السبت، 13 سبتمبر، 2014

ايش هو البرايمر ؟

السلام عليكم ^^
موضوع اليوم راح يكون عن البرايمر او البيس او الي حابه تسمينه :)
السؤال يمر علي في اليوم مرتين تقريبا , يعني في الاسبوع 14 مره علشان كذا قررت اكتب تدوينه
عن البرايمر وانواعه و اذا كنتي تحتاجين او لا .




البرايمر منتج تحطينه قبل الاساس سواء كان فاونديشن او بيبي كريم او سيسي كريم او ممكن لحاله يهيئ البشره انها تستقبل المنتج
 وتحافظ على شكله وتخليه يدوم اكثر , لكل بشره نوع برايمر مناسب مثل للي عندها مسام او الي بشرتها جافه او الي بشرتها
دهنيه او الي فيها تصباغات وكذا .

طيب انا احتاج ؟
اذا انتي بشرتك مافيها عيوب وناعمه وعاده اصحاب البشره العاديه يكونون كذا يكفي تستخدمين الفاونديشن , البرايمر مو منتج
 اساسي حتى المكياج فيه منتجات ما تكون اساسيه اذا ما تحتاجينها لا تستخدمين يعني بنت بشرتها تجنن وصافيه وفيها شوي هالات
 تروح تستخدم فاونديشن ليش ؟؟ يكفي كونسيلر وشوي باودر , باختصار اذا تحتاجين البرايمر استخدمي واذا ما تحتاجين لا تستخدمين **

انواع البرايمر :


لكل انواع البشره:



ميكب فور ايفر عندهم برايمر بلون خفيف يعتبر مصحح وينفع لكل انواع البشره ايش المصحح ؟

الابيض : يعطي البشره اشراقه

الاخضر : الي بشرتها فيها احمرار يخففها لها

البنفسجي : يقلل من الشحوب الي في البشره

البرتقالي : للبشرات السمراء

الازرق : يعطي اشراق للبشره ويقلل عيوبها

الاصفر : يفتح المناطق الغامقه

الزهري : يفتح البشره ويخفف من الشحوب

طبعا اللون ما راح يكون قوي مجرد ما تدمجينه راح يختفي :)


البشره الدهنيه والي تعاني من الدهون في وسط اليوم او البشرات المختلطه :

من اليسار : بير منيرلز موجود في سيفورا , بيكا  و اور جلاس مو متوفرين في الخليج , لورا مرسييه موجوده في دبي و الكويت
بس مو موجود في السعوديه ويقولون راح يفتحون قريب , سيفورا متوفر في فروع سيفورا عندنا , سماش بوكس موجود في بعض
فروع سيفورا السعوديه الي سمعت انه في الظهران :)


 للبشرات الجافه الي تحس انها ناشفه وما فيها جلو وصحه او حتى البشرات العاديه :

من اليسار : ذات جال من بنفيت موجود في سيفورا ,توفيسد موجود في سيفورا , ذا بالم مو موجود في السعوديه , ماك ستروب
كريم موجود في فرع ماك عندنا , ديور موجود في سيفورا , سماش بوكس مثل ما كتبت فوق :)                                    

للبشره الي فيها مسام او خطوط تعبيريه البرايمر الي يكون ملمسه زي السيلكون ممتاز لانه يعبي المسام او الخطوط ولا تبين
مع الوقت مناسبه جدا للكبار او حتى الي عندها تجاعيد انا استخدمها حوالين الانف لان عندي مسام ولو حطيته على كامل الوجه يصير الوج ناعم والخطوط تختفي لو عندك :)
بنات انتبهو لاختلاف الاسماء يعني ديور هذا غير ديور الي فوق اقرو الاسم ^^ من اليمين من بنفيت موجود في سيفورا
ديور موجود في سيفورا , توفيسد موجود في سيفورا , تارت مو موجود في الخليج , كلالانس موجود في سيفورا :)


ولو حابين تشوفوت خيارات اكثر للبرايمر ادخلو هنا راح ينقلكم على صفحه سيفورا اون لاين وفيه اكثر من 100 نوع برايمر
اقرو عن نوع لو حابين تعرفون اكثر انا حطيت لكم بعض الخيارات مو كلها لان فيه انواع كثييييره


 وبس ،، أتركوا تعليقاتكم وآرائكم تحت لأنها تسعدني 

♥♥♥

 Instagram : Ghada_abdullah09
Twitter: G_abdullah09
snapchat : G.abdullah09
،
اشتركي في المدونة حتى توصلك الاخبار اسرع اضغطي على المستطيل الأزرق في اليسار اعلى الصفحه :

هناك 6 تعليقات:

asmaa mohammed يقول...

الله يعطيك العافية حبيبتي

غير معرف يقول...

الله يعطيك العافية ويكثر من امثالك

غير معرف يقول...

حبيبتي م تكلمتي عن برايمر العين ؟

Candy Za يقول...

الله يعطيك العافيه جدا استفدت

Lulu يقول...

تسلمي والله كنت محتارة إِيش اشتري برايمر

غير معرف يقول...

merciii

إرسال تعليق