! وحمستيني اجرب ظل اربن ديكاي 3> شكراً على الريفيو *.*

إرسال تعليق