الجمعة، 17 أبريل، 2015

FOREO LUNA | تجربتي لجهاز تنظيف البشره لونا من فوريو + شرح بالتفصيل ♥



السلام عليكم ورحمه الله وبركاته   
تدوينه اليوم صايره حديث البلوقرز والبنات هذي الأيام وما استغربت صراحه لأن كل منتج جديد او قديم سواء كان حلو أو شين وجربوه كثيرين راح يكثر الكلام عنه وبالنسبه لي احب اسمع واشوف واقرا تجارب البنات علشان احكم عليه واقارن بين تجربتي وتجارب البنات خصوصا الي بشرتها تكون زي بشرتي ،،
وقبل ما ابدأ بالكلام عن الجهاز راح اقولكم التدوينه طوويله ومليانه صور وشرح يعني راح تاخذ منك وقت علشان تقرينها .
وبالنسبه لي هذي اصعب تدوينه كتبتها والسبب لأن شرحها طويل وما أعرف من وين أبدا وكيف أرتب الكلام أخذ مني وقت علشان تكتمل التدوينة اخييرا ♥ ♥ .

ملاحظه : في التدوينة راح اكتب النتائج الي راح تحصلين عليها من الأجهزة بشرط تكونين من البداية مهتمة في بشرتك يعني مو تاركتها سنين بدون عناية وبعدين تستخدمين الأجهزة شهر وتقولين نتيجه فاشلة أو مافي نتيجة !!!
مستحيل تلاقين نتيجة من أي منتج في العالم إذا أنتي أساسا مو ملتزمة أو طريقتك غلط والمشكلة الي ياكلها البنت الي مدحتها يعني مثلا تكلمت عن منتج أعجبني وناسبني وبعد فتره سمعت عنه البنت مع إنها ما تعتني في بشرتها أساسا وبعد ما جربته ما ناسبها أو ماجاب نتيجة او عدم بشرتها تجي لي وتقول أنتي كذابة لأن المنتج ما ناسبني ؟ 
من البداية إذا ما ناسبك أي منتج أيييي منتج إرجعي أقري عنه وعن تجارب البنات وشوفي إذا طريقتك صح أو لا وأذا كان صح وللحين ما عجبك معناته المنتج ما يناسبك مو شرط أذا ناسب غيرك راح يناسبك :) 


جهاز فوريو لونا لتنظيف البشره وتخفيف علامات الشيخوخه سويدي أنتج عام 2013 بعد أبحاث كثييره فوق 8 سنوات من الملاحظة والتطوير ومحاولة تحسين من العيوب الي تكون في أجهزه التنظيف طلعوا بهذا الجهاز و يتميز بكون التنظيف عميق ولطيف في نفس الوقت ، ولو تلاحظون في السنوات الأخيره شركات كثيرره قامو بتصنيع أجهزه تنظيف البشره مختلفة من ناحية اللون والشكل والسعر وأشهرهم كانت شركة كلاريسونك الي أخذت ضجة كبيرة  (اشوف كثير تكلمو عنه علشان كذا مافي داعي أرجع أكتب عنه لكن ممكن أكتب تجربتي له في إنستقرام) وفيه من لوريال و سيجما وغيرهم من الشركات المنافسة ، والسبب الي خلاهم يصنعون هذي الأجهزة هو فعالية تنظيفها أعلى بكثييير من التنظيف اليد وهذا راح يخلي البشره أكثر قابليه في إمتصاص المنتاجات من سيروم ومرطب وغيره بعد ما تخلصين ، صورة لبشرة تنظفت بطريقتين :



ويمكن لأن جهاز لونا إشتهر متأخر كثير ما يعرفون عنه أو احتارو أي جهاز يشترون أو حتى الي اشترت وخلصت وندمت إنها ما عرفت عنه قبل ، طبعا زيه زي أي جهاز له مميزات وعيوب .

الي يميز جهاز لونا عن غيره : 

  •  تقنيه T-Sonic ( موجات صوتية عبر الجلد) توجه نبضات (اهتزازات) عبر سطح الجلد وتطهر المسام من الأوساخ و بقايا الدهون بشكل بسيط ولطيف على البشره والنتيجة بشره أكثر إشراق ونضاره وملمس بشره ناعم والأهم يقلل من الخطوط الدقيقة و التجاعيد لو عندك .
  •  فرشتها مصنوعه من السيلكون ولو تلاحظن كل أجهزه تنظيف البشره الي إشتهرت تكون مصنوعه من النايلون اذا مو غلطانه وهذا شي سيئ  لأن النايلون يحتفظ بالرطوبه ومعروف الرطوبه تكون بكتيريا وهذا الشي يخليك تظطرين تغيرين الفرشه كل 3 اشهر للأسف يعني غير تكلفه الجهاز لازم تسوين لك ميزانيه فرش لبعدين لأن اسعارها مرتفعه اما السيلكون هو الي خلا الجهاز ينشر بشكل اكبر لان السيلكون يدوم معك فتره طويلة مايحتاج تغيرين الجهاز مجرد مت تنظفينه بغسول ترجع جديده وهذا جدا ممتاز من الناحية الإقتصادية لأنك ماراح تدفعين أي مبلغ زيادة في المستقبل والأهم من كذا لأن رؤوس السيليكون ناعمه كأنك تسوين مساج لبشرتك و ماراح تسبب لك تهيج وإحمرار عكس النايلون ، اعرف بنت بشرتها دهنيه معدومه من الحبوب الحمرا الي في داخلها دهون  مع انها تعتني في بشرتها بس اظن انها مشكلة في الهرمونات المهم إنها سمعت عن الكلاريسونك واشترتها لكن لمن استخدمتها عدمت لها بشرتها زياده إنشالت الحبوب ونزل دم وبقى اثار وفي الأخير راحت للعياده - الي بشرتها معدومه وتعاني منها نصيييحه لا تلعبين فيها روحي لأخصائيه بشره هي الي تحدد الي يناسبك وإلا راح تندمين بعدين-  وعلى انو الكلاريسونك جهاز ممتاز وانا شخصيا احبببه لكن ما ينفع لأي احد لأنه قوي على البشره  عكس لونا  .
  • مقاوم للماء يعني ممكن تستخدميها تحت الشاور وماراح تخرب لأن حتى مدخل الشحن "محكم الإغلاق"  .
  • تنظيفها عميق ولطيف في دقيقه واحده والجهاز نفسه مؤقت يعني بعد 15 ثانيه يطلع إهتزاز خفيف يعني إنتقلي للمكان الثاني وكذا . 
  • تقدرين تعدلين على قوه التنظيف يعني مثلا أول ما تضغطين زر التشغيل راح يكون في وضع التنظيف القوي واذا ضغطتي زر التشغيل مره ثانيه راح يكون في وضه التنظيف اللطيف . 
  • حجمه مثالي لسفر لأنه صغير ما يتجاوز حجم اليد شوفو آخر صوره في التدوينه مسكتها بيدي علشان أبين حجمها .
  • من كثر ماهي ناعمه ممكن تستخدمينها تحت العين بخفه كم ثانية .
  • فيه مميزات كثيره الشركة تقولها عن الجهاز منها :

أنواع جهاز لونا :


فيه منها 5 أنواع لكن ماراح أتكلم إلا عن الي متوفره عندنا وهي آخر نوعين يسار والفرق بينهم هو :


الفرق بينهم بسيط ماراح اتطرق كثير بالنسبه لـ لونا العاديه لأنها مو عندي ولا عندي فكره عن مميزاتها أكثر من :
  1. حجمها أكبر .
  2. تجي معاها شنطة صغيرة للحماية مناسبة للسفر .
  3. الشاحن ممكن تشبكينه في الفيش (عكس الميني ما تقدرين تحت راح اشرح)
  4. لها وجه تنظيف ووجه للمساج والتدليك لمن تستخدمين مرطبك .
  5. فيه منها 3 أنوع بينهم إختلاف :
زرقاء : للبشرة الدهنية والمختلطة .
وردية : للبشرة العادية و الحساسة .
بيضاء : للبشرة شديدة الحساسية .



اما بالنسبه لـ لونا ميني ، الأشياء الي تجي معاها :



  1. علبتها البلاستيك هي الحافظ لها لأن ما يجي معاها شنطه صغير .
  2. شاحن مدخله يو اس بي راح اتكلم عنه تحت .
  3. ورقه تعليمات صغيره .
  4. بطاقه كود ضمان وأظن الضمان لمدة سنتين .
  5. لها 5 الوان : فوشي ، بنفسجي ، وردي ، رمادي ، سماوي ، مافي فرق بينهم الإختلاف فقط باللون والا كلهم نفس المميزات عكس لونا العادية . 

طريقة إستخدامه (طريقتي الخاصه ) :




  1. تأكدي من مسح كل الميكياج في بشرك قبل .
  2. شغلي الجهاز على السرعه المناسبة وأبدي في الجبهه لمده 15 ثانيه وبعدها راح يطلع زي الصوت بأن الثواني انتهت إنتقلي للخد الأول لمده 15وبعدين الخد الثاني 15 ثواني وبعدين الذقن (تحت الفم) 10 ثواني و5 ثواني للأنف وخلصنا دقيقه كامله انا ما احب استخدمه تحت العين كذا بدون سبب بس لو أنتي حابه ممكن تقسمين وقتك بالطريقه الي حابتها وإلا بالطريقه الي هم اختاروها . 
  3. طريقه التنظيف تكون من الداخل للخارج يعني مثلا من عند الأنق لفوق حتى توصلين لأذن .

الأمام : تنظيف لطيف
الخلف : تنظيف عميق
عادة أستخدم الوجه الأمامي لأن تنظيفه الطف لكن في التي زون أحب استخدم الوجه الخلفي لأن تنظيفه اعمق لكن للحق مافي اختلاف كبير بينهم ههههههه شي نفس بس .



مدخل الشاحن (ضد الماء) وعلشان تعرفين اذا شحن أو لا أول ما تشبكينه راح تنور القاعده وتطفي تنور وتطفي وإذا إكتمل الشحن راح تضل مولعة بدون ما تطفي وبكذا افصليها .


الشاحن وممكن أقول إنه عيب فيهم :( مدخله USP يعني بالنسبه لي علشان أشحنه لازم اشغل اللاب توب لكن فكرت استخدم راس شاحن اللآيفون يمكن يظبط ؟ ما جربت وأنا اكتب فكرت فيها ههههههههه 
سلك الشاحن قصير احسن بالنسبه لي لأن ماله داعي يكون طويل زي الكلاريسونك لأني ماراح استخدم الجهاز وهو يشحن علشان كذا افضله يكون قصير.
وفيه ميزه للجهاز وهي الي أنبهرت فيها صدق ، الجاهز شحنه ياخذ بالكثير ساعة وتقدرين تستخدمينه لمده 300 مره علشان تشحنينه مره ثانيه يطووووول معك .


رأيي فيه ؟
بشرتي في الصيف دهنيه وأحب استخدم أجهزة تنطيف البشره بعد ما أرجع الظهر او العصر وعاده تكون بشرتي مدهنه جدددا  فأحتاج شي قوي علشات يشيل الأوساخ والدهون تماما جهاز لونا ما ناسبني في هذا الوقت لأنه اخف من انه يشيل الدهون كلها علشان كذا اظطر أستخدم الكلاريسونك.
 احب استخدم لونا قبل النوم وفي الصباح تنعم البشره وتعطيني نضاره ونعومه حللوه هي الجهاز الي معتمدته الحين الكلاريسونك استخدمه بس لمن احس بشرتي تحتاج شي اقوى في هذاك اليوم .
نتيجه لونا سريعه وتلاحظينها من رابع او خامس يوم خصوووصا منطقه الأنف راح تختفي الرؤوس السودا تماما وراح تلاحظين فيه لمعه بوجهك صحيه مو دهنيه لا طبيعيه تعطيك اشراقه مدي هي كذا والا انا اتخيل هههههه
أستخدمها مرتين يوميا تنعش مره ونتيجه استخدامي لها اكثر من شهرين مرره حلوه الحمدلله .
صراحة حبيت التجربه وحلو إنك تغيرين من روتينك وتستخدمين شي جديد يمكن يكون أحسن .
لو بشرتك عاديه ، حساسه ، حساسه جدا لا تفكرين بغير لونا لكن لو دهنية أو مختلطه كميه الدهون وقوه التنظيف الي تبغينها هي الي تحدد لو كثيير ما اتوقع راح تحبينها لأنك راح تحتاجين شي اقوى يمكن .
   

سعره + أماكن توافره ؟
الجهاز موجود حصري في صيدلية وايتس فقط يعني ماراح تحصلونه في أي مكان ثاني في السعوديه ، صراحه وايتس صيدليه نادره بالنسبه لي مررره احبها احسها تجمع بين المنتجات الطبية و الجمالية في مكان واحد ودااائما متجددين وعندهم منتجات حصرية يعني صراحة اكثر من كذا مافيه ♥ ♥ ♥ ♥ 
سعر لونا العادية بحدود 900 ريال  لونا الميني بحدود 600 ريال .



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :





هناك 7 تعليقات:

غير معرف يقول...

الله يوفقك ياغاده ويسعدك من جد مدونه رائعه واستفدت منك كثير ماشاء الله عليك <3

غير معرف يقول...

هل يمكن ان يستخدمها اكثر من شخص وكيف طريقه غسلها يعني اي صابون ولا لاززم لها صابون خاص

ghada abdullah يقول...

لا الافضل تستخدمينها لحالك ، عادي مرريها تحت المويه بعد ما تخلصين

مدونة الياسمين يقول...

ماشاء الله عليكي مررررة حبيت التدوينة خصوصا انه شرحك واقي وكافي ومفصل جدا ربي يسعدك🖒😍

مدونة الياسمين يقول...

ماشاء الله عليكي مررررة حبيت التدوينة خصوصا انه شرحك واقي وكافي ومفصل جدا ربي يسعدك🖒😍

غير معرف يقول...

سعر الجهاز جدا غالي انا اشتريته من النت ب 60 ريال��

Nada osama يقول...

هل في مكان في المدينة المنورة أقدر أشتريها منه ؟

إرسال تعليق