السبت، 13 ديسمبر، 2014

Glowing skin | لمعات للجسم ♥


السلام عليكم 
الموضوع هذا تكلمت عنه في الانستقرام قبل ،
دائما في الرانوي او الرد كاربت تلاقين اجسام العارضات او المشاهير تلمع وصحيه مثل الي في الصوره الي تحت   




وطبعا اشوفها خطوه مهمه لمن تلبسين فستان او تنوره  تبين الساق او اليد راح تفرق في اللوك كثيير وتحسين بشرتك صحيه ، في نفس الوقت لازم تتأكدين من انك سويتي الخطوات قبل لا تستخدين اي لمعه علشان تضمنين انو النتيجه ممتازه 




  • اول خطوه انك تشيلين الشعر وجداا مهم ولا اللمعه ماراح تبين ابدا ، لو مسويه ليزر فأنتي مرتاحه بس لو ما سويتي استخدي موس او حلاوه او مكينه او الي يريحك .
  • بعدها استعلمي مقشر والمفروض يكون المقشر جزء من روتينك الأسبوعي اصلا، لانه يشيل الجلد الميت من البشره ويفتح لونها ويخيلها انعم وتمتص المرطب بعدها بسرعه .
  • ولا تنسين الترطييب مهم ، انا افضل استخدم مرطبات طبيه وقفت استخدم حقات فكتوريا سيكرت او باث اند بودي وغيرها لاني لاحظت الطبيه تناسبني اكثر لانها بدون ريحه وترطيبها عميق مثل مرطب سياتفيل للبشرات الجافه سواء جسمك او وجهك ومعروف قد ايش ممتازه هذي الماركه ، او استخدم وايبس الترطيب من الف بس ما حسيتها وااو لكن وقت الحاجه استعملها
  • اخر خطوه لو عندك تصبغات او جروح غطيها بفاونديشن خاص للجسم زي تبع ماك فيس اند بودي او ميكب فور ايفر فيس اند بودي كلهم حلوين بس لو ما تحتاجين فاونديشن اكتفي بكونسيلر كريمي ثقيل زي تبع كريولان واستخديه بالطبطبه. 





انواع لمعات الجسم الي استخدمتها وجربتها قبل (فيه انواع كثييره وماركات متنوعه ومتوفره عندنا لو بحثتي راح تحصلين) :
ملاحظه : لو كانت اللمعه قويه ممكن تخففينها بمرطب + شي طبيعي المنتجات الكريميه مع الجو الحار راح تسيح وتبهذلك انتبهي 

soap and glory :
بخاخ للجسم سمعت مودل تتكلم عنه في اليوتيوب وانها مستحيل تستغني عنه لانها تستعمله يوميا ، لونه بني على ذهبي ممكن لو انك بيضا يقلب برتقالي ،ميزته انو يروح مع المويه يعني مثلا الي حابه تجرب التان بس ما ودها اللون يثبت تجرب هذا واذا خلصت تتحمم ويروح ، انا استخدمه اذا سويت مكياج برونزي وحابه جسمي يكون برونزي ابخ من بعيد وادمجه بس لازم تكون يدك خفيفه وسريعه لانه ينشف بسرعه ، اخذته من صيدليه بوتس واظن فيه بس درجه وحده وتقريبا مات بدون اي قلتر او شمر بس اضاءه خفيفه تبين مع الاناره    .

Hard candy :
كريم ثقيل فيه شمر وهو المفضل عندي مرره احبه للساق يعطيها لمعه فضييعه ادمجه باصابعي بس مشكلته مع الاحتكاك في القماش تروح اللمعه ويبقى اللون يعني افضل آخذه معي واستعمله اذا وصلت سريع وما يحوسك زي الكريم المرطب وفيه منه درجتين البرونز والوردي حقي من حساب تاجره في الانستقرام (@vogue__boutique) 

MUFE diamond cream & foreve52 diamond cream :
كريمين شبيهين ببعض مررررره حتى في اسم الماركه الاختلاف بس في السعر تبع ميكب فورايفر ما اتوقع للحين موجود لانه عندي من سنوات بس تبع فور ايفر52 قبل فتره اخذته من تاجره في الانستقرام (@nona_makeup4ever25) كلهم من درجات الزهري ما انصح في هذا اللون الا الي بشراتهم بييييييضا او خذيهم بس غيري الدرجه لان فيه منهم درجات كثير ، ثباتهم عالي ولمعتهم قويه مع الاناره تبيين لكن مع الوقت تخف 

Mac strobe cream :
عارفه انو مخصص للوجه بس حطيته للبنات الي اشتروه وابتلشو فيه او ما ناسبهم جربي استخدميه للجسم لمعته خفيفه وتقريبا مو ثابت لاكن يمشي الحال في الزيارات القصيره لانه ناعم 

MUFE shin loose powder :
لوس باودر (بودره حره ) ماادري اذا للحين موجود والا لا ، لأنه قديم بس اني مرره احبه البودره ناعمه وتندمج مع البشره ولا تبين قويه حلوه للي تبغى شي نااعم استخدمها مع فرشه كابوكي للجسم .

Benefit high beam : 
نفس الشي مخصصه للوجه بس انا احب استخدمها للجسم اكثر لونها قوي وثابته بس لو خلصت ماراح ارجع اشتريها بسبب لونها 

Michael kors :
لمعه بس على شكل صابون يعني متماسكه هههههههه من مايكل كورس اخذتها من موقع سيفورا قبل سنه مخصصه للساق لمعتها زي الفازلين يعني بدون قلتر او شمر ترطيبها عالي وممكن تستخدمينها يوميا والأحسن سعرها 10 دولار بس وحجمها صغير يدخل في الشنطه 



سواتش لبعض الدرجات :



                                                    

 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك تعليقان (2):

غير معرف يقول...

يعني من وجهة نظرك وش التوب بينهم ؟

ghada abdullah يقول...

مااقدر احدد واحد لان كل وحده ورأيها انا احب استخدم تبع هارد كاندي

إرسال تعليق