الأربعاء، 15 أبريل، 2015

CLINIQUE | تجرتي لمجموعه كلينيك ( ٣خطوات ) ♥


السلام عليكم ورحمه الله وبركاته  
كثير طلبو مني اتكلم عن مجموعه كلينيك 3 ستيبس للبشره ، في البدايه سمعت عنها كثير وتقييمها كان عالي علشان كذا حبيت اجربها وكلينيك من الماركات الي تهتم في منتجات البشره وتحاول تحسن منها قد ما تقدر ...

المجموعه في منها انواع كثيره مختلفه على حسب نوع بشرتك ، في الشتاء بشرتي كانت مختلطه مايله للجفاف فأخذت المجموعه الي تكون للبشره المختلطه/جافه لكن اشتريتها ونسيتها في الدرج لأني كنت احاول اخلص المنتجات الي عندي باقي منها شوي وخلص الشتاء ولا استخدمتها وطبعا بشرتي تغيرت في بدايه الصيف وصارت دهنيه علشات كذا رجعت وأخذت المجموعه الي تكون للبشره الدهنيه .
احجامها ميني علشان كذا سعرها 152 ريال من وجوه او دبنهامز ، صغيره ومناسبه للسفر وتكفيك مده علشان تحكمين اذا حبيتيها او لا لأن الأحجام الكبيره اغلى بكثييير .



فكره المجموعه إنها تكون شاملة الأساسيات بثلاث خطوات بس :

1/  تغسلين وتنظفين بشرتك من الاوساخ المتراكمة في اليوم .

2/ تعقمين البشره والمسام من باقي الاوساخ والدهون .

3/ترطبين البشره علشان تبين صحيه وما تفقد ليونتها ولمعتها ولونها .





رأيي فيهم ؟




Liquid Facial Soap Mild (الغسول 1.7oz)
الغسول لطيف على البشره على انه مخصص للبشره الدهنيه الا اني ما حسيت في جفاف في بشرتي ابدا ابدا وهذا الي خلاني احبه وأستخدمه يوميا نهار وليل وزياده على انه لطيف وخفيف على البشره ينظفها بعمق وتحسين بشرتك نظيفه وتلمع والاهم مافيها قشور او جلد ميت ، حبيته لكن بما اننا في الصيف وبشرتي تدهن كثير احتاج شي اقوى مثل غسولات نيتروجينا رووووعه للبشرات الدهنيه . 

Clarifying Lotion 2 (التونر3.4oz) :
تونر يستخدم بعد الغسول علشات ينظف بقايا الاوساخ ، التونر بالنسبه لي خطوه مهممه وجربت انواع كثير وكلهم حلوين يعني مافي واحد منهم بهرني لكن هذا يختلف تماما احسه غسول على هيئه تونر !! تنظيفه عميييق ما انصح فيه بعد الغسول ابدا لأنه راح يهيج البشره انا اول ما اصحى من النوم ما احب استخدم غسول علشان كذا هذا حل مناسب لي استخدم شوي في قطنه وامرره على كامل الوجه والرقبه يشيل الأوساخ والدهون تمااما ويغنيني عن الغسول في الصباح والي تعاني من اسمرار في الرقبه (بدون ما تكون مشاكل طبيه طبعا ) كل يوم مرتين مرري التونر على رقبك وشوفي الأوساخ كيف تطلع .


 Dramatically Different Moisturizing Lotion+ (المرطب 1oz):
المرطب هذا روووعه ومو أول مره أجربه خلصت قبل علبتين منه ، نفس الشي فيه انواع لكل البشرات الي جربته للبشره الدهنيه خفييف وتمتصه البشره بسرعه ترطيبه ممتاز جدا بحيث انه يرطب البشره بس ما تخليها تبين دهنيه وهذي مشكلة يعانون منها أغلب اصحاب البشره الدهنيه وعلى بالهم الحل أنهم ما يستخدمون مرطب !! خطأ لازم تستخدمين مرطب للبشره حتى لو بشرتك دهنيه لكم الأهم تلاقين النوع المناسب وهذا ممتاز حتى قبل الميكب .


 

حجمها مقارنه بحجم يدي ، عموما حبيت المنتجات وأشوفها حلوه كهديه لأحد لأنها جمعت اساسيات العنايه بالبشره بسعر مناسب مقارنه بالشركه 
او حتى الي حابه تعتني ببشرتها وما تدري ايش تشتري اهم شي ما تكون بشرتك حساسه جدا ما اتوقع راح تناسبك .
راح ارجع آخذ من التونر و لأني حبيته خاصه في الصباح ونفس الشي المرطب أني معتمدته لنفسي من فتره ولأنك تحتاجيم كميه صغيييره راح تكفيك مده . 




 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :




هناك 4 تعليقات:

غير معرف يقول...

بأي صيدليه القاه ؟؟

ghada abdullah يقول...

مو صيدليه ، تلاقينه في وجوه او دبنهامز

alsh M3ali يقول...

شريتهم على مدحج وعلقت عندج بانستغرام اني بجربهم بس صاكني بلوك الحين ، بس ماخذيت الازرق خذيت الوردي شنو اهوا هم تونر؟؟؟

ghada abdullah يقول...

+alsh M3ali الورديه للبشره الجافه ،، ما اتوقع المنتجات تكون نفس الي جربتها للأسف :(
المجموعه الي عندي مرطبها يكون جل وهو الي امدحه لكن المجموعه الي اخذتيها المرطب يكون لوشن وانا ما حبيته يلزق وما يندمج زين ابدا ،، اذا فيك الغي الطلبيه او جربيها يمكن تناسبك لكن مو هذي الي امدحها .

إرسال تعليق