الثلاثاء، 24 مارس، 2015

Contour Palette | بديل ارخص لباليت الكونتور من انستازيا ؟


السلام عليكم ورحمة الله وبركاته 
في هذي الفتره اقدر اقول اهتمام الشركات بالكونتور صار اكبر من قبل ، مثلا في موقع سيفورا اختارو "الثيم" يكون عن الكونتور وفي موقهم قسم كامل للماركات الي توفر باليت او باودر للكونتور !! تكلمت قبل عن كيف تسوين الكونتور والهايلات هنا   
فيه شركات كثيييره طلعت باليتات كونتور سواء كانت كريميه أو باودر لكن اول شركه عرفت انها نزلت هي انستازيا بفرلي هيلز وانشهر الباليت شهره كبيييره في السوشل الميديا ، كثير ميكب ارتست استخدموه وفي اليوتيوب تكلمو عنه ولأنه سبب ضجه قررت آخذه علشان اجربه واحدد رأيي فيه .
في الوقت الي كنت ابحث عن الباليت علشان اشوف آراء الي استخدموه في اليوتيوب كان فيه ميكب ارتست استراليه تكلمت عن باليت من ماركه استراليه اسمها اوتراليس ومدحته كثيير وقالت انه بديل ممتاز لباليت انستازيا بفرق السعر !! احترت اخذ اي واحد ولمن دخلت لموقع علشان اطلب الي مدحته كان سولد اوت واتذكر في الفديو قالت انه راح يكون سولد اوت لفتره لأن الطلب عليه كبير تحمست له اكثر لأن اذا كان سولد اوت معناته الناس حبوه وعلشان كذا صارو يطلبونه بهذي الكميه وفعلا لقيت يوتيوبر ثانيه تتكلم عنه لكنه للحين سولد اوت فقررت اخذ الي من انستازيا و اريح نفسي ورحت اخذه وبعده بفتره لقيت حساب في الانستقرام وكيل لهذي الماركه وموجود في الرياض وزياده على كذا توصيلهم مجاني ♥_♥  ارسلوا لي الباليت علشان اجربه وطبعا صار عندي الاثنين ههههه

* للأسف غيرو حسابهم او حذفوه ماعاد لقيتيه فمسحت الحساب الي كنت كاتبته  القديمه :( 

انا جربت اثنينهم وراح اتكلم عنهم بشكل مفصل مع صوره لكل نقطه اشرحها 
الصوره في اليمين دائما راح تكون انستازيا اما في اليساراوستراليس . 


  • انستازيا اصغر بشوي وعلبته كرتون قوي ويتسكر زي المغناطيس .
  •  اما وستراليس اكبر بشوي وعلبته بلاستيك وعلشان تفتحيه لازم تسحبينه لفوق اقرب مثال بودره ماك يعني كيف تفتحينها ؟
  • لكن كلهم لهم نفس العرض .



  •  انستازيا فيه من الباليت نفسه ثلاث درجات والباليت الي عندي هو الاساس اتوقع لايت ؟ ، الوانه ناااعمه خفيفه (كأنها باهته) يعني ماراح يطلع لك لون مره قوي عيدي عليه لمن توصلين للدرجه الي تبغينها وهذا الشي انا احبه  ، حجم البودره نفسها صغير في الصور توقعتها اكبر :( ، تقدرين تطلعينها من الباليت نفسه وتحطينها في باليت ثاني لو حابه يعني تقدرين تتحكمين في اماكن الالوان .
  • اوستراليس الباليت نفسه مافيه غير درجه وحده لكل الوان البشره يعني سواء كنتي بيضاء او سمرا نفس الباليت مافي خيار ثاني لكن الوانه مناسبه ما اشوفه عيب فيهم ، الوانه قويييه صبغتها مره عاليه جد جد تحاجين لمسه وحده بالفرشه والا راح يتناثر واللون نفسه نااعم كأنه كريمي اتذكر اول ما سويت سواتش للهايلات طبعت بصمه اصبعي فيه ! حجم البودره اكبر بشوي ولو حطيتيهم فوق بعض راح يبين الفرق ، ما تقدرين تطلعينها من الباليت او تغيرين ترتيبها 
  • الالوان شبيهه بعض مرررره يعني اقدر اقول نسخ ولصق لكن الفرق هي جوده الون نفسه يعني لان انستازيا باهت مو مبين قد ايش يشبه اوستراليس ، كلهم سهلين في الدمج لكن ميزه انستازيا انك تزيدين اللون لحد ما توصلين للنتيجه الي تبغينها اما اوستراليت لو غلطتي وزدتي يمكن يبين مبقع او صعب الدمج لكن ما اتوقع يحوسك كثير بالعكس يختصر عليك وقت من المره الأولى تحصلين النتيجه الي تبغينها . 


  •  من ورا انستازيا فيه كلام عن الباليت ووين صنع وغيره.
  • اما اوستراليس فيه صور توضيحيه مررره سهله راح تساعدك كثير لو انك مبتدأه اشوفها فكره حلوه انهم حطوها .

سواتش للدرجات :


عموما انا حبيتهم كلهم لانهم جامعين كل الي تحتاجينه في باليت واحد :

  • هايلات شمر 
  • هايلايت اصفر ووردي خفاف لتحت العين فوق الكونسيلر 
  • لون مايل للرمادي للكونتور 
  • لونين مايلين شوي للبرتقالي ممكن تستخدمينهم كبرونز
سعر باليت انستازيا 250 ريال من تاجر وباليت اوستراليس 100 ريال بس من الوكيل
ما ندمت اني اخذت اثنينهم لان كلهم حلوين ويخدمونك .
في اي باليت انصحكم ؟ 
صراحه ما اشوف هذاك الفرق الوااسع بين الاثنين علشان كذا انصحك بباليت اوستراليس ارخص وجودته ممتازه وانا استخدمه اكثر لأني لاحظت ثباته ولونه اعلى خصوصا في المناسبات ♥♥♥♥



 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :



هناك تعليق واحد:

Dena Faisal يقول...

سلام، الحساب الي يبيع باليت AC هل تغير ؟ لاني حاولت ادخل عليه يقول مافي حساب بهذا الاسم ؟

إرسال تعليق